CAUNG: KHIN" 106
Asang: Yang Yao" Byumyu" Dao Mae Gai: Ra" Khyo
1 Asang re caung:khin" byid: ge,- Asang wa gai: rumung: yao: re jeju beim: so: byid: ge,- yao" jhid'de; myid wa
apyad ato mae ngad: ra".
2 Yao: kad' lai: lo: ra" mau" zo" qi: alhab' ra" khyo re khag' qo" ta" kyo: genae" i?
yao: re khag' yang jab byang" sho' qo" caung:khin" byid: nae" i?
3 yao" amyin" jham re phug' cao" ye: mo, wa ngaui lho" ako".
Yao: wa khonhae" re: jo: ru za: kad' yaug ngad: ra".
4 Asang we"- nao: yang ni" byumyu" qere bao" yu: ra" au: ngore myid: beim: la,-
yao: bam re khyad' yu: ra" au: re- ngo rere: bo:ke' yu byid: la,.
5 Ni" byumyu" qe na: dai: rure- ngore myao nhao la,- aimung: nao: yang sang: ra" mo,
ngaui bau: ngaui lho" rumae ni" byumyu" ngaui bau" ru we' daga" ngo rere: bo ngaui bau: nhao la,.
6 Ngonhaung" wa- ngonhaung" phug' phyid' bam shad' nghung" ruru:
qobo shad' bam va". Ngonhaung" wa nhag' lam: kaui mung:- makhyang: mashab mo, ngad: bam va".
7 Egutu mae" ngonhaung" phug' phyid' qe wa Mao"So: mug' pho: mau" jham re maba: gyo: ngad: ko".
Yao: bam wa- yao" yang yao: bam re- myo: sho' lhang yao" jhid'de; myid qhu" byid' rure to" myhid' pye' ako". Aimung: yao: bam wa panglai: ne mae qam: so' qi" thao" ra" Asang re tau: lhan" ako".
8 Ngadqere: yao: wa- yao" qi" qhang: ra" kheim: so' re
qhu" byid: nae" qhid' mae" yao" yang dao:so: byid' to: va" ru we' dakhyo:- yao: bam re khyad' yu va".
9 Yao: wa Pang:lai:: ne re amyin" byid' ke' mung: ai:ru wa-
Kyaug' ho: lo" ra". Yao: wa yao" byu qere myidgaung ho dao khyo" jhui" lai: lo" ra".
10 Yao: wa yao: bam re nghang: mo; lo, mae" yao: bam re khyad' yu: ra".
Yao: bam: gyevo qemae" khyad' yu: ra".
11 Ngadqere: yao: bam: gyevo qere kam" wa qid: yang nhai" se' pye' ra".
Yao: bam mae" dayaug re: madang ngad: ako".
12 Ailao" yao" byumyu" qe wa yao" dao:so: re lam" mung:
yao: re nghaui" caung:khin" ko" ra".
13 Ngadqere: yao: bam wa yao: kad' rure ai lao" jao" to" myhid' pye' mung:-
yao" yang pha,jhi" byid: nae" rure malao" lo: dam: kad' ako".
14 Yao: bam wa din"pyad' yo mae o: byid khyo qho mung:
Mao"So re jham" qu" ako".
15 Aimung: yao: wa yao: bam mho' rure byid' ra".
Ngadqere: yao: bam: phaung mae gyaug ci" ja: qam" rere: nhao: ke' byid' ra".
16 Ai: din"pyad' yo mae yao: bam wa
Asang: gyang" lho" ra" daui daui yaug Moshe we' Arun re qu" nhung: li" ako".
17 Aimung: myid gaung go; ho" li" mung: Dathan re myug: pye' va".
Abiram we' yao" yham byu qere re: bam" se' pye' va".
18 Yao: bam: thao cao" mo; dao mae myi: shae gyo" lo mung:
ai: makhyang" ra" nhag' lam: kaui mo, re nga" pye' va".
19 Yao: bam wa Sina mae qhang: yang nung: jaung lo: nau" lho
sheim: mung: ai: nung: jaung nau" lho re caung:pa" byid' ako".
20 Yao: bam wa- Mao"So nho: phungbao re mhin: zo" ra"
ai: gug'nyhug' nho: alho we' jho" tha" pye' ako".
21 Yao: bam wa Egutu mae yao" qam: so' qi" ra"- lo, mau" yang yao: bam re khyad' yu: ra" Mao"So re
to" myhid' pye' ako".
22 Yao: wa ai: mae khoqhi" mug' pho: mau" jham kad' va" i?
Pang:lai:: Ne mae khoqhi" mug' ja: kad' va" i?
23 Mao"So: yang yao" byumyu" qere phyo' qheim" pye' nae" ga: ta" au:- yao" yang khyin: to" ra" daui daui yaug Moshe wa-
Mao"So: qhid' kheim: mae to" ye, mung: yao: bam re maphyo' qheim" pye' nae" qhid' mae" nhag' yo" rumae" khyad' yu: ra".
