21
1 Asang wa qid gyaung: re khang" ru we' dakhyo: Kho:kham: nhag' lam: re laui laui za: khang" byid' ra".
2 Nao kad' ru ja: khao: ngo" mae jo va" ein: myid qere: nao myid: ra" khyo re Asang phyid' kho' na: rure beim: wa,.
3 Din:man" ru we' din: nyang: ru kad' wa,- ai wa Asang jhao" ngaui" xeim: jham ciye" ra" tho' je: yang: Asang re ngaui bau: nhao: ra".
4 Makhyang: mo; nhag' lam: wa ngad beim" ru we' phug: ra" ruyang eib: to" ra". Airu wa qobo qo" ru ngad: ra".
5 Nyang" za: myid: yaung: to: wa,- aire magan: mago" qo" li" nae".Gyai phyad: ra" khyo" kad' re- nao khonhae" re: myo: sho' qo" nae" mangad:.
6 Nao madin: maman" khyo" qo" to" ra" jo,nho" jham wa mamyao" re byaug: lo" nae". Ai mabaui" byaug shire shid zug: nhad' khyo nao re jhui" vao ye" li" nae".
7 Makhyang: mashab mo, wa yao: bam yao" aqan alan mau" yang jeim: genae". Yao: bam wa jo: rure kad' nae" ha: pye' ako".
8 Qobo qo" ra" byu qe wa kaui: ra" khyodang mae su" ako". Qobo maqo" mo, wa jo: rure kad' ako".
9 Nyhung: ra" yham sang myhi" we' daga" yham khug mae na nae" tho' yham khaungdao mae na: ru wa je: gai: ra".
10 Makhyang: mo, wa makhyang" ra" mau" re khonhae" re: moe, shab' na: ako". Yao: bam wa khag' rere: nhag' khyag' myid mabo ngad: ako".
11 Ngad beim: su dayaug qobo dae qhug' zo: lao" maba: myid: qu" yaug lhao" re: ba: qu" zhao: yu: ra". Pha,jhi" bo yaug wa yao: re mho" byid' rumae" ba: mho" yu: ra".
12 Din:man" ra" Mao"So wa makhyang: mashab yaug: yham khug mae pe" boe" na: ru myao byid: yang: yao: wa makhyang: mashab yaug re byo: sin" lo" nhao: li" nae".
13 Nao wa myaung yaug hug' yao: rure gyo" lhaui" pye' re nao yao: hug' yao: ra" au: khag' magyo: byid: genae".
14 Dayaug yaug nao re nhag' yo" re sab za: yheim: byid' ra" jhaung qhu" wa yao: re nhag' yo: gyo" nhao: li" nae".
15 Din:man" ra" tarha" khyo" kad' ke' re byugai qe bau" ako". Ngadqere: makhyang: mo, kam" wa nhag' lam: thao" ako".
16 Ba: myid: kho' rumae" va" lo" ra" yaug khag' ngadqere: shid: li" nae"
17 Pyo: khyo qho: ru yhid shaug' vho:zo: kad' mung: zo:ve myho' reza: au: am" re wa nao khonhae" re: jo,nho" qo" li" nae" mangad:.
18 Makhyang: mo, wa byugai qere ga: yao: bam kad' ra" qug: khai: khyo mae yao: bam yao: phau: zo" li" genae".
19 Angag zang nug: khyo: nyhung: na: ra" myiqe: we' daga" na nae" tho' din"pyad' yo mae yena: re je: gai: ra".
20 Pha,jhi" bo mo, jo,nho" dao mae langa: khyo" myan myan na ngadqere: nhag' magyang" mo, wa yao: bam qo" ra" ngaui qhang re ai qo" ai yhung" pye' ako".
21 Nhag' khyag' myid bo mung: nhag' lam: zaung" zaung" za: na wa,- aire nao kao qhang nae". Su gaje: yang nao re phug' myao: mung:- tarha" din: nyang" ra" khyo" zam" khug: li" genae".
22 Qag: ra" gyezug: mo" wa qam: bo mo; yang gug: gam: to" ra" vomo" re qo" zin" aung mung: yao: bam ngha: na: ra" vang jham re qo" phyo' pye' ra".
23 Nao qug: khai: re jao" pye' nug: re nao pe" ta" rure lha" yang: jhau wa,.
24 Ngo re ngad beim: byu dayaug ceim" shid' gela,- aire nhag' lam: myhao: ru- phug: ru we' maba: myid: qu" ra" byu dayaug re ngo naonhaung" re ceim" shid' nae".
25 Mau" manug: khao" ra" byunoe" wa yao: yao" gaung re se' na: ruza: ngad: ra".
26 Yao: bam wa yao: bam qo" yu nug: ru za: myid: na: ako". Din:man: mo, kam" wa qo" byid: mung: mabyag lo: gae byid' ako".
27 Makhyang: mashab yaug: ngaui" xeim:- nhag' lam: mae magai: ru myid yang: ngaui" byid' ra" ngaui" xeim: re Asang je yang: nghang" ra".
28 Mhug' hab' ta" ra" sagse: dao: re khag' malam". Boe" ra" khyo jham re nyang" za: ba: myid: tau" qu" yaug: dao: jham re kam" wa lam: ako".
29 Din:man" ra" mo, wa yao: bam yao" khyo re khyag' myid: lam: ci: ako". Makhyang: mashab mo, wa gai: boe" qhi" geim kad' ca" ako".
30 Asang nao re gye kad' re xao su byu: nho: pha,jhi" nyan: kung: ru- khug qag nyan: wa- nao re pe" re: maqo" bao" genae".
31 Nao wa gyekhe' poe qhid' mae" myao: jham re qo" nyhang" seim" to" ra". Ngadqere: aung doe, nhao yaug wa Asang ngad: ra".