25
Sholamon Nho: Dao: Zham" Jham Gatau
1 Cegu: wa Yuda Kho:kham Hezekia nho: kho:kham kho" mae na ko" ra" mugsug' tung" mo; yang kai" tung" yu: to" ra" Sholamon dao: zham" gatau jham ngad: ra".
2 Mao"So re wa yao: nyham" to" ra" ja: mau" mathao mae ngonhaung" nga: yhe' byid: ra". Kho:kham re wa yao: sho' kyo" ra" ja" mau" mathao mae nga: yhe' byid' ra".
3 Kho:kham pe" myid: na: ru nao khonhae" maba byid:- yao: myid: ru wa ngonhaung" matho' myhi- mug:gaung ru: myhao mung: nammugdara tham: mo" ru: no; ra".
4 Ngaui kye' mae" magyang" shao: rure yu: pye' re- mung sa: wa ai: ngaui re yaung" gyang" xan: qo" kad' boe" ra".
5 Makhyang" ra" pha,jhi" byid: mo, re kho:kham mae" va: khyo na nhao ge,- aire yao" Asuya mang wa tarha" din: nyang: khyo" kad'- ga: hau" bam: li" genae".
6 Nao wa kho:kham qhid' kheim: re yeye; jo; re ni" gaung nao gyai akhyag yaug ru: geim dakad'.
7 Je: myhao: ra" jo, qo khyo qhui" zaung nae" qhid' mae" khai: ru qhug' ru wa ni" jo, qo re je: akhyag yaug: qhid' mae" qhui" byid: nhao qhug' ra" tho' je: gai: ra".
8 Nao the' myao: ra" daja: ja" khyo re tarha" yung" khyo ye: ta" nae" gyai dahin- ni" thao mae" sagse: wa nao ta" ru majo ga: mho: re nao khoru: kad' nae" i?
9 Ni" yham kyo: cao: we' mavang" mung: re- ni" shid' zo: za: qhug' mung: mang: gai: pye' ge,- zug' to" ra" khyo re data" thug'.
10 Airu: mangad: re nao wa zug' to: ca" rure maba: zug' yaug ga:- su: yang ceim" ba: pye' mung:- qho' mo" matho' phau: zo: nae".
11 Nyang" shab za: qo" ta" sho' kyo" ke' ra" myid aso: wa- ngaui zai mae qu" yaung" sho' te' to" ra" qhang alhab' we' dau: ra".
12 Jhaug' za: tae" gyo" yu nug: ra" yaug re aja: ja: qhug' qu" va" yaug: yang pha,jhi" byid' ra" dao: wa gai: thao" ra" qhang- mangad: lao" phug' thao" ra" laug: yang kad' ra" qhang lo, pin: jham we' dau: ra".
13 Lam ga" ra" lagyo: wa yao: re nhao: ke' ra" yaug: qhid' mae" byao gin yo, laung: ra" au: mae" qid cae: we' dau: ra".
14 Yao: bam dao:so: to: mung: khonhae" re: mabyid' ra" mo, wa mug: qid mabo: ra" jham thaui: we' la ru: ngad: ako".
15 Nhag' lam: qhang qhang za: jhui" ta" lham" yu: ru wa kyid kyid ga: qao: ra" mo, re qo" lheim" yu mung: kho:kham qere lhao" re: lam" sho' qo" kad' ra".
16 Byoyhid re ca" ra" tho' lai sho' dashaug'- Saung" shaug' re daug nhao ba: ra".
17 Ni" yham kyo: cao: jhao" dazab makyo dataung" lae" ye:- nao re phabau bau mung: jo; nghang" li" nae".
18 Mangad' khyo" qobo zhaug' ru wa shae pyang:- thaung kang- mangad: lao" ceim: ra" myo" yang qo" shid nhao: ra" qhi" qo" shid nhao: ra".
19 Lam magai: ra" byu re qug: khai: qhug' na: au:- myid: lam: ru wa zaui laui: zang: yang vo" ruru:- mangad: lao" khyid gyug' yang kaui: su" ruru: ngad: ra".
20 Nhag' ngai: na yaug re nghaui"caung: kyo" ru wa- gyo; ra" ba re bau: khyad' pye' byid' ruru:- mangad: lao" dae jad: mae xo: gyad byid' ruru: ngad: ra".
21 Ni" gyevo vae: moe' na: re zo:ve zho: wa,- yao: qid shab' na: re qid byid: jhaug' wa,.
22 Nao yao: bam re qho' phau: nhao: ruyang- Asang nao re aphug' jhaung qhu" byid' li" nae".
23 Qid meim mae" la wa mug: ce' re dang dang cilo: ru we' dakhyo:- su: gaui mho: ru wa su re dang dang nhag' yo: nhao: ra".
24 Nyhung: ra" yham sang myhi" we' daga" yham khug mae na nae" tho' yham khaung dao mae na nae" ru wa je: gai: ra".
25 Mug: va: khyo mae" joe" lo: ra" lau dao: gai wa ba laung qid shab' au: the' shaug' ra" qid cae: danhad' we' dau: ra".
26 Byugai dayaug makhyang" ra" byu dayaug: nho: myid mae cao" lo" ru wa moe: byaug va" qid thug'- mangad: lao"- khin cid' myono; bo: ra" qid thaung: we' dau: ra".
27 Byoyhid saung" shaug' ru wa ni" qhid' mae" magai ngad: ra". Ai we' dakhyo: caung: dao: saung" qho: rure: ni" qhid' mae" magai ngad: ra".
28 Ni" nhag' yo: re maqo" khang" re nao wa vang majo, mung: gyekhe' zin: laui: ra" vogaung: ru: qam: nang" ra" ru we' dau: ra".