CAUNG: KHIN" 105
Mao"So We' Yao" Byu Myu"
(1 Km 16:8-22)
1 Asang re jeju beim: so: byid: ge,- yao: qi" qhang: ra" khyo re hau" kyo: ge,-
Byumyu" qere yao: kad' ra" mau" zo" ta" kyo: ge,
2 Asang re nghaui"caung: ge,
Yao: kad' ra" mug' pho: mau" zo" jham re ta" kyo: ge,
3 Yao" yang ngonhaung" re sang: rumung: ngaui bau" na ge,
Yao: re caung:pa" byid: mo, alhab' ngaui bau: ngaui lho" na ge,
4 Bao" yu nae" qhid' mae" Asang jhao" ye: ge,.
Aimung: yao: re abang mabyid lo: caung:pa" ge,
5-6 Yao" daui daui yaug Abraham nho: myid:zo: qe we"- yao: khyin: yu: ra" yaug Yaku nho: myid:zo: qe we"-
Mao"So kad' qhu" lo: ra" mug' pho: mau" jham re beim: ge,- yao: byid' ra" dao: kho' khyo rere: beim: so: ge,
7 Asang wa ngonhaung" Mao"So ngad: ra". Yao" nho: amyin" jham wa
mug: myid geim" qhid' mae" ngad: ra".
8 Yao: wa yao" dao: thang" re apyad ato mae zam" ci nae".
Yao" dao:so: jham re byu qae: dataung joe" sho' zam" ci nae".
9 Yao: wa Abraham we' dang: to" ra" dao: re we' Isag re byid' to" ra"
Yao" dao:so: re phug' cao" na: li" nae".
10 Asang wa Yaku we' dao: thang" to" ra".
Ai: dao: thang" wa apyad ato mae dang: jo; ra".
11 Yao: wa ngo nao re Khanan mug: myid byid: nae"
Aiwa ni" jo,nho" boe" jo, nae"- ga: ta" ra".
12 Mao"So: byumyu" wa byu mamyo: ngad: ra".
Khanan mung" mae byu bang" boe" na: ako".
13 Yao: bam wa damug: mae" damug:- kho:kham damung" dan: mae"
damung" dan: du" phao: lae" qin" ako".
14 Ngadqere: yao: bam re khag' yang deim" zag zo: nae"
akhang" Mao"So mabyid: ngad: ra". Yao: wa kho:kham qere ai bam re gug: gam byid: nae" qhid' mae" ta" peim" ra".
15 Ngo: yang khyin: to" ra" daui daui mo, re dae date' ge,
nga" lapa qere dathe' zao" ge,
16 Asang wa yao: bam: mung" mae bao" khug' khug' nhao: ra".
Aimung: yao: bam: zo:ve alhab' re yu: pye' byid' ra".
17 Ngadqere: yao: wa yao: bam: qhid' khyo
jeim khyo" aung: zo" pye' qhug' ra" yaug Yoseb re nhao: ke' ra".
18-19 Yao: we' sin: yang: pa: to" ru boe" li" sho'
Yao" khyid jham mae jao co: kheim" jham vhe' to: mung: yao" lang zang: mae jo, to' lang koe: vhe' to" ako". Asang: mungdao: wa yao: mae jo; dang: lo va".
20 Ai: thao re Egutu kho:kham wa yao: re nhao: thug' ke' va".
Byumyu" qe: kho:kham wa yao: re loe, beim nhao va"
21 Yao: wa yao: re yao" Asuya mau" zaui: nhao: ra".
Yao: re damung" geim" dao mae eib nhao: ra".
22 Kho:kham: nho: zug: qe: dao mae eib nae" kheim: so' we'
yao" pha,jhi" byid: nhag' bo qere mho" shid' nae" akhang" byid' to" ra".
23 Ai: thao mae Yaku wa Egutu khyo ye" lo" ra".
Aimung: ai: mung" mae ye: te" na: ra".
