CAUNG: KHIN" 107
NGO" PAUG'
(Ckh 107-150)
Mao"So Gai: Rure Caung:khin" Ra" Khyo
1 Asang wa gai: rumung:- yao: re jeju beim: so: byid: ge,.
Yao" jhid'de; myid wa apyad ato mae ngad: ra".
2 Ai: dao: kheim: jham re paug' ta" mung:- Asang re caung:khin" ge,.
Yao: wa naonhaung" alhab' mo, re khyad' yu yaug ngad: ra". Yao: wa naonhaung" alhab' re naonhaung" gyevo qe: lo, mae" khyad' yu va".
3 Aimung: naonhaung" re- su gaje taung bug: mang: mae" ba thug' shad' ba vao shad'
mug: am: shad' we' mug: thao shad' mae" jhui" tug' lo va".
4 Damyo" wa khyo madung: ra" din"pyad' yo mae du" lae" qin" ako". Aimung: yao: bam wa-
vintang: na nae" vomo" maqhug' myao ngad: ako".
5 Yao: bam wa vae: moe; qid shab' mung: myid: lao" jo, qo
alhab' ci: phyaug' pye' avako".
6 Ailao" yao: bam wa yao: bam: qug: khai: khug mae" Asang re hug' yao: ke' ako".
Aimung: yao" yang- yao: bam re yao: bam: qug: khai: mae" khyad' yu byid' ra".
7 Yao: wa yao: bam re- yao: bam vintang: te" na nae"
vomo" khyo din" ra" khyo khyo" jhui" lo" ra".
8 Yao: bam wa Asang: mabaui mabyo; ra" jhid'de,myid we' yao: bam re
Asang: yang kad' byid' ra" mug' pho: mau" jham: mathao mae Asang re jeju beim: so: ca" ako".
9 Yao: wa qid shab' ra" mo, re nhag' dag nhao mung: vae: moe; mo, re
gai: ra" ja: jham: yang gyi: nhao: ra".
10 Damyo" wa nhag' lam: ngai: ru we' cad' no, khug mae na mung:- jao co: jham: yang taui" to" ra"
kyam: byu boe" na: ako".
11 Pe"mung:ga"re yao: bam wa- qam: so' bo: thao" ra"
Asang: amyin" dao: jham re tau: lhan" pye' mung:- yao" mho" shid' khyo jham rere:
ngag: ha: pye' ako".
12 Yao: bam wa mau" jam: zaui: mung:
myaung" gyi" shid: lo" na: ako".
Yao: bam gyang: lang" lo" re bao" tau: to" yu nae" byu mana genae".
13 Ailao" yao: bam wa- yao: bam: qug: khai: khug mae"
Asang re hug' yao: ako". Aimung: yao: wa- yao: bam nhag' lam: ngai: rumae" khyad' yu va".
14 Yao: wa yao: bam re- myid myo: mung: cad' no; jo; rumae" phoe' thug' yu: ra".
Yao: bam: jao co: jham rere: adau atam" phyid' pye' byid' ra".
15 Yao: bam wa Asang: mabaui mabyo, gang" tang: ra" jhid'de; myid: mathao mae- yao: bam re
Asang: yang kad' byid' ra" mug' pho: mau" jham: mathao mae jeju beim: so: byid: ca" ako".
16 Yao: wa gyid: ne kham: mo" jham re phyo' pye' mung:-
jo, to' khyaung: jham re khyug' pye' ra".
17 Damyo" wa nhag' magyang" ko:pyad' qe ngad: ako".
Yao: bam wa yao: bam: qobo jham: mathao mae- yao: bam: makhyang: mashab: ra" mathao mae dayin dayo: dae kham zo" ako".
18 Yao: bam wa zo:ve re qu" nghang: mung:-
shid nae" jhao" avako".
19 Ailao" yao: bam wa yao bam: qug: khai: khug mae" Asang re hug' yao: ke' ako".
Aimung: yao: bam: qug: khai: khug mae" khyad' yu: ra".
20 Yao wa yao: bam re yao" amyin" yang no gai byid' ra".
Aimung: yao: bam: lab khung: mae" khyad' yu: ra".
21 Yao: bam wa- Asang: mabaui mabyo; ra" jhid'de; nhag' lam" mathao mae-
yao: kad' ra" mug' pho: mau" zo" jham: mathao mae yao: re jeju beim: so: ca" ako".
22 Yao: bam wa yao: re- ngaui" xeim: jham: yang jeju beim: so: ca" ako".
Aimung: yao: bam re yao" yang kad' byid' ra" mau" alhab' re ngaui bau: ngaui lho" nghaui" caung: jham we' jeju beim: so: ca" ako".
