26
1 Kopyad' re khin" ru wa zin vao kheim: mae gyu: khyo" ru we' dakhyo:- mangad: lao" byao gin re qu: ra" mug: we' dakhyo:- madau mange, ngad: ra".
2 Nhang: kheim: wa nao re zao" nae" maman: qi" re wa- nao re zao" nae" mangad:- ai: nhang: kheim: jham wa khonhae" re: mano: lo:- dao" lai: lo" ra" ngho' jham we' dau: ra".
3 Myao: re wa jang vai" yang be, ca"- loze re wa nhad' kho' taui: ke' ca". Kopyad' re wa vose" yang be, ca" ra".
4 Mangad mangung" ra" dao: myid: re phaug' tau" re nao wa mangad mangung" ru myid: yaug we' dau: ra".
5 Mangad mangung" ra" dao: myid: re mangad mangung" ra" dao: phyid byid: wa,- airu: myid' ra" yaug wa yao: myid: qhi" maqag nhaung ga" rure beim" li" nae".
6 Nao wa kopyad' re mungdao: ta" nhao: ke' ngad: re- naoyao" khyid re phyid' pye' re je: gai: ra". Nao wa qug: khai: re mho' na: ru ngad: ra".
7 Kopyad' yang dao: zham" ci: ru wa khyid qeim yaug khyosu" ru we' dau: ra".
8 Nhag' magyang: yaug re khin" byid' ru wa laug lhaui: mae laug zo: myag: te' to: byid' ru we' dau: ra".
9 Kopyad' dayaug wa pha,jhi" dao: khyo: re ci mung: nao re ta" peim" na: ru wa yhid yid yaug yao" lo, mae" zau: thung: na: ru we' dau: ra".
10 Khyo mae qhug' ra" kopyad' re okaung lhaung: ra" mau" sang wa yao: we' sin" ra" mo, yaug khao: ngo" re dae no nhao: na: ru za: ngad: ra".
11 Dalhang shad' va" rure dam: shad' ra" kopyad' wa yao: daug: to" ra" vho: dam: gaug zo" ra" lakha: we' dau: ra".
12 Nhag' magyang" thao" ra" kopyad' wa yao: yao: pha,jhi" ba: ga: myid: jho: na: ra" yaug tho' je: gai: ra".
13 Byunoe" qe wa pe"mung: yham mae" mathug' qad: laug i? Yao: bam pe" re gyaug ko" laug? Khang khyi jham re laug i?
14 Byunoe" wa yao" yab qo mae za: phaug' lhag' na: ra". Yao: wa kham: baung mae za: lhang: na: ra" kham: the: we' dau: ra".
15 Byu damyo" wa yao: bam yao" nhad' khyo zo:ve gaug zo: nae" lhao" gyai noe" ako".
16 Byu noe" wa yao: bam ta" ra" dao: jham re ngad: ga: khyag' qo" ta" pheim mo, nhad' zo: tho' je: yang: laba lajhao bo: ga: myid: li" nae".
17 Yao: we' masin" ra" myan" myo: jho" ngag: rumae yebo:bo yaug wa hau" mo" khyodang khyo ye: mung: lakha: dadau" nho: nokhye' yelao: byid: yaug we' dau: ra".
18-19 Dayaug yaug re khyonghung: jhui" nghung: mung: mageim: anghin" keim" ga: ta" yaug wa shid nhao ba: ra" shae lhae we' zojhi jhi: ra" ago we' dau: ra".
20 Myi:baui" mabo re myi: shid: lo" ra". Su: gaui mamho re myan" myo" ru jo; tae" lo" ra".
21 Myi:gyoe: wa myibaui" mae de, nhao: ra". Aqug: akhai: mau" boe" nhao mo, wa jho" ta" ngag: rure xo' boe" nhao: ra".
22 Su: gaui mho: ru wa gyai myho' ra". Aire ngonhaung" khoqhi" sho' myug: ke' nug: ra" i?
23 Yao: dang za: myid: na: ra" khyo re nyham" to: nae" qhid' mae" gyo" ngaui taung" jhau: ru wa gau xoe" ra" yae: mae bug su: cid' gai gyad: to" ru we' dau: ra".
24 Geim kad' yaug wa yao: ta" ra" nhad' cug dao: kheim: jham: nhaung thao" mae yao" nghang" ra" nhag' lam: nyham" to" ra".
25 Ai: dao: jham wa gyo" re ngad nhohab ga: qere: dalam" byid:- pe"mung:ga"re yao" nhag' lam: khug mae nghang" ra" myid to, byang" jo; ra".
26 Yao: wa yao" nghang" ra" myid re alho gai: phyaug' ra". Ngadqere: yao: kad' ra" makhyang" lo, mau" re yaug khao: ngo" myao: li" genae".
27 Su re lha" khae mo, wa yao: bam yao: aimae myi" li" genae". Myid byo; byo; nhao mo, wa yao: bam yao: re lo:nhai" khyoe' pye' ra".
28 Byu dayaug yaug re nghang" re za:- nao wa mhug' ra" dao" yang yao: re no nhao nae" ngad: ra". Madin: man" ru wa byo; qeim: rure za: boe" nhao: ra".