28
1 Makhyang: mashab mo, wa yao: bam re khag' makhe' qere: tao" phao: ako". Ngadqere: nhag' lam: din:man: yaug kam" wa khang khyi we' dakhyo: vae" ra".
2 Mung"dan: dalam: qobo shad' re kho:kham dayaug bin dayaug do, li" genae". Au:naug: gai mung: ba: myid: ra" au: she mo, jhui" re ai: mung"dan: wa qam: bo mung: gang" tang: ra".
3 Myaung mo, re deim" zag zo" ra" zug: wa qhovo: re be; se' pye' ra" mug: we' dau: ra".
4 Tarha" re pe" shui manho re nao wa makhyang: mashab yaug: shad' bode; ra". Ngadqere: nao tarha" cao" re makhyang: mo, re gye kad' ra" yaug ngad: ra".
5 Makhyang: mashab mo, wa tarha" ga" ru pe" ngad: ru maba ngad: ako". Asang re caung:pa" mo, kam" wa airu re nyang" za: ba: gyo" ci: ako".
6 Nhag' lam: din:man: mung: myaung sho" na: ru wa jo,nho" qo" mung: nhag' lam: madangman" ra" tho' je: gai: ra".
7 Tarha" cao" ra" zolau: wa au: naug: gai yaug ngad: ra". Pe" akyu" mabo: byu qe we' zam" yaug wa yao: pho" re qho' phyo' yaug ngad: ra".
8 Su gayaug: dao mae vhan" yang: gau pai: ngaui jhid' zo" dai: ngad: re- ni" jo,nho" wa myaung mo, re nhag' khyag' yaug: lo, khyo joe" lo" li" nae".
9 Nao tarha" macao" re wa ni" akyu" mho' thoe re Mao"So: qhid' kheim: mae maca' majhad' gyo" nghang: sho' ru ngad: ra".
10 Nhag' lam: din:man: yaug re makhyang: mashab khyo" kad' sho' nao mhug' pyag' byid' re- ai: lha" re nao yao: myi" li" nae". Qobo maqo" yaug wa aphug' jhaung qhu" qo" yu: li" nae".
11 Jo,nho" qo" mo, wa yao: bam pha,jhi" bo: ga: khonhae" re: myid: ako". Ngadqere: khug qag nyan" yang byu: nhag' lam: akyang re ba: qu" nae" nyan: bo yaug wa yao: tho' je: ba: ra".
12 Byugai qe kheim: so' qo" gelao" yaug khao: ngo" ngaui bau" ako". Magai yaug eib: re kam" wa mung" byu qe phao: vho' qin" ako".
13 Ni" qobo re zug' to" re ni" pyad mae khonhae" aung doe, nae" mangad:- aijham re lhang: yu mung: zhaug' za: to" pye' wa,- aire Mao"So: yang nhag' khyag' ru nao re qhu" byid' li" nae".
14 Asang re khonhae" re: phug' cao" wa,- aire nao ngaui bau: nae". Nao nhag' lam: qao yaug ngad: re wa byo; qeim: lo" li" nae".
15 Makhyang: mashab: ra" zug: pho" qhid' kheim: mae myaung sho" ra" mo, wa qam: mabo ngad: ako". Ai: zug: pho" wa kyid' na: ra" khang khyi we' zo:ve qho: na: ra" vae re" ru: yao: bam: qhid' mae" gyaug ci" ja: ngad: ra".
16 Gai: ra" myid nyan: mabo: ra" zug: wa zug: qan ngad: li" nae". Madin: man" ra" khyo re nghang" ra" zug: kam" wa myao" sho' qo" eib: li" nae".
17 Byu se' ra" qobo qo" yaug wa yao: yao" lab khung: re qo" phyad: qhi" phyad phyad dau" na: ra". Yao: re daye: tam" pye' ge,.
18 Nhag' lam: din:man" khyo" na wa,- aire nao gug: gam nae". Nao madangman: re nao wa nyag din taung" lang" lo" li" nae".
19 Mau" khao" qam: ke' ra" yo kad' yaug wa zo: shaug' myo: sho' qo" nae"- Ayo, re mageim: to" lhai: pye' mo, wa khonhae" re: myaung sho: genae".
20 Nhag' lam: din:man: mo, wa na: dai mung: ngaui pyo" li" genae". Ngadqere: nao wa jo,nho" qo" nae" hin: re qobo dae byid' ru qhug' nae".
21 Myo, nho khyin: ru wa shad' ra". Ngadqere: tarha" agyi damyo" wa nang" thao" ra" khug vag: qo" yu nae" qhid' mae" lhao" re: dao: kho' li" genae".
22 Yao: yao" qhid' mae" za: myid: ra" mo, wa jo,nho" qo" nae" za: myid: na gemung: myaung sho" ru yao: bam jhao" joe" li" na: rure maba ko" ngad: ra".
23 Byu dayaug yaug re qobo ta" peim: wa,- Thao re wa yao: re khin" caung: byid' ra" tho' yao: je: myid: ngaui: li" nae".
24 Yao: myhi" yao: pho" mae" khug' ru wa mashad' ga: myid yaug wa khug' min" ra" khug' hab' qe tho' maje: gai ngad: ra".
25 Yao: yao" qhid' mae" za: myid: ru wa qug: khai: re za: boe" nhao: ra". Asang re lam khug: na: re kam" wa ni" qhid' mae" je: gai: ra".
26 Nao yao: myid: khyo" za: cao" ru wa nhag' magyang" ru ngad: ra". Gug: gam za: na mung: nao tho' pha,jhi" je: bo mo, mho" ra" dao: re cao" wa,
27 Myaung mo, re gae byid: wa,- aire nao khonhae" re: mamyaung nae". Myaung mo, re maqu" lo: myo, cam" ci: re byu myo: sho' nao re nhang" li" genae".
28 Magai mo, kheim: so' qo" li" gelao"- mung" byu qe phao: vho' ako". Ngadqere: yao: bam byid: gyo" byaug lao" din:man" ra" mo, dam: eib: li" genae".