23 Damyo" wa panglai: jham: dao mae
lha jham khyo" qho zo: qho shaug' qin: ako".
24 Yao: bam wa- panglai: jham: dao mae- Asang kad' ra"
mug' pho: mau" jham re myao: ako".
25 Yao: amyin" byid' ke' re- qam: so' thin: ra" la hug' hug' li" mung:-
bang: lhung" jham re lhau: zhung ke' ra".
26 Qid sang pho jham re myhao: ra" khyo vin: to' yu mung: no; ra" tham: kao" khyo- khyo" nhab' pye' ra".
Airu" ra" gyaug pho: khug mae sang pho kau" ra" mo, wa- byo lae" byaug: ako".
27 Yao: bam wa yhid yid mo, we' dakhyo: khyid au: thaung: mung: apyi anhaung mung: qin" ako".
Yao: bam ba: jhao: ra" pha,jhi" wa pe" akyu" mabo lo:.
28 Aimung: yao: bam wa yao: bam: qug: khai: khug mae" Asang re hug' yao: ke' ako".
Aimung: yao wa- yao: bam re yao: bam: nhag' lam: ngai: ra" qug: khai: mae" khyad' yu: ra".
29 Yao: wa la qam" hug' na: rure- jo; yo: lo" nhao mung:
bang: lhung" jham re: tae" lo" ako".
30 Yao: bam wa jo; yo: tae" lo" ra" mathao mae ngaui bau" na: ako".
Aimung: yao: wa yao: bam re yao: bam lo" nug: ra" sang pho gau: khung: khyo gug: gam taung" jhui" lo" ra".
31 Yao: bam wa Asang: jhid'de; myid: ra" mathao mae Asang re jeju beim: so: byid: ca" ako".
Yao: bam: qhid' mae" yao" yang kad' byid' ra" mug' pho: mau" jham: mathao mae jeju beim: so byid: ca" ako".
32 Yao: bam wa yao" byumyu" phaung khug mae yao: qi" qhang: ra" khyo re ta" hau" kyo: byid: ca" ako".
Aimung: au: jhaung zug: ade, qe: phaung qham mae yao: re caung:khin" byid: ca" ako".
33 Asang wa qid gyaung: mo" jham re sad za: kin" ho: lo" nhao: ra".
Aimung: qid baug: jham re jhid' tam" pye' ra".
34 Ai: mae na: ra" makhyang: mashab: ra" byu qe: mathao mae-
yao: wa myid xau gai: ra" myid gaung re xo: pyad myid gao: boe" lo" nhao: ra".
35 Yao: wa din"pyad' yo re qid tham: jham kad' pye' ra".
Aimung: kyaug' ho: jo; ra" myid gaung re yug: thug' na: ra" qid baug: gyaung: boe" lo" nhao: ra".
36 Yao: wa vae: moe; mo, re ai: jo, qo mae byaung" na: bam nhao mung:
yao: bam wa aimae na nae" vomo" te" ako".
37 Yao: bam wa yo kad' mung: sabyi khyae qho: zo" ako".
Aimung: magan: mago" phyo' yu: ako".
38 Yao: wa yao" byumyu" qere shaman" byid: mung:- yao: bam wa myid:zo: myo: sho' myhung: ako".
Yao: wa yao: bam khau: ra" gug'nyhug' jham mayeim manang" lo" nae" qhid' mae" lhaug' zaung" byid' ra".
39 Mao"So: byumyu" qere- deim" zag zo: mung: dayin dayo:
boe" ruyang jeim" lo" mung: gyoe; gyo" lo" li" genae".
40 Yao: wa yao: bam re deim" zag zo: mo, re
manug: ru qhu" byid: mung:- khyo madung: ra" din"pyad' yo mae du" lae" qin" nhao: ra".
41 Ngadqere: yao: wa myaung sho: mo, re yao: bam: dayin dayo: qug: khai: mae" khyad' yu: ra".
Aimung: yao: bam: yham byu qere nung: kyaung"- cad' kyaung" gug'nyhug' kyaung" we' dakhyo: myo" je" li" nhao: ra".
42 Din:man: mo, wa ce:rure myao mung: ngaui bau" ako".
Ngadqere: nhag' lam: kaui: ra" mo, makhyang: mashab mo, alhab' re kam" wa sae za: tae" byaug nhao: ra".
43 Pha,jhi" bo mo, wa ce:rure myid: qu" geshao:- yao: bam wa
Asang: gang" tang: ra" jhid'de; myid re myid: ca: qu" na geshao: wo".