CAUNG: KHIN" 146
Khyad' yu: Asang Re Caung:khin" Ru
(Hebre Dao: Au:- Halelu- ya)
1 Asang re caung:khin" byid: ge,- nga" alo zo: we"- Asang re caung:khin" byid: wa,
2 Ngo kao so' adaui: na na wa yao: re caung:khin" byid: nae".
Ngo wa nga" Asang re- nga" pyad geim" mae caung:khin" byid: nae".
3 Xao su byu: au: she kad' mo, re damyid: lam khug.
Xao su byu khag' re: nao re maqo" khyad' yu.
4 Yao: bam shid: lo" re phalhug khyo dam: tug' lo" ako".
Ai: ba na mae yao: bam myid: yaung: to" ru alhab' thao" byaug va".
5 Bao" yu nae" qhid' mae"- Yaku nho: Mao"So re qo" to: yaug-
yao" Mao"So Asang re myid: khug ngha yaug wa- ngaui lho" ra".
6 Mug:gaung myid gaung we' panglai:- aijham mae bo: ru alhab' re phan" to: yaug re khug ngha yaug wa ngaui lho" ra".
Asang wa- yao" dao:so: re khonhae" re: zaui" pyang" yaug ngad: ra".
7 Yao: wa deim" zag zo" ru qhug' mo, shad' de, mung:- dao: kho' byid' ra".
Aimung: vae: moe; mo, re zo: shaug' byid' ra".
Asang wa thaung: laung" mo, re loe; beim nhao: ra".
8 Aimung: myo, jid qere myao nhao: ra". Yao: wa gyang: lang: mo, re tau: to" yu: ra". Yao: wa yao" din:man" ra" byu qere jhid'de; ra".
9 Yao: wa ngonhaung" mug: myid mae"- taung bug byu bang" qere gug: gam byid' ra".
Yao: wa cug' mo" cug' zo: qere bao" byid' ra". Ngadqere: nhag' lam: kaui: ra" makhyang: mo, re kam" wa- yao: bam: byo; qeim khyo khyo jhui" lo" ra".
10 Asang wa apyad ato mae kho:kham ngad: ra". O" Ziun we"- ni" Mao"So wa ayo, byang" sho' eib: na nae".
Asang re caung:khin" byid: ge, wo".