24 Asang wa yao" byumyu" re myid:zo: myo: sho' byid' ra".
Aimung: yao: bam re yao: bam: gyevo tho' yao: bam re qam: je: bo nhao: ra".
25 Yao: wa Egutu byumyu" qe:yang yao: bam re nghang: nae" khyo: kad' va".
Aimung: yao" daui daui mo, re mhug' pyag' ra" khyo" zam" khug nhao: ra".
26 Ai: thao mae yao: wa yao" daui daui yaug
Moshe we' yao: khyin: yu: ra" Arun re nhao: ke' ra".
27 Yao: shid' nhae wa Egutu mung" mae
Mao"So: qam: so' bo: ra" lo, mau" we' mug' pho: ve, lho jham kad' qhu" ako".
28 Mao"So wa ai: mung"dan: mae cad' no; rure nhao: ke' byid' ra"-
ngadqere: Egutu byu qe wa yao" amyin" re magyo: byid: ngad: ako".
29 Yao: wa yao: bam: qid gyaung: jham re sa: boe" nhao: ra".
Aimung: yao: bam: ngo: alhab' re se' pye' ra".
30 Yao: bam: mung"dan: mae pohaung byang" byaug: ra".
Kho:kham kho" mae lhao" re: byang" byaug: ra".
31 Mao"So amyin" byid ke' mung: yao khaung: jham we'
mho' jham damung" geim" mae dao" qin" ako".
32 Yao: wa yao: bam: mug: myid dao mae
Mug: qid atha" lagqu we' lhe' cad' re nhao: ke' ra".
33 Yao: wa yao: bam: sabyi naui jham we'
pho' ham" gae jham re phyo' qheim" pye' mung: sag' gae alhab' re gyug' gyo" byaug nhao: ra".
34 Yao: amyin" byid ke' mung: matho' nghe' lo:sho' ra"
khyag' phaung" jham bai bai mung: na: thug' li" ako".
35 Aijham wa ai: mug: myid mae" agae jham alhab' re
zo" pye' ako". Yao: bam wa qho:vo: gae alhab' re zo" pye' byid' ako".
36 Yao: wa Egutu yham khaung alhab' mae" yauggai
zoqhid' qere se' pye' byid' ra".
37 Ai: thao mae yao: wa Israel byumyu" qere jhui" thug' lo: ra".
Yao: bam wa ngaui we' qhang re ci: thug' lo: ako". Aimung: yao: bam alhab' mo, wa qao" zin" mung: qam: bo: ako".
38 Egutu qe wa yao: bam re gyaug mung:
yao: bam phao: thug' lo" re ngaui bau" ako".
39 Mao"So wa yao" byumyu" qe: dao mae
jham thaui: nghoe' to: byid: mung: myi" re yao: bam myo, myao nae" qhid' mae" myi: bao byid' ra".
40 Yao: bam mho' gelao" yao: wa ngho' jham re nhao: khyo" byid' ra".
Yao: wa- yao: bam gyi" zo: nae" qhid' mae" mug:gaung mae" zo:ve khyo" byid' ra".
41 Yao" yang laug bam re phung" ke' mung: qid baug: thug' li" ra".
Aiwa din"pyad' yo mae qid gyaung: zang we' dakhyo: yug: li" ra".
42 Yao: wa- yao" daui daui yaug Abraham re to: byid' ra"-
Gyang" lho" dao:so: re myid: beim" ra".
43 Aimung: yao: wa yao" byumyu" qere jhui" thug' yu mung: yao: bam wa
ngaui bau: ngaui lho" nghaui"caung: ru we' hug' ako".
44 Yao: wa yao: bam re su gaje: byumyu" qenho: mug: myid byid' ra".
Aimung: yao: bam: yothaung: jham re sang: yu nhao: ra".
45 Airumung: yao" byumyu" qe wa yao" tarha" jham re cao" mung:
yao" amyin" alhab' re zam: mung: cao" ye: genae" ngad: ra". Asang re- caung:khin" byid: ge,.