24
19
1 Makhyang: mashab mo, re o: daqu" byid- yao: bam we' re: ba nam dakad'.
2 Yao: bam wa qug: khai: kad' thug' nae" za: myid: na: ako". Yao: bam: nhad' phung" ke' khao: ngo" dayaug yaug wa dae no qhug' ra".
20
3 Pha,jhi" we' laba lajhao: yang ug' khug' yham khaung jham re te" to" ra".
4 Pha,jhi" laba lajhao bo: ra" jo, qo mae yham khug byang" phug' de; ra" zai kug yaung" jham bo: jo; ra".
21
5 Pha,jhi" bo: ru wa qam: bo: ru tho' je: gai: ru ngad: ra". Laba lajhao wa qam: so' tho' je: akhyag: ra".
6 Ta" gelang: ein: re nao gye makhe' shimae" nyang" za: myid: yaung: qu" ca". Pha,jhi" gai je: qo" yu: re aung doe, nae" khyo je: gai: boe" ra".
22
7 Pha,jhi" dao: khyo: wa nhag' magyang: yaug: qhid' mae" saung" no, yang: maba: gyo:- akhyag: mau" jho" qham: ra" au: re yao: bam pe" maba: ta" ngad: ako".
23
8 Nao wa khonhae" re: makhyang: mashab: mau" za: myid: yaung: na: re nao wa lhau: phyo' yaug ga" ra" khyo" suhau: qi" li" nae".
9 Kopyad' myid:yaung: thug' ke' ra" mau" wa qobo za: ngad: ra". Su gaje re magai: khyo" za: lhaung" ta" yaug re su: yang ceim" nghang" ako".
24
10 Nao qug: khai: qhug' rumae qam: nang" ngad: re wa gaigai: yao: qam: nang" ru ngad: ra".
25
11 Matarha" khyo" se' pye' qhug' lo" na: ra" byu dayaug re khyad' yu nae" qhid' mae" dang dala:-
12 Nao we' pe" masin: ga: nao ta" qere: ni" nhag' lam: khug mae myid: rure Asang myao ba byid: mung:- dao: kho' na: ra". Yao: wa nao re lhaug' qu" na mung: nao re ba: ra". Aimung: nao kad' rumae cao" yang: aphug' jhaung qhu" byid' li" nae".
26
13 Nga" zo: we"- byoyhid shaug' wa,- ai wa gai: ra". Byokye' mae" byoyhid wa ni" sho mae cug: ru we' dakhyo:-
14 Pha,jhi" wa ni" alo zo" qhid' mae" gai: ru ngad: rure ba: to: wa,. Pha,jhi" re qo" yu: to: wa,- aire joe" lo nae" ni" qhid' au: mae zho: bao: jo; ra"
27
15 Nhag' lam: din: yaug mae" lhad' zo: nae" ga: myid: yaung: na: ra" makhyang: mashab mo, ru: damung- yao" yham mae" lhad' phyo' yu nug mo, ru: dakad'.
16 Nhag' lam: din: yaug wa khonho" lhang gyang: lang: ngadqere: yao: wa khonhae" re: dam: qo" to" ra". Ngadqere: byo; qeim: ru wa makhyang: mo, re phyo' qheim" pye' ra".
28
17 Ni" gyevo byo; qeim: rure thaung" qhug' gelao" daqu" bau:- yao: khyid au: thaung: mung: lang" re dangaui.
18 Nao airu: myo, jhin" khyo" qu" jung" rure Asang myao mung: maqu" o nae". Ailao" yao: re qobo dae mabyid: lo: kad' li" nae".
29
19 Makhyang: mashab mo; yang ni" myid damyo: nhao- yao: bam re o: daqu" byid
20 Makhyang: mashab yaug: qhid' mae" qhid' au: mae" khyo mabung" ngad: ra"- yao: myid: lao" nae" ru pe" majo, ngad: ra".
30
21 Nga" zo: we" Asang re gyaug phug' wa, Kho:kham rere: nga: yhe' byid: wa,- yao: shid'zo: re tau: lhan: mo, we' pe" dabo: be; baung:-
22 Airu" mo, wa khomyhao" mamyao" re byo; qeim: lo" li" genae". Mao"So we' kho:kham: yang qo" byid' ra" qug: khai: re nao qo" myid: beim" i?
Pha,jhi" Dao: Zham" Jham Gatau
23 Pha,jhi" bo mo, ceru: ga: re: lhaung" ta" ako".
Tarha" agyi wa dashad' shad' khyo de; re wa shad' ra".
24 Qobo qo" yaug re qobo maqo" ga: ta" re wa- yao: re yaug khao: ngo" yang ceim" nhang: mung: nghang" li" genae".
25 Qobo qo" yaug re qobo dae byid' ra" tarha" agyi qe kam" wa qi" qhang: li" mung: mang gai hau: byid' ru qhug' li" nae".
26 Din:man" ra" khyo" phaug' tau" ru wa ba nam gyang" ngad: rure ave, qhu" byid' ru ngad: ra".
27 Nao vae: dug: khau mau" maba: kad' shi:mung:- ni" yothaung: jham za: majin" jin" wa yham dakad'- ug' khug' date: davai".
28 Khyag' ngad: ra" khyo gaje dayaug yaug re no nhao nae" sagse: dakham:- yao: bam we' sin: yang: madang maman" ra" dao: dajhau.
29 Ce:yaug re wa yao: ngore kad' ruru: shi" yao: re kad' nae" ein: data".
30 Nhag' magyang: noe" ra" byu dayaug: yothaung: we' sabyi khyae jham khyo" ngo su" lai: lo" ra".
31 Yao" yo jham wa myo, se: byaug mung: vohau" yang se: nghoe' jo; ra". Khyae kyae" to" ra" laug zang jham re: byo; gyoe; jo; ako".
32 Aire ngo qu" yang: ai: khyo re myid mung: aimae" mho" khyo dalam: qo" zhao: yu: ra".
33 Dazab yab- dacam: yab: pyo" jo, wa,- nao nug: re- lo, pyid' thag' pye' mung: thang: na wa,-
34 Nao yab: jo; au: myaung sho" ru wa damya, we' dakhyo: phyad za: joe" li" nae".