CAUNG: KHIN" 19
Mao"So: Phungbao
Davi Peim: Ra: Nghaui"caung:
1 Mug:gaung wa Mao"So: phungbao re khonho" de: de: za: qhu" byid' na: i?
Yao: kad' to" ra" lo,mau" re khonho" de: de: qhu" to" i?
2 Ba khao: ngo" xo' yang: zhao" zhao" aire hau" qhu" na: ra". Damyi we' damyi re: aire dam: paug' qhu" ra".
3 Thoe re: mathug'- dao: kheim: re: majhau- pe" myang thoe re: mathe' gyo:.
4 Ngadqere: yao: bam: lau dao: wa damug: myid geim" mae joe" lo" ra". Myidgaung thao" sho' re: the' gyo" lo" ra"
Mao"So wa ba: qhid' mae" mug:gaung mae yham kad' to" ra".
5 Aiwa ne, seim ayo, mae ngaui bau" ra" pho" sag' we' dakhyo:- jho" tao: nae" ga: seim" na: ra" sab' yaug ru: thug' li" ra".
6 Aiwa mug:gaung dashad' jheim mae" thug'li" mung: dashad' jheim khyo lai: lo" ra".
Ai: nho: laung so' mae" loe; ru pe" ja: re: majo,-
Asang: Tarha"
7 Asang: tarha" wa jab byang" ra"-
Aiwa qam: sag' byid' ra". Asang: amyin" dao: jham wa lam ga" ra". Pha,jhi" maqo" mo, re pha,jhi" byid' ra".
8 Asang: tarha" jham wa jo: ra". Aijham re phug' cao" ra" mo, wa ngaui lho" ako".
Asang: amyin" jham wa din:man" ra". Aimung: nhag' lam: khug mae laba lajhao ke' byid' ra".
9 Asang re gyaug phug' ru wa gai: ru ngad: ra".
Aiwa apyad ato mae xo' jo; li" nae". Asang: tarha" dao: kho' ru wa tarha" din:nyang: ra". Aijham wa khonhae" re: jao dang vang" ra".
10 Aijham re qhang gyang" tho' je yang: o gai: ra".
Aijham wa gyang" thao" ra" byoyhid tho' je: cug' ra".
11 Aijham wa ni" daui nhao lagyo: ngore pha,jhi" byid' ra". Aijham re ngo cao" na mung: akyu" the' kham zo" ra".
12 Khag' re: yao: yao: shad' nghung" rure mathe' myao-
Asang we"- nghoe' nyham" to" ra" qobo mae" ngore loe, nhao la,-
13 Thaug kad' ra" qobo mae" ngore gug: gam byid: la,- ngore eib zo: nae" akhang" yao: bam re dabyid:-
Ailao" ngo wa jab byang" mung: makhyang" ra" qobo mae" loe; beim nae".
14 Ngo myid: ra" khyo we' ngo ta" ra" dao: thoe wa ni" qhid' kheim: mae khae: yu nae" man: qi" vashao:-
O" Asang we"- nga" nho: khug ngha jao: we' ngore khyad' yu yaug we".