27
1 Ne, mo" ba we' sin: yang: khonhae" re: daphug: ta"- ana" ayo, majoe" gyo: mae pe" boe" nae" rure nao maba ngad: ra".
2 Su gayaug: yang nao re khin" vageshao:- Bang" vo jham: yang lhao" khin" vageshao:- nao yao" gaung re naoyao: khonhae" re: dakhin" yu.
3 Ma coe we' laug zang la" ru wa nhag' magyang" ruyang boe" nhao: ra" qug: khai: we' magai: ka" ngad: ra".
4 Nhag' yo" ru wa se' da: be, khyad' qan: ruwe' byo; qeim nhao: ra" ja: ngad: ra". Ngadqere: nhung: rure we' magai: tau" ngad: ra".
5 Byu dayaug re cid cid ein: ta" peim" ru wa yao" qhid' mae" pe" mamyid byid: ga: myid: yu nhao: ra" tho' je: gai: ra".
6 Ba nam wa nao re dae no nhao qere: agai khyo" amyid byid' na: ra". Ngadqere: ni" gyevo: yang ni" lo, sin mae li" ge; re kam" wa lha" na wa,
7 Nao vae: gyi" au: re byoyhid re ha: pye' li" nae". Ngadqere: nao vae: moe' au: kam" wa kho" ra" zo:ve lhao" re: cug thoe gyo" li" nae".
8 Yao: yao" yham mae" va: khyo joe" na: jo, yaug wa asad' mae" va: khyo joe" na: ra" ngho' we' dau: ra".
9 Sheim nae pyo" ra" xau jham wa nao re ngaui bau: nhao: ra". Ngadqere: qug: khai: kam" wa ni" ngaui pyo: yaug yo myid re qeim: man" lo" nhao: ra".
10 Nao yao" ba nam we' ni" pho" nho: ba nam qere dato" myhid' pye'- nao qug: khai: qhug' ra" au: ni" mao:nhaung: re bao" yu nae" damho'- yham kyo: cao: wa- va: mae na: ra" ni" mao:nhaung: pho" tho' nao re je: qo" bao" ra".
11 Nga" zo: we"- Pha,jhi" bo wa,- aire ngo bau: nae"- nga" gaui mho yaug re tau: nae" dao: phyid ngo qo" nae".
12 Aqhid' athao ba: myid mo, wa qug: khai: joe" lo: na: rure lham: myao mung: jao" pye' genae". Mamyid: qu" yaug kam" wa ai: khyo din: za: vao ye" lo" mung: thao re naenhaung myid bo: li" nae".
13 Bang" vo dayaug: jhin xe' nae" kham" yu: ra" nhag' magyang" su qo" ra" zai daja: ja: re pakham: khyo" yu: to: nae" man: qi" ra".
14 Ni" ba nam re ne, seim no' mae" thoe qi: we' ye:au" nhug' to" ke' ru wa yao: re yenhang" ru we' dakhyo: ngad: ra".
15 Nug: khyo: nyhung: na: ra" yham sang myhi" wa mug: qu: ra" ba na mae dazo, dazo, gyo" na: ra" qid we' dau: ra".
16 Yao: re tae" lo" sho' khoru: qo" kad' nae? La hug' re nao qo" tam" nae" la? Xau dazhab' re qo" zhab' ci nae" la?
17 Jo, to' wa yao: cao: saui" tho' yu: ru we' dakhyo: byu wa yao: cao: yao: mae" jho" mho" yu: ra".
18 Pho' ham" gae re nyang" caung wa,- aire pho' ham" shi: qo" zo: nae". Yham sang re qu" caung: ra" okaung wa nga: byid' ru qhug' nae".
19 Qid mae nao yao" myo,khung: the' myao: ru we' dakhyo:- nao yao" nhag' lam: mae nao yao: khag' ngad: rure qo" myao: yu: ra".
20 Xao su byu kao bau o: byid: ru wa movo: mug: we' dau: ra". Aimae khonhae" re: jo, qo qui" jo; ra".
21 Qhang we' ngaui re myi" yang gai: phad' kyang" qu" ra". Byu dayaug: nho: lahau: qi" rure re: gai: gyo" kyang" yu: ra".
22 Kopyad' re alhaug shid sho' be, qere: yao: mae bo: ra" pyad' khyad' nhag' magyang" khyo re maqo" be; thug' pye' nae".
23 Ni" yao we' nung:- gug'nyhug' jham re gai: boe" qhi" qu" caung wa,
24 Pe"mung:ga"re jo,nho" wa khonhae" re: majo; jo, ngad: ra". Mung"dan: jham lhao" re: apyad ato magang" tang: jo, ngad: ako".
25 Khovho re yad: yu mung:- khovho kad' nae" asag' yaug: li" na: au:- to' khyid mae" mhin: jham re yad: yu wa,.
26 Nao khau: ra" yao mae" yao mug' yang mai bau: gai: qo; yu: ra". Ni" cad' be, daqhae: aung: yang: qo" ra" ngaui: yang myid gaung qo" vai: yu: ra".
27 Dang: ra" cad' be, jham wa- nao we' ni" yham byu qe: qhid' mae" we' ni" daui nhao myiqe: nau" qe: qhid' mae" du cad' be, nug' byid' li" nae".