24 Aimung: yao: bam wa- Mao"So: yang dao:so: byid' to" ra"
mug: myid re yao: bam ha: lhaui" pye' ako".
25 Yao: bam wa yao: bam yao" zaung yham khug mae
laung" jo, mung: nyhung: gaui: na: ako".
Amung: Asang re
matae" gyo: byid: ngad: ako".
26 Aimung: yao: wa- yao: bam re din"pyad' yo mae
shid: dam: nhao nae" ga: yang:- gang" tang: ra" ta" peim: thoe ke' pye' ra".
27 Aimung: yao: bam: myid:zo: qere Mao"So re maba: ra" taung bug byumyu" qe: phaung khug khyo khe' sin" pye' ra".
Aimung: yao: bam re taung bug: mang: mae shid: dam: nhao: ra".
28 Ai: thao Peora mae Mao"So: byumyu" qe wa
Bala so re bocaung:pa" gemung: kao so' mabo: ra" so jham re qhaug' byid' ra" xeim: re zo" ako".
29 Yao: bam kad' ra" lo, mau" khyo" yang Asang: nhag' yo: myid re lhau: zhung" ke' ako".
Aimung: yang:yao: bam: phaung gaung: mae gyaug ci" ja: no boe" nhao: ra".
30 Ngadqere: Phineha to" ye; li" mung: qobo qo" mo, re qobo dae byid' ra".
Aimung: qam" no wa dam: byaug va".
31 Ai: au: mae ceru: boe" rure- yao" shad' khyo de, mung: ba: gyo: byid: geyang: ce:thao: ne, ayo, byang" sho' xam" ci: li" genae".
32 Meriba qid thug' mae ai: byumyu" qe:yang
Asang re nhag' yo: nhao mung: Moshe wa yao: bam: mathao mae qug: khai: qhug' va".
33 Yao: bam wa yao: re nhag' phin" yo: nhao mung: yao: wa
lhao" mamyid: qu" lo sho' jhau: ke' va".
34 Asang: yang yao: bam re amyin" byid' to" ru we' dakhyo:
Mao"So re maba: ra"
taung bug byu qere mase' pye' ngad: ako".
35 Yao: bam wa ai: byu qe we' myi: byid: myi: yu mung:
yao: bam: taung bug thung" re bo:cao" lo" ako".
36 Mao"So: byumyu" qe wa solho jham re caung:pa" mung:
ai wa yao bam yao" byo; qeim: khyo boe" lo va".
37 Yao: bam wa- Khanan so sulho jham: qhid' mae"
yao: bam yao" yauggai zo: we' myiqe: zo: qere xeim: ngaui" pye' ako".
38 Yao: bam wa ai: qobo maqo" ra" zoshao qere se' pye' mung:-
ai: mug: myid re byuse' mau" yang maca' majhad' boe" nhao: ako".
39 Yao: bam wa yao: bam yao" maca' majhad' ave; yang mayaung" malho" kad' yu: ako".
Aimung: Mao"So re jhaug' mazaug boe" ako".
40 Aimung: Asang wa- yao" byumyu" re nhag' yo: mung:
yao: bam re ca' pye' ra".
41 Yao: wa yao: bam re Mao"So re maba: ra" taung bug byu qenho: kheim: so' khug mae
shapye' to: va". Aimung: yao: bam: gyevo qe wa yao: bam re eib: ako".
42 Yao: bam: gyevo qe wa- yao: bam re
deim" zag zo: mung: yao: bam: agyid' mae pye: pye: laung" jo; ako".
43 Asang wa yao" byumyu" qere myo: sho'
lhang khyad' yu: ra". Ngadqere: yao: bam wa- yao: re tau: lhan: nae" khyo khyin: yu mung: yug: no qobo khug khyo je: nab: vao lo" ako".
44 Ngadqere: yao: bam hug' yao: ke' re
Asang wa yao: bam re gyo: byid: mung:-
yao bam phau: zo" na: ra" dayin dayo: nhag' ngai: rure myao byid' ra".
45 Yao: wa yao: bam: akyu" qhid' mae" yao" dao: thang" re myid: beim" ra".
Aimung: yao" qi" qhang: ra" jhid'de; myid: mathao mae yao: nhag' yo: gyo" byaug: ra".
46 Yao: wa yao: bam re deim" zag zo: mo, alhab' nho:
aung khug mae shad' beim: nhao: ra".
47 O" Asang ngonhaung" Mao"So we"- ngonhaung" re khyad' yu la,-
Aimung: ngonhaung" re byumyu" qe: phaung gaung: mae" dam: jhui" yu la,- aire ngonhaung" wa nao re jeju beim: so: mung: ni" gyang" lho" ra" mang a re qo" caung:khin" byid: nae".
48 Israel byumyu" nho: Mao"So Asang re caung:khin" byid: ge,- ana" ngadqere: apyad ato mae ngadqere:
yao: re caung:khin" byid: ge,. Yaug khao: ngo" wa- Amen- ga: ta" vageshao:.
Asang re caung:khin" byid: ge, wo".