30
1 Cejham wa Yake nho: yauggai zo: Agu nho: phug' de; mungdao: jham ngad: ra".
Mao"So wa ngo we' mana- Mao"So wa ngo we' mana- ngo yao: za: sho: jhin: na:-
2 Ngo wa byu tho' mae" gug'nyhug' we'
je: dau: ra". Byu dayaug mae bo ca" ra" laba lajhao ngo mae mabo.
3 Pha,jhi" re khonhae" maqhug' mho" yu: qu"
Mao"So: khyo rere: pe" maba-
4 Mug:gaung mae" lo: ra" laba lajhao re khag' ba jhao: i? La re khag' yang yao" lo, mae qo" zhab' ci: i?
Mangad: lao" pin: cug' dacug' mae qid re khag' qo" zeim: ci: i? Mangad: lao"-
myid gaung mug: kyo: re khag' qo" kyae" to" i? Yao: khag' ngad: ra" i? Nao ba: re ta" qu" shi:-
Yao: khag' ngad: i? Yao: zo: wa khag' ngad: i?
5 Mao"So wa yao: ta" to" ra" dao:so: re cao" pyang" ra". Yao" yang gug: gam byid: nae" qho mo, re yao: wa go we' dakhyo: boe" byid' ra".
6 Yao: khonhae" mata" ra" dao: re ta" ga: nao mho lao" nao re qeim mung:- nao mhug' hab' ngad: rure yao" yang de: de: myao: thug' li" nhao nae".
Dao: Zham" Jham Gatau
7 Mao"So we"- nao re ngo mho' ra". Ngo mashid shire khyo shid' ja: qo" yu nhao la,
8 Mhug' ta" ra" khyo ngore dacao" nhao- ngore gyai re: daqo" nhao- gyai re: damyaung nhao la,- aimung: ngo zo: ca" ra" nho" za: ngore byid: la,.
9 Ngo mae ca" tho' jo,nho" qo" lao" nao re maca" lo: ga: ngo ta" li"nae". Mangad: lao" ngo myaung: na: re khug' zo: mung: nga" Mao"So re mang qeim nhao: li" nae".
10 Okaung dayaug: gaui re yao" Asang jhao" khonhae" re: dagaui: kyo:- yao: wa nao re nhang: mung: nao dae qhug' kham zo" li" nae".
11 Yao: pho" qere nhang: mung: yao: myhi" qere maba: phug' te' mo, byu damyo" na: ako".
12 Lo" thao" sho' maca' majhad' boe" na ngadqere: yao: yao" gaung re gyai gyang" san: ga: myid: yu: to: mo, byu damyo" na: ako".
13 Yao: yao" gaung re gyai gai: ga: myid: jho: yu mo, damyo" na: ako". Yao: bam: gaung re khoqhi" gai: ga: myid: jho: yu ko" laug?
14 Byu damyo" wa myaung sho: mo, we' qo ca" qug: khai: mo; dao mae nhag' makhyag' lo: gau pai: phyid' zo" ako". Yao: bam wa airu: kad' mung: vae: dug: khau: na: ako".
15 Vhe' nyug wa myiqe: zo: shid' yaug qo" ra".
Yao: shid' zo" geim" nho: mang wa- Byid: la,- ga: mang: ako". Khonhae" re: nhag' maba: shid: ru byid ja: jo; ra".
16 Aijham wa movo: mug:- zo: dau mamyhung: ra" myiqe:-
mug: qid ca" ra" myid kyaug'- maqo" se' losho' nga" ra" myi: jham ngad: ako".
17 Yao: pho" re qinug tu" pye' mung:- yao: myhi" mao" lo" re manug makhyad' kad' yaug khag' ngadqere: nangda jham: yang zo" pye' nae" man: qi" ra"- Mangad: lao" yao" myo,jid' re kano, jham: yang phaug' thad' pye' byid' ru qhug' nae" man: qi" ra".
18 Ngo maba: tho' gyo: losho' mug: pho" ru byid ja: jo; ra".
19 Aijham wa mug:gaung mae dao" lhang: qin" ra" zeim baung: dadau:-
laung: mo" baui dao mae su" qin" ra" lhao maui dadau:- panglai: dao mae
khyo qho: ye" lo" ra" qid sang pho dalam: we'- myiqe: we' yauggai shid' zo: jho" jhid'de; ru jham ngad: ra".
20 Dao:so: mazaung: ra" myhi" zang wa ceru: kad' ra". Lao shad' thao gaung yecid' pye' mung: ngo pe" mashad' va" re -ga: ta" ra".
21 Myid gaung matho' zang" ra" khyo byid ja: jo; ra".
22 Kho:kham boe" li" ra" jeim pho"- yao: nug: ra" nho" qo" zo" ra" kopyad'-
23 Nghang: myid byang" ci mung: yham qo" lo" ra" myiqe:- yao: yao"
Asang myhi" jo, qo lhad' yu: pye' ra" okaung myhi"- ngad: ako".
24 Mug: myid dao mae gaung ngai qere: matho' ta" losho' pha,jhi" bo: ra" gug'nyhug' byid ja: na: ako".
25 Aijham wa yao: bam qam: nang: qere:
zin gaung: qhid' mae" zo: shaug' ba: qaung" to" ra" phyoqug jham-
26 Qam: mabo qere: laug bam gyo: mae
yham ba: kad' laung" ra" jalha: jham.
27 Kho:kham maqo" qere: vang" vang" ba:
byaung" qin" ko" ra" khyag' phaung" jham.
28 Yao: re ni" lo, vo: mae za: re: qo"
taung" ci ngadqere: kho:kham kho"
jham mae nao qo" myao: ra" yham lhaug' jham ngad: ako".
29 Khyosu" re qu" yaung" sho' mung: ru byid ja: na: ako".
30 Aijham wa gug'nyhug' alhab' mae" qam: bo: thao" mung:
khag' rere: magyaug: ra" khang khyi jham.
31 Cad' be, jham- go" lhang" qin" ra"
qo, pho" jham we'- mung" byu qe: agaung: mae su" qin" ra" kho:kham jham ngad: ako".
32 Nao wa nhag' magyang: mung: ngad beim" ru we' makhyang: mashab: mau" re kad' thug' nae" myid: yaung: na: re dazab thang mung: amyid: qu" shi: wa,.
33 Nung: nug' re lhau: re nug' xau pe' qo" yu: ra". Su: nho re yethaung" zao" re sa: yug: li" ra". Su nhag' yo: nae" khyo: lhau: zhung" re qug: khai: qhug' li" nae".