CAUNG: KHIN" 104
Phan" Asang Re Caung:khin" Byid' Ra" Khyo
1 Nga" alo zo: we"- Asang re caung:khin" byid: wa,
O" Asang nga" Mao"So we"- nao wa khoqhi" qi" qhang: ra" i?
Nao wa kho:kham kheim: so' we' phungbao re ve; ci: ra".
2 Nao wa nao yao" gaung re bo" bao: yang nghoe' ci: ra".
Nao wa mug: khaung re zaung we' dakhyo: mug' myhung" to" ra".
3 Nao wa ni" yham re qid jham: dao mae te" to" ra".
Nao wa jham thaui: jham re ni" myao: lhin" we' dakhyo: ci mung: la: nho: daung jham: dao mae zaung: qin" ra".
4 Nao wa la hug' re ni" daui nhao lagyo: jham re" ru: ci: ra".
Lhe' cad' bao jham rere: ni" daui daui mo, we' dakhyo: ci: ra".
5 Nao wa myidgaung re yao" aqao: mae tang sho' zhaug' to" ra".
Aimung ai:ru wa khonhae" re: malab malaui: nae" ngad: ra".
6 Nao wa ai: dao mae nammugdara re mai qhang bau: qhang re" ru:
nghoe' to" ra"- aimung: bam jham re qid jham: yang nghoe' nhai" jo; ra".
7 Nao: yang qid jham re qeim lao" aijham wa phao: lo" ako".
Nao: yang hug' ke' ra" amyin" re the' gyo: gelao"- yao: bam hin hin phao: lo" ako".
8 Yao: bam wa nao kad' to: byid' ra" jo, qo bam jham mae"yug: gyo" lo" mung:
lao: khaung: jham khyo yug: gyo" lo" yang: yao: bam: qhid' mae" Asang jaung: to" ra" jo, qo khyo yug: gyo" lo" ako".
9 Ai: qid jham wa myid gaung re madam: qo" nhug' lo: genae" khyo"
nao: yang yao: bam re yao: bam khonhae" re: maqo" lai nae" ra" mug: kyo: kad' to: byid' ra".
10 Nao wa lao: khaung: jham mae qid baug: gyaung: nau" jham re
yug nhao mung: bug gaung jham: agyo: khyo" qid gyaung: mo" jham re yug: gyo" nhao: ra".
11 Aijham wa seyo: gug'nyhug' jham: qhid' mae" shaug' qid boe" byid' ra".
Ai: mae loze lae" jham yao: bam qid shab' ru gai: lo" ako".
12 Avai: ayae mae" sag' gae jham mae ngho' jham wa yao: bam: asad' sad' mung: nghaui"caung" ako".
13 Nao wa mug:gaung mae" mug: qid jham re bug gaung jham: adao mae gyo" nhao: ke' ra".
Aimung: myid gaung wa ni" shaman" jeju we' byang" jo; ra".
14 Nao wa nung: jham: qhid' mae" mhin: re yaug nhao: ra".
Aimung: xao su byu: yang qho:vo: qo" qho: nae" qhid' mae" byu zo: nae" qho:vo: gae jham re phan" to: byid' ra".
15 Aimung: xao su byu wa yao: yao: re pyo: nhao nae" qhid' mae" sabyi re we'
yao: ngaui bau" nae" qhid' mae" zhanlun xau re kad' yu: ra". Yao" gaung re qam: bo nhao nae" qhid' mae" mug re kad' yu: ra".
16 Lebanon mae" shaug' gae jham wa mug: qid laug sho' qo" ako".
Asang wa yao: qho" to" ra" sag' vo: jham re sang: na: ra".
17 Ai: mae ngho' jham asad' sad' mung: qid ngho' jham wa
qhoje; gae jham: dao mae ngho' sad' sad' ako".
18 Yo: jham wa myhao: ra" bam jham: dao mae na: ako".
Aimung: jalha: jham wa laug byo, laug qan" jham mae na: ako"
19 Nao wa lho" re- lho" khye' nghe' nae" qhid' mae" phan" to" ra".
Ba wa yao: vao nae" ayo, re ba: ra".
20 Nao wa myi" ayo, re kad' to: mung: mug: cad' yo re
seyo: gug'nyhug' alhab' thug' li" ako".
21 Khangkhyi nau" jham wa sho: khe' zo" re" kyid' na: ako".
Yao: bam wa Mao"So: yang byid' ra" zo:ve re qho zo" ako".
22 Ba thug' li" lao" yao: bam wa yao: bam: khyaung khug khyo
dam: vao lo" mung: ab' jo; ako".
23 Ailao" xao su byu qe wa su" thug' li" mung:
yao: bam: mau" zo" mae myi" thao joe" sho' mau" khao" na: ako".
24 Asang we"- nao wa myo: sho' ja: re kad' to" ra".
Nao wa aijham re khoqhi" pha,jhi" bo: khyo" kad' to" ra" i?
25 Matho' nghe' lo:sho' ra" gug'nyhug'
aqi: angai na: ra" qi" ru we' lu: ra" nammugdara jo; ra".
26 Ai: dao mae qid sang pho gau" qin" mung: nao phan" to" ra" panglai:
mao jaung: Levithan wa sab' jhi: na: ra".
27 Yao: bam alhab' wa yao: bam zo:ve o: ra" au: re
nao: yang byid: nae" rure myid: lam mung: nao re khug ngha: na: ako".
28 Nao wa yao: bam re zo:ve byid: mung: yao: bam aire zo" na: ako".
Nao: yang yao: bam re zo:ve zho: mung yao: bam zo" gyi" na: ako".
29 Nao phaug' lo" lao" yao: bam gyaug: ako". Nao byid' ra" ni" kao so' re
nao dam: yu: pye' byid: lao" yao: bam shid: lo" mung: yao: bam re phan" yu: ra" phalhug khyo dam: tug' lo" ako".
30 Ngadqere: nao: yang yao bam re kao so' byid: lao"
yao: bam wa daui: na: ako".
Nao wa myid gaung re kao so' asag' byid' ra".
31 Asang nho: phungbao wa apyad ato mae gang" tang: jo, vashao:-
Asang wa yao: kad' to" rumae ngaui bau" na vashao:
32 Yao: wa myid gaung re qu" lao" ai: myid gaung wa lab: nin" ra"-
Yao" yang bam jham re tin" ke' mung: ai: bam jham mae" myikhug' mad: thug' ke' ra".
33 Ngo wa nga" pyad geim" mae Asang re caung:khin" byid: nae".
Ngo adaui: na na wa nga" Mao"So re nghaui"caung: byid: nae".
34 Nga" nho: nghaui" caung: thoe re yao: myid: ngaui vashao:-
pe"mung:ga"re nga" ngaui bau: ngaui lho" ru wa yao: mae" joe" li" ra".
35 Qobo byu qe wa myid gaung dao mae" phyo' qheim" pye' qhug' vageshao:- Nhag' lam: kaui: ra"
makhyang: mashab mo, madaui: na lo: geshao:- nga" alo zo: we" Asang re caung:khin" byid: wa,- Asang re caung:khin" byid: ge, wo".