CAUNG: KHIN" 147
Qam: So' Bo: Thao" Ra" Mao"So Re Caung:khin" Byid' Ru
1 Asang re caung:khin" byid: ge, wo"-
ngonhaung" nho: Mao"So re Nghaui"caung: yang: caung:khin" byid' na nae" gai: ra". Yao: re caung:khin" byid' ru wa ngaui bau: pho: we' jo: ru ngad: ra".
2 Asang wa- Yerusalem re dam: tau: to' yu: na: ra".
Yao: wa taung bug: mug: khyo pyaung" yu qhug' mo, re- dam: jhui" phao: lo: na: ra".
3 Yao: wa nhag' lam: gyug: mo, re dae gai byid: mung:
yao: bam: dae jad: re pin: cug' yang thab' byid' ra".
4 Yao: wa kyi jham khonho" ce' ngad: rure nghe' to" ra".
Amung: kyi ce' khao: ngo" re mang mhang" byid' ra".
5 Ngonhaung" Asang wa- qi" qhang mung:
qam: so' qi: yaug ngad: ra". Yao" pha,jhi" re khoru: maba: tho' ka".
6 Yao: wa nhag' lam: khyo" mo, re tau: to' ra".
Ngadqere: nhag' lam: kaui: ra"- makhyang: mo, re kam" wa- myidgaung khyo deim" khyoe' pye' byid' ra".
7 Asang re nghaui"caung: kyo: ge,.
Tang: nghaui" thoe: yang- ngonhaung" nho: Mao"So re caung:khin" ge,.
8 Yao: wa jham thaui: re mug:gaung mae myhung" to" ra".
Yao: wa myid gaung: qhid' mae" mug: qu nhao: ra". Aimung: bug gaung jham mae mhin: yaug nhao: ra".
9 Yao: wa gug'nyhug' jham re zo:ve byid: mung:-
kano, nau" jham myang lao" zo:ve byid: zho" ra".
10 Yao: wa qam: bo: ra" myao: jham mae qu" ngaui: ru mangad:-
gyekhe' lhe" ra" gyezo: qere qu" ngaui: ru mangad:.
11 Ngadqere: yao: wa yao: re nga: yhe' byid' ra" mo, we' yao" mabaui mabyo; ra" jhid'de; myid re
lam khug: na: ra" mo, mae myid: ngaui: na: ra".
12 O" Yerusalem we"-Asang re caung:khin" byid: wa,
O" Ziun we"- ni" Mao"So re caung:khin" byid: wa,.
13 Yao: wa ni" vogaung: kham: mo" jham re gang" tang nhao: ra".
Ni" byumyu" re yao: shaman" byid' ra".
14 Yao: wa ni" mug: kyo: re gug: gam: to" ra".
Aimung: nao re gai: thao" ra" jung: gaug: yang nhag' dag nhao: ra".
15 Yao: wa myid gaung re amyin" byid: mung:
yao: ta" ru phyad za: kad' boe" ra".
16 Yao: wa gyu: re mai pho' we' dakhyo:- myhung" to: mung:-
gyu: khai" jham re phalhug reru: gag: sin" ke' ra".
17 Yao: wa lagqu re laug zo: we' dakhyo: nhao: ke' mung:-
yao: nhao: ke' ra" angin" re khag' maqo" kham ngad: ako".
18 Ailao" yao: amyin" byid' ke' mung:- qid khai" wa aqang: yug: lo" ra".
Yao: wa la hug' re nhao: ke' re qid yug: li" ra".
19 Yao: wa yao" byumyu" re lau dao: kyo: byid' ra".
Yao" mho" shid' dao: we' tarha" Israel byu qere byid' ra".
20 Yao: wa gaje: byumyu" qere ceru: makad' byid:- yao: bam wa yao" tarha" jham re maba ngad: ako".
Asang re caung:khin" ge, wo".