29
1 Qobo ta" peim: byid: khao: ngo" je yang: za: nhag' lam: qao: na: re khonhae" re: madam: gai: lhag' yu losho' byo; qeim: lo" li" nae".
2 Din:man" ra" zug: ngore ceim" shid' gela,- naonhaung" re ngoyang ngaui bau" ra" mung" byu ceim" shid' nae". Makhyang: mashab: ra" zug: ngore ceim" shid' gela,- dayin dayo" ra" mung" byu qere ngo ceim" shid' nae".
3 Pha,jhi" re nao phug' te' re ni" pho" wa ni" dao mae nga: yu: li" nae". Shava myhi" mae ngaui yhung" gan: pye' ru wa atug' akhyug be; lhu" pye' ru ngad: ra".
4 Kho:kham wa tarha" nyang: ra" khyo" cao" re yao" mung"dan: qam: bo nae". Ngadqere: yao: wa ngaui reza: myid: na: re yao" mung"dan: re lhau: phyo' pye' li" nae".
5 Ni" ba nam qere mageim: mhug' khin" byid' ru wa nao yao" qhid' mae" lha" khae: ru ngad: ra".
6 Makhyang: mashab mo, wa yao: bam yao" qobo mae myi" ako". Nhag' lam: din:man: mo, kam" wa ngaui bau: mung: loe; beim: ako".
7 Byugai wa myaung mo; akho: akhang" re ba: ra". Makhyang: mashab mo, kam" wa airu" khyo jham re maba: gyo: ngad: ako".
8 Su gaje: khyo re pe" shui manho mo, wa vomo" jham re qo" lhau: zhung" ako". Pha,jhi" bo mo, wa yaug yo naekhyo: qo" kad' ako".
9 Au: naug: gai yaug: yang kopyad' re yung" shaug: re kopyad' wa qi za: qi: pye' byid: mung: kheim: co' we' zag: hug' li" nae".
10 Sa: shab' mo, wa nhag' lam: din:man: mo, re nghang" ako". Ngadqere: din:man: mo, kam" wa airu" mo; nho: kao so' re gug: gam byid' li" nae".
11 Nhag' magyang: mo, wa yao: bam: nhag' yo: myid re de: de: za: qhu" byid' ako". Ngadqere: aqhid' athao ba: myid mo, kam" wa nhag' lam: qhang mung: aire zug' ci: ako".
12 Zug: wa madang: ra" lau dao: re tae" gyo" re yao" o mae" zug: qe alhab' mhug' hab' boe" shao" li" genae".
13 Myaung yaug we' yao: re zag zo: yaug dakhyo: za: ngad: ra" khyo dalam: jo; ra". Aiwa yao: shid' yaug geim" re Asang: yang myo,jid' byid' to" ru ngad: ra".
14 Kho:kham wa myaung mo, qo" yu man" ra" akhang" re gug: gam byid: yang: ngad: re yao: wa myao" sho' qo" eib: li" nae".
15 Qobo ta" peim: ceim" shid' ru we' tarha" cao" nhao: ru wa zoshao qe: qhid' mae" gai: ra". Zoshao wa yao: o: khyo: za: ye" lo" re yao: myhi" re qho' phau: nhao: li" nae".
16 Makhyang: mashab mo, kheim: so' qo" li" re yug: mau" myo" thug' li" ra". Ngadqere: din:man" ra" mo, wa airu" mo, byid: gyo" lo" rure myao: li" genae".
17 Ni" zo: qere tarha" cao" nae" qhid' mae" mho" shid' wa,- aire nao wa khonhae" re: yao: bam: mathao mae qo" phug mung: nga: ye; li" nae". Yao: bam wa nao re khonhae" re: qho' maphau: nhao genae".
18 Mao"So: yang khyo shid' ru maqo" yu: ra" mung"dan: wa abyo asin: mung: ra". Mao"So: tarha" re cao" yaug wa ngaui lho" ra".
19 Okaung qere nhad' yang za: ta" peim" re magyo: genae". Yao: bam ba: gyo: ngadqere: matae" gyo: genae".
20 Nhag' magyang" ra" kopyad' wa mamyid: qu" lo: jhau yaug tho' mae myid: lao" khyo je: jo; ra".
21 Ni" okaung pho" qere ngai: mae" yao: o: ja:- ja: khao: ngo" byid' re daba: ba na mae nao sang: ra" jo,nho" alhab' yao" yang sang: yu: pye' li" nae".
22 Nhag' lam: lang" mo, wa qug: khai: we' myan" myo: jho" byo; ru myo: sho' re boe" nhao: ra".
23 Ngad beim" re nao byid: gyo" byaug: li" nae". Nhag' lam: khyo" yang: na: re kam" wa su: yang phug' myao" ru qhug' nae".
24 Khug' hab' nho: byin cao: wa yao" qhid' mae" magai: thao" ra" gyevo ngad: ra". Yao" yang tarha" yung" mae din:man" ru ta" re khug' hab' yaug wa qobo dae byid' ru qhug' nae". Yao: khyo" din:man" ra" dao: mata" re Mao"So: yang yao: re nhang: nae".
25 Su gaje: yang nao re pe" ga: genae" laug ga: myid: ci" ru wa sang: kho: ca" ra". Ngadqere: Asang re lam khug: na: re kam" wa nao gug' ra".
26 Yaug khao: ngo" wa mung" zug: nho: myo,nho qho: ako". Ngadqere: din:man" ra" khyo wa Asang mae" za: agai: qo" yu: ra".
27 Din:man: mo, wa makhyang: mo, re nghang: mung:- makhyang: mashab mo, wa din:man: mo, re nghang" ako".