CAUNG: KHIN" 18
Davi Nho: Aung Doe; nghaui" caung:
(Asang: daui daui lagyo: Davi Asang: nho: ba na mae Asang re caung" ra" dao: jham)
(2 Sa 22.1-51)
1 Asang we"- nao re ngo gyai jhid'de; ra"-
nao wa nga" nho: gyevha byid: yaug ngad: ra".
2 Asang wa nga" nho: gug: gam byid' yaug ngad: ra". Yao: wa nga" qhid' mae" tang: ra" gye zaung ngad: ra".
Nga" Mao"So wa nga" gug: gam jo, qo ngad: ra". Aimung: yao: we' na: re ngo gug: gam qo" ra". Yao: wa ngore go we' dakhyo: gug: gam byid' ra". Ngo re gye vha byid: mung: gug: gug: za: na nhao: ra".
3 Asang re ngo yao mung: yao: wa nga" gyevo qe: lo, mae" ngore khyad' yu byid' ra".
Asang re caung:khin" ge,.
4 Shid nae" gyaug, pho: gye wa nga" avai: ayae mae byang" jo; ra".
Phyo' qheim" ra" bang: lhung" wa nga" dao mae lheim" lo va".
5 Shid nae" gyaug ja: wa ngore lhang" kham" to" ra"- lab wa nga" qhid' mae" lha" thaung: to" ra".
6 Nga" qug: khai: khug mae" Asang re ngo yao: ke' va".
Bao" yu nae" qhid' mae" nga" Mao"So re khai va".
Yao" caung:pa" yham mae nga" mho' yao thoe re yao: gyo: byid: va". Bao" yu nae" qhid' mae" ngo mho' re yao: tae" gyo: byid: va".
7 Ailao" Mao"So nhag' yo: yang: myid gaung nan" mung: lab: ra". Bam apan jham lab mung: qhad qhad ga: laui" ako".
8 Yao" nhokhyaung mae" myi:khug'' thug' ra".
Yao" nhad' mae" nga" de; na: ra" myi" shae we' myi: gyoe: thug' ra".
9 Yao: wa yao" khyid qao: mae jham no, thaui: we' daga" mug:gaung re cad' pye' mung: gyo" li" ra".
10 Yao: phan" to" ra" daung de; gug'nyhug' dao mae zaung: dao" li" ra". La so' au: mae yao: gyaung: su" ra".
11 Yao: wa yao" gaung re cad' no; yang thab' ci: ra"-
qid byang" sho' bo: ra" jham thaui: wa yao: re lhang" kham" to" ra".
12 Yao" qhid' kheim: mae lagqu khai" jham we' myishae jham thug' ra".
Aiwa jham thaui: no, khyo" kyao" thug' lo: ra".
13 Ailao" Asang wa mug:gaung mae" mug: gyug: khyo" hug' ke' mung: myhao: thao" yaug: thoe re the'gyo" bam va".
14 Yao: wa yao" myo:khe' jham re bag: ke' mung: yao" gyevo qere khe' sin" pye' ra".
Lhe' cad' myi jhang" yang yao: bam re khe' tao" pye' ra".
15 Asang we"- ni" gyevo qere nao: yang qeim yo: mung: kyaug' nhin" ke' au:
nammugdara tham: kao" wa akeim boe" byaug: ra".
16 Asang wa tho' mae" lo, yheim" khyo" ke' mung: ngore zaui" yu ra"- tham: no, khug mae" ngore she: phoe' thug' yu: ra".
17 Yao: wa ngore qam: qi" ra" nga" gyevo qe: lo, mae" we' ngore nhang" ra" mo, alhab' mo; lo, mae" khyad' yu ra".
Yao: bam wa ngo:yang maaung naeqhi" xo sho' qam: bo mo, ngad: ako".
18 Ngo qug: khai: qhug' na: au: yao: bam ngore gyekhe' ko" ra"- ngadqere: Asang wa ngore gug: gam byid' ra".
19 Yao: wa ngore gyaug pho: mae" bao" yu mung: yao: qu" ngaui yang: khyad' yu: ra".
20 Ngo wa jo: ru kad' mung: Asang ngore aphug' jhaung qhu" byid' ra".
Ngo mae qobo mabo mung: yao: ngore shaman" byid' ra".
21 Ngo wa Asang: tarha" re cao" va"- ngo wa nga" Mao"So mae" maphaug' lo".
22 Yao" tarha" alhab' re ngo phug' cao" va". Yao" amyin" dao: jham re ngo mangag: pye'.
23 Ngo qobo maqo" ru we' shad' nghung" ru mabo: kad' rure yao: ba: ra".
24 Amung: ngo wa jo: ru kad' ruyang yao: ngore aphug' jhaung qhu" byid' ra"-
pe"mung:ga"re ngo wa qobo maqo" yaug ngad: rure yao: ba yang: ngad: ra".
