CAUNG: KHIN" 103
Mao"So: Jhid'de; Myid
(Davi peim: ru)
1 Nga" alo zo: we"- Asang re caung:khin" byid: wa,
Nga" gaung khyao alhab' we"- yao" gyang" lho" mang re caung:khin" byid: wa,
2 Nga" alo zo: we"- Asang re caung:khin" byid: wa,
aimung: yao: khoqhi" nhag' khyag' myid bo: rure dato" myhid' pye'.
3 Yao: wa nga" qobo alhab' re khyad' pye' byid: mung:
nga" nobug: phyo:bug: alhab' re gai byid' ra".
4 Yao: wa ngore lab khug mae" jhui" yu mung:
jhid'de; myid we' nhag' khyag' myid: yang ngore shaman" byid' ra".
5 Ngo wa maba: mao" lo" ra" zeim baung: we' dakhyo: qam: bo: jo, nae" qhid' mae" yao: wa-
nga" pyad mae gai: ra" ja: jham: yang ke' pyang" to: byid' ra".
6 Asang wa deim" zag zo" ru kham zo" na mo, shad' khyo
dao: phyid' byid: mung: yao: bam re tarha" din: nyang: ru byid' ra".
7 Yao: wa Moshe re yao" myid: yaung: to" ru qhu" byid' ra".
Aimung: Israel byumyu" qere yao" qam: so' mau" zo" re myao nhao: ra".
8 Asang wa nhag' khyag' myid we' jhid'de; myid bo yaug ngad: ra".
Nhag' lam: myan mung: mabaui mabyo; jhid'de; myid byang" jo, yaug ngad: ra".
9 Yao: wa qeim za: qeim: na: ru mangad:
apyad ato mae nhag' yo" na yaug mangad:.
10 Yao: wa ngonhaung" re ngonhaung" phau: zo: nae" man: qi" khyo" qobo dae mabyid:-
ngonhaung" shad' ra" qobo we' man: qi" ra" khyo" lage, maphaug'.
11 Mug:gaung wa myidgaung tho' myhao: ru we' dakhyo:
yao: re nga: yhe' byid: mo; dao mae yao" jhid'de; myid qi" qhang: jo; ra".
12 Ba thug' shad' wa ba vao shad' we' va" ruru:
yao: wa ngonhaung" qobo jham re ngonhaung" mae" yu: pye' byid' ra".
13 Yao: pho" wa yao: zo: qere nhag' khyag' ru we' dakhyo:
Asang wa yao: re nga: yhe' byid: mo, re nhag' khyag' byid' ra".
14 Ngonhaung" re pe" yang kad' to" rure yao: ba: ra".
Ngonhaung" wa phalhug ngad: rure yao: myid: beim" ra".
15 Ngonhaung" apyad kam" wa mhin: zo: we' dakhyo: ngad: ra".
Ngonhaung" wa seyo mae" bin: bu" re" ru: yaug: qi" li" mung:-
16 Ai: dao mae la hug' hug' lo lao"- ai wa
byaug: baui" lo" ra"- aire khag' madam: myao lo: gengad: ra".
17 Ngadqere: Asang re nga: yhe' byid: mo; qhid' mae" yao" jhid'de; myid wa apyad ato mae ngad: ra".
Yao" nho: gai: rure: byu daqae: we' daqae: ajo; jo; ra".
18 Yao" dao: thang" dao mae jhaug' zaug mo, we'
yao" amyin" dao: jham re jhaug' zaug mung: cao" na mo; dao mae jo; jo; ra".
19 Asang wa yao" zaung tao" re mug: khaung mae to" to" ra".
Yao: wa alhab' dao mae kho:kham ngad: ra".
20 Asang: amyin" dao: re phug' cao" mung: yao: ta" rure tae" gyo" ra" mo, wa-
qam: bo mung: qam: so' qi" ra" mug: lagyo: qe we"- Asang re caung:khin" byid: ge,.
21 Mug:gaung mae" kheim: so' qi" ra"mo, alhab' we"-
Asang: myid cao" ra" yao" daui daui mo, we"-
Asang re caung:khin" byid: ge,.
22 Asang eib: na: ra" jo, qo alhab' mae"
yao" gug'nyhug' alhab' mo, we"- Asang re caung:khin" byid: ge,. Nga" alo zo: we"- Asang re caung:khin" byid: wa,.