23
6
1 Akhyag: ra" byu dayaug we' nao daga" zaung mung: zozo" na: ra" au:- yao: khag' ngad: rure ni" aung khug mae beim: wa,.
2 Nao gyai zo" myho' na: re naoyao" gaung re khang" wa,.
3 Yao: da" zho" ra" myho' nam zo: shaug' jham re myo, no, so' dakho'- yao: wa nao re pha,jhi" khyug' na: ru ngad ba: ra".
7
4 Nao yao" gaung dau: myaung" gyi" lo" sho' jo,nho" qo" khyo maphin" qho lo: pha,jhi" bo wa,.
5 Ni" ngaui wa daung de, mung: dao" phao: lo" ra" zeim baung: we' dakhyo:- myo, danyag mae za: gan: byaug ba: ra".
8
6 Byag yaug: zojaung: mae daqu" bozo:- yao: da" zho" ra" zo: shaug' myho' qere: daqhu" so' kho'.
7 Laung: zo: shi: wa,- ga: yao: ta" na ngadqere: yao" nhag' lam: mae ai: khyo: mamyid- yao" nhag' lam: mae wa yao: khoru" yaug ngad: ga: myid: na: ra".
8 Nao bin: zo: shaug' thao re alhab' dam: daug: phoe" pye' mung: yao: re nao caung:khin" byid' rure: akeim boe" byaug nae".
9
9 Kopyad' re dao: gai daye: jhau- Ni" dao: re yao: phug' mate' ngad: ra".
10
10 Kyozang xug' re khonhae" re: daqhui:- Cug' zonau" qe sang: ra" myid gaung rere: daye: ge; sang: yu.
11 Asang wa yao: bam shad' mae qam: so' bo: ra" gug: gam byid: yaug ngad: ra". Yao: wa cug' zonau" qe: mau" zo" re ta" vha byid' ra".
11
12 Ni" mho" pho" ta" ra" dao: re nyang" za: gyo" yu wa,. Nao gai: boe" qhi" zhao: yu wa,.
12
13 Zoshao re mho" shid' nae" qhid' mae" dayam" na- Ga" laug zo: vose" yang be; re yao: mashid nae".
14 Gaigai: ga" re ai: yang yao" kao so' khyad' yu: li" nae".
13
15 Nga" zo: we"- nao pha,jhi" bo: re ngo gyai ngaui bau: nae".
16 Nao pha,jhi" dao: ta" ga" re the' gyo" re ngo gyai nga: yu nae".
14
17 Qobo qo" mo, re daqu" nhung- Ni" apyad mae Asang re gyaug phug' rure akhyag to: wa,
18 Airu: ngad: re ni" qhid' au: mae khyo wa gyai yaung" nae".
15
19 Nga" zo: we"- tae" gyo: wa,- Pha,jhi" bo mung: nao kao so' daui: na: ra" khyo re nyang" za: myid: qu" wa,.
20 Yhid phai: saung" shaug' mung: zo:ve mae au: am: mo, we' dazam".
21 Yhid ya: qe we' zo" lai shaug' lai mo, wa myaung: lo" li" genae". Nao wa zo: yang: yab yang: za: kad' na: re nao wa mamyao" re mai jad: bau: jad: ve; li" nae".
16
22 Ni"pho" ta" ra" dao: re tae" gyo: wa,- yao: mana re nao byu boe" li" nae" mangad:. Ni" myhi" mao" lo" re yao: re jeju beim" ra" khyo qhu" byid: wa,.
23 Dangman" ru- pha,jhi" zhao: yu: ru- ga" ra" myid nyan:- cejham wa nao gau jho byid' ra" qhi" man: qi" mung: aung: zo: nae" lhao" magai: myid sho' phug' de; ra".
24 Din:man: yaug: yao: pho" wa gyai ngaui bau: nae" khyo jo; ra". Pha,jhi" bo: ra" yauggai zo" dao mae- nao nga: gai: yu: ra".
25 Ni" myhi"- ni" pho" re ni" mathao mae nga: yu nhao wa,- ni" myhi" re ngaui bau: nhao wa,
17
26 Nga" zo: we"- jhaug' za: tae" gyo: wa,- nga" byuna byuye, aso: re qu" yu wa,
27 Shava myhi" qe we' akyang qeim: ra" myiqe: qe wa shid pho: lha" ngad: ako".
28 Yao: bam wa damya, jham we' dakhyo: nao re lham: na mung: yauggai myo: sho' mo, re dao: thang" phyo' nhao mo, ngad: ako".
18
29-30 Yhid saung" shaug' mung: yhid sag' xo' shaug' nae" qam: ke' na yaug dayaug ngore ceim" qhu" la,- ai lao" khonhae" re: qug: khai: boe" nhao mung: khonhae" re" no: myang: na: ru we' yao" gaung yao: myid: kaug' na yaug re ngo naonhaung" re ceim" qhu" nae". Yao" myo,jid' ne ne mung:- yao: qo" gai: jao" pye' ra" ja: mae yao: yao" gaung re thaung" cad' yu: ako".
31 Aiwa- ne ne mung:- keim khug mae qhui qhui mung:- kud ein: shaug' ke' nug taung" sho' ngad: ra" yhid: yang nao re daju" phyo' nhao wa,
32 Thao: ne, kao re nao wa- daug thin: ra" lhao maui: yang thoe" to" ru we' dakhyo: kham zo" li" nae".
33 Ni" myo,jid' mae ve, ve, mung: ru myao: thug' li" mung:- nao wa nyang" za: maqo" myid- qang: qang: za: maqo" jhau nae".
34 Nao wa nammugdara dao mae myung: qin" ruru: kham zo: mung: ai: khug mae kajui: ru: laui" lhau: ra" panglai: qid sang pho we' dakhyo: apyi avhang: nhag' no nhag' lan mung nae".
35 Nao wa ngo dakhyi" khyi" the' thaung" yu vanhaung- dayaug yaug: yang ngore li" be; koe' to: vasam" ra"- ngo mabeim: lova" re- ngo pe"mung: magyang: maso: boe" va" la,- Dam: kug, shinae"- ga: ta" li" nae".