25 O" Asang we"- nao re jhaug' zaug mo; dao mae nao wa jhaug' zaug yaug ngad: ra"- qo mabo mo; dao mae nao wa pe" ta" maca" lo: sho' gai: ra".
26 Yaung" shab san sin" mo; dao mae nao san sin" ra"- makhyang: mashab mo; dao mae nao gye kad' ra".
27 Nao wa nhag' lam: khyo" mo, re khyad' yu mung: ngad beim: mo, re deim" khyo" pye' ra".
28 O" Asang we"- nao ngore bo" bao byid' ra". Nga" nho: cag' no; ra" mug: cad' re nao khe' pye' byid' ra".
29 Nao wa nga" gyevo qere qo" khe' aung: pye' nae" qam: ngore byid: ra".
Yao: bam lham: thaug' rure aung nae" qam: so' ngore byid' ra".
30 Ce: Mao"So- yao" lo, mau" jham wa khoqhi" jab byang" ra" i?
Yao" dao: kheim: jham wa khonho" lam ga" i? Yao" yang qhaung mung: gug: gam: yu nae" qho mo, re yao: wa go we' dakhyo: ngad: ra".
31 Asang za: Mao"So ngad: ra". Mao"So za: ngonhaung" re qhaung: to: mung: gug: gam byid' ra".
32 Yao: wa ngore qam: bo nhao yaug ngad: ra".
Yao: wa nga" khyo re gug: gam byid: yaug ngad: ra".
33 Ngo re sho:cid: khyid we' dakhyo: nga" khyid re tang nhao: ra". Bam jham mae ngore gug: gam byid' ra".
34 Qao: thao" ra" lo, la: re ngo ba: ci sho' yao: ngore gyekhe' pha,jhi" mho" byid' ra".
35 O" Asang we"- nao ngore gug: gam byid: mung: khyad' yu: ra".
Nao: yang gun caung byid' ru wa ngore qi" qhang nhao ava". Ni" qam: so' wa ngore gug: gam za:na nhao: ra".
36 Ngo re mathe' taung: lo sho' nao zam" to" ra". Aimung: ngo khonhae" re: malang:.
37 Nga" gyevo qere ngo khe' mung: the' taung: va". Yao: bam re maqo" phyo' qheim" qheim" wa ngo mathang.
38 Yao: bam re ngo jhoe" khyo" pye' mung: yao: bam maqo" to" lo:- nga" qhid' kheim: mae yao: bam seim" lang" jo, vako" ra".
39 Nao wa gyekhe' poe qhid' mae" ngore qam: byid' ru we' nga" gyevo qe: dao mae aung nhao: ra".
40 Nao wa nga" gyevo qere ngo mae" phao: lo" naekhyo: kad' ra"- ngore nghang" ra" mo, re ngo phyo' qheim" pye' va".
41 Yao: bam re bao" yu nae" qhid" mae" hug' yao qere: khag' yang makhyad' yu ngad: ako".
yao: bam wa Asang re yao gengadqere: yao: matau: byid:.
42 Ngo yao: bam re mhan" kad' pye' mung: yao: bam wa la: yang mad: pye' ra" phalhug ru: boe" lo" ako". Hau" mo" khyo jham mae" tham: bab: re we' dakhyo: yao: bam re ngo zab: nhae" pye' va".
43 Tau: lhan: mo; lo, mae" nao ngore khyad' yu mung: byumyu" qe: dao mae zug: kad' nhao va".
Ngo malhaung" ba: ra" byu qe wa ana" nga" mung" byu boe" vako" ra".
44 Taung bug: mang: mae" byu qe nga" qhid' kheim: mae goe; pa" ako". Nga" thoe re gyo: lao" yao: bam tae" gyo" ako".
45 Yao: bam wa sulhe: myid byaug mung: yao: bam: gyevho' yham khug mae" gyaug: nin" thug' li" ako".
46 Asang daui: na vashao: wo"- ngore gug: gam byid; yaug re caung:khin" ge,- ngore khyad' yu: ra" Mao"So qi" qhang: ra" khyo re hau" kyo: ge,
47 Yao: wa nga" gyevo qere aung nae" akhang" ngore byid' ra".
Yao: wa mung"dan: jham re nga" lo, qao khyo khyo" pye' ra".
48 Nga" gyevo qe:ra" lo, mae" re: ngore khyad' yu: ra".
O" Asang we"- nao wa nga" gyevo qere aung: pye' nae" akhang" ngore byid' ra".
Aqan alan kad' mo; lo, mae" re: ngore gug: gam byid' ra".
49 Aimung: byumyu" qe: agaung: mae nao re ngo caung:khin" ra".
Nao re ngo caung: nghaui" ra".
50 Mao"So wa yao" kho:kham re qi" qhang: ra" aung doe; khyo byid' ra".
Yao: khyin: yu: ra" yaug re mabaui mabyo; ra" jhid'de; myid qhu" byid' ra". Davi we' yao" myid:zo: qere yao" mabaui mabyo; jhid'de; myid apyad ato qhu" byid' ra".