CAUNG: KHIN" 17
Qobo Maqo" Yaug: Nho: Akyu" Mho' Thoe
(Davi Nho: Akyu" Mho' Dao:)
1 O" Asang we"- Tarha" dangman" ru qhid' mae" ngo mho' yao: ra" thoe tae" gyo: byid: la,-
bao" yu nae" qhid' mae" ngo hug" yao: ra" thoe re gyo: byid: la,. Nga" din:man" ra" akyu" mho' thoe re tae" gyo: byid: la,.
2 Nao wa jo: ra" khyo re ba mung: nga" bo: de, yang: dao: kho' byid' li" nae".
Pe"mung:ga"re nao wa jo: rure ba: ra".
3 Nao wa nga" nhag' lam: re ba byid' ra"-
Nao wa ngojhao" myi" ayo, re li" mung: ngore thao" sho' ca: qu" re nga" khug mae makhyang" ra" obyid: nhag' lam: dace' re mathe' myao ngad: ra".
4 Ngo wa su gaje ta" ruru: makhyang" ra" dao: mata"
Ni" tarha" re ngo cao" mung: aqan alan khyo mae ngo macao" ye:.
5 Ngo wa ni" khyo mae khonhae" re: su" na mung: aimae" va: khyo khonhae" maye:.
6 O" Mao"So we"- nao wa nga" akyu" mho' thoe re tau: byid: mung: nao re ngo akyu" mho' ra".
Aimung: ngojhao" phaug' lo yang: nga" mho' yao thoe re tae" gyo: byid: la,.
7 Ni" nho: mug' pho: jhid'de; myid re pheim: qhu" mung: ngore khyad' yu la,-
ni" nhae mae na: re nga" gyevo qe: lo, mae" gug: gam za: qo" na:.
8 Ni" myo,jid' re nao gug: gam byid' ru we' dakhyo: ngore gug: gam byid: la,.
9 Makhyang: mashab mo; yang khe' lhad' rumae" ni" daung qab khug mae ngore nyham" to: byid: la,- byuse' ra" gyevo qe ngore lhang" kham" to" ako".
10 Yao: bam wa nhag' khyag' myid mabo mung: ngad beim" ra" dao: ta" ako".
11 Yao: bam wa ana" ngo khai: joe" khai: nga" nhae mae lhang" kham" to" ako".
Ngo re khyo" zhaung: pye' nae" khyo re qho: na: ako".
12 Yao: bam wa khang khyi jham we' dakhyo: ngore aje, aman" phyo' cad' sin" pye' nae"- ga: lao" na: ako".
13 Asang we"- Li" wa,- nga" gyevo qere lham: zin: mung: yao: bam re seim" nhao wa,.
Ni" shae pyang" yang makhyang: mashab mo; lo, mae" ngore khyad' yu byid: la,.
14 Ce:pyad mae" jo,nho" reza: myid: o: ra" mo; lo, mae" ngore khyad' yu la,-
yao: bam: qhid' mae" nao qaung" to" ra" qug: khai: we' yao: bam re qobo dae byid: wa,-
yao: bam: yao: zo: qere: gyi: sho' de, zo: vageshao:- yao: bam: yao: myid: qe: qhid' mae" re: de, zo: nae" dang: jo, shi: vashao:.
15 Ngadqere: ngo wa pe" mashad' manghung: yang: nao re qo" the' myao nae".
Ngo dam: beim" so" li" re nao na: jo; ru the' myao mung: ngo mae ngaui bau" ru byang" lo nae".