31
Kho:kham Re Pha,jhi" Byid' Ra" Dao:
1 Cejham wa Kho:kham Lemue yao: myhi" yang yao: re ta" kyo" ra" phug' de; ra" pha,jhi" dao:jham ngad: ra".
2 Nao wa ngo akyu" mho' yang: qo" yu: ra" jhid'de; thao" ra" nga" yauggai zo: ngad: lhe"- nao re ngo pe" ta" kyo: nae" laug i?
3 Ni" qam: o: alhab' re myiqe: we' jho" zam" rumae daci: pye'- ni" ngaui alhab' re myiqe: mae dayhung" pye'- Yao: bam wa kho:kham qere phyo' qheim" pye' avako".
4 Lemue we"- Tae" gyo: wa,- Kho:kham qe wa sabyi qang: magai: shaug'- Mangad: lao" yhid magai: shaug' ngad: ra".
5 Yao: bam wa yhid shaug' lao" tarha" re to" myid' pye' mung: myaung mo, qo" yu man" ra" akho: akhang" re qu" lhaui" to" ako".
6 Yhid wa shid: lo" na mo; qhid' mae"- kaug' qhui: na mo; qhid' mae"- ngad: ra".
7 Yao: bam wa yhid shaug' mung:- yao: yao" myaung sho" ra" khyo we' nhag' lam: mapyo" rure to" myhid' pye' vageshao:.
8 Yao: bam yao" qhid' mae" maqo" ta" yu: ra" mo; qhid' mae" bota" byid: wa,- bao" thaug' yu nae" byu maqo" ra" mo, qo" yu man" ra" akho: akhang" re gug: gam byid: wa,.
9 Yao: bam: qhid' mae" bota" byid: mung: din:man" ra" tarha" agyi boe" wa,- Myaung sho: mung: qo ca" mo; akho: akhang" re gug: gam byid: wa,.
Boe" Doe; Ra" Myhi" Zang
10 Boe" doe; ra" myhi" zang dayaug qhug' nae" khoqhi" qug' i? Yao: wa laug sin" tho' je: phug' de; ra".
11 Yao" yham sang pho" wa yao" dao mae myid: lam: to" na mung: khonhae" re: mamyaung nae".
12 Yao: daui: na: ra" ayo, byang" sho'- yham sang pho" qhid' mae" magai: ru khonhae" re: makad- agai za: kad' byid' ra".
13 Yao: wa sug' khyang we' jid: mo" khyang: yang pin: qo, mung: mau" khao" na: ra".
14 Yao: wa phaga: qid sang pho jham kad' ru we' dakhyo:- va: mae" zo: shaug' re yham khyo yu: lo: ra".
15 Yao: wa mug: mabo" shi:re yab so: to" mung: yham byu qe zo: nae" zo: shaug' nyhang" ru we' okaung myhi" qere mau" pyo byid' ra".
16 Myid gaung cao" qu" mung: vai: ra". Yao: qho: qo" ra" ngaui: yang sabyi khyae qho" ra".
17 Yao: wa mau" gyai khao" yaug ngad mung:- qam: bo: ru we' gyai kyid: ra".
18 Yao: wa yao: kad' ra" lo, mau" nho: gau jho re ba mung:- mug: gyai cad' sho' mau" khao" ra".
19 Yao: yao: khyang nai: mung: yao" mai bau: yao: qo; yu: ra".
20 Yao: wa myaung sho: mung: qo ca" mo, re mabyag maqhag' lo: gae zho: gae jhaug' ra".
21 Yao" yham byu qe wa mai bau: lam qo" ve, gemung:- gyu: khyo" re yao: bam magyaug: ci" ngad: ako".
22 Yao: wa yab myhung: re qo, mung:- ne ne mung: ra" zin nyung mai bau: gai qo" ve; ra".
23 Yao" yham sang pho" wa mang qi: mung:- mung" byu qere au: she: ra" byuzang dayaug ngad: ra".
24 Yao: wa mai bau: we' phyid' cui: qo, mung: phaga: byu qere aung: byid' ra".
25 Yao: wa qam: bo: ru we' su: yang phug' myao" ru qhug' mung: joe" lo nae" ayo, qhid' mae" magaung yug ngad: ra".
26 Yao: wa nau" nhae" za: pha,jhi" dao: ta" ra".
27 Yao: wa khonhae" re: mau" khao" na mung:- yao" yham byu qe ca" ra" ja: re qu" caung byid' ra".
28 Yao: zo: qe wa yao: re phug' te' dao: ta" mung: yao" yham sang pho" wa yao: re khin" ra".
29 Myiqe: qe myo: sho' mo, wa- gai: ra" myhi" zang qe ngad: ako". Ngadqere: nao wa yao: bam alhab' tho' mae je: gai: thao" ra"- ga: khin" ra".
30 Gaung khyao yaung" ru wa lai" lo" mung: yaung" shab: ru wa baui" lo" byaug: ra". Ngadqere: Asang re phug' myao" ra" myiqe: wa phug' te' nga: yhe' byid: qhug' ang yaug ngad: ra".
31 Yao: kad' ra" mau" zo" alhab' qhid' mae" yao: re aso: kad' byid: ge,- Yao: wa yaug khao: ngo" yang phug' myao" rure qo" khae: yu nae" man: qi" ra".