CAUNG: KHIN" 20
Aung Doe, Nae" Akyu" Mho' Thoe
(Davi Peim: Ra" Nghaui"caung:)
1 Nao qug: khai: qhug' ra" au: re Asang nao re tau: byid: vashao:-
Yaku nho: Mao"So wa nao re gug: gam byid: vashao:.
2 Yao: wa yao" Caung:pa" Yham mae" nao re bao" yu nae" ra" khyo phung" byid: vashao:-
Ziun Bam mae" nao re bao" yu nae" ra" khyo nyhang" byid: vashao:.
3 Nao qhaug' byid' ra" jhaung qhu" alhab' re Asang lham: khae: yu vashao:
ni" ngaui" xeim: rere: lham: ngaui vashao:.
4 Nao myid: o: rure yao" yang nao re byid: vashao:- amung: nao myid: yaung: to" ru alhab' re aung doe, nhao vashao:.
5 Ailao" ngonhaung" wa ni" aung doe; ra" khyo mathao mae hug' bam nae"-
nao aung doe; rure caung" ra" khyo" ngonhaung" Mao"So re caung:khin" yang: ni" aung doe; ra" khyo re poe kad' nae". Asang wa nao mho' ra" ja: alhab' re byid: vashao:.
6 Asang wa yao: khyin: to" ra" kho:kham re aung doe, nhao: rure ana" ngo ba va".
Yao" gyang" lho" ra" mug:gaung mae" yao" mho' thoe re tau: byid' ra". Yao" qam: so' yang yao: re aung doe, nhao: ra".
7 Byu daqhae: wa yao: bam: gyekhe' myao: lhin" jham re myid: lam: ako".
Gaje daqhae: wa yao: bam: myao: jham re myid: lam: ako". Ngadqere: ngonhaung" kam" wa ngonhaung" nho: Mao"So Asang re lam khug: na: bam:.
8 Airu" ra" byu qe wa khyid au: thaung: mung: lang: genae"- ngonhaung" kam" wa to" mung: tang tang za: ye; jo, nae".
9 O" Asang we"- Kho:kham re aung doe, nhao mung: ngonhaung" yao: ra" au: re tau: byid: la, wo".