22
1 Mang gai we' jo,nho" dalam: lam: re khyin: yu ca" ngad: re mang gai lam: re khyin: yu wa,.
2 Myaung yaug we' qo" yaug dau: ru daja: wa shid' zo" geim" re Asang phan" to"- ga" ru ngad: ra".
3 Aqhid' athao ba: myid: qu" ra" mo, wa qug: khai: joe" li" na: rure myao mung: jao" pye' li" genae". Mamyid: qu" yaug kam" wa ai: khyo din: za: ye: mung: thaung" qhug' thao re naenhaung myid bo: li" nae".
4 Asang re phug' cao: wa,- nhag' lam: nyham: khyo" wa,- aire jo,nho" nga: ye; ru qo" mung: kao qhang nae".
5 Ni" kao so' re jhid'de; ngad: re wa makhyang: mo, re myhi" yu: ra" khyo thao" qang" mae" lha" jham re va: va: jao" pye' wa,
6 Zoshao re yao: cao" gai: ra" khyo mho" byid: wa,- aire yao" pyad geim" xam" ci: li" nae".
7 Myaung mo, wa qo" mo; jeim ngad: ako". Nao ngaui jhid' zo: lao" wa jhid' byid: yaug: nho: jeim ngad: ra".
8 Matarha" ra" myug: shi: sin" re byo; qeim: ru yaug: thug' li" mung:- su geje re nao deim" zag zo" ru thao" byaug nae".
9 Byag myid mabo lo: ni" zo:ve re myaung mo, we' jho" gae zo: wa, airu: kad' ruyang nao mae shaman" qo" yu nae".
10 Ngad beim: yaug re kang" thug' pye' wa,- ailao"- dao: jho" ngag: ru- jho" byo; ru jho" shad' ru majo, lo nae".
11 Nhag' lam: gyang" yaung" ru we' jhau thoe yaug yo: rure nao jhid'de; re kho:kham wa ni" ba nam boe" lo: li" nae".
12 Mhug' hab' qe: dao: re majo: ra" khyo khyo" qu" byid: mung: Asang wa dangman" ra" khyo re mabaui mabyo, sho' zam" to" rure Asang myao: ra".
13 Byunoe" wa yham mae na: jo; ra"- yao: taung gaung khyo thug' ye" re khang khyi lham: bin" li" nae"- ga: ta" ra".
14 Myi shad' lao shad' ru wa lha" ngad: ra". Asang: yang nhag' yo: qhug' mo, aimae myi" ako".
15 Zoshao qe wa mangad mangung: atug' akhyug: mau" re yao: yao: za: lhaung" ba: kad' thug' li" ako". Mho" shid' ra" vose: kam" wa yao: bam re nyang" ba genae" qhid' mae" mho" shid' byid' ra".
16 Nao jo,nho" qo" nae" qhid' mae" qo" mo, re jhaung qhu" byid:- myaung mo, re deim" zag zo: kad' ngad: re wa- nao yao: myaung sho: yaug boe" li" nae".
Pha,jhi' Dao: Khyo: Sam Xe
17 Tae" gyo: wa,- Pha,jhi" bo mo, ta" ra" dao: jham re ngo mho" kyo: li"- yao: bam: mho" shid' dao: re xeim: yu wa,
18 Aijham re nao myid: xam" ci yang: dam: qo" ta" re ngaui bau: qhug' nae".
19 Nao Asang re khug ngha: na nae" ngo myid: o: ra". Aimung: ana" nao re ai: mho" shid' ru jham re ta" kyo: nae".
20 Ngo wa ni" qhid' mae" pha,jhi" dao: khyo: sam xe tung" to: byid: va". Aijham mae laba lajhao we' gai: ra" pha,jhi" byid: dao: jham bo: ra".
21 Aijham wa nao re dangman" ra" khyo pe" ngad: ga" rure mho" shid' li" nae". Nao re airu yeqho: lo nae" nhao ko" re jo: ra" dao: phyid dam: cilo: li" nae".
1
22 Myaung mo, re aqo" aung zo" ein: dakhyoe' zo:- Tarha" yung" mae khag' yang mabao" thaug' yu mung: ye; jo, mo, re dakhyoe' zo:.
23 Asang wa ai bam: shad' mae na mung: bota" gug: gam byid' li" nae". Amung:- ai bam: kao so' re kyaug' nhin" mo; kao so' re Asang: yang kyaug' nhin" li" nae".
24 Qan: ra" nhag' yo: hab' qe we' ba nam dakad'.
25 Yao: bam: ave, re nao lag qu" yu mung: aire nao maqo" tha" pye' nae".
3
26 Su geje dayaug yaug: jhin qhid' mae" qo yu nae" ein: dao:so: dato:.
27 Nao maqo" xe' yang: ngad: re wa yao: bam wa ni" yab jaung: re lhao" li" yu pye' byid' li" genae".
4
28 Ni" phug' phyid' qe zhaug' to" ra" mug: kyo: zang xug' re khonhae" re: daqhui: wa,.
5
29 Ngo re gai: ra" mau" zaui: su dayaug qhu" byid: gela,- ailao" ngo wa byu myo: sho' tho' je: gai mung:- kho:kham qe: phaung mae bobo man" ra" yaug re qhu" byid: nae".