15
1 Nau" nhae" za: tau" ra" dao: wa- nhag' yo: gyo" nhao: ra". Dao: thin wa nhag' yo: re je: lhau: zhung" ke' ra".
2 Pha,jhi" bo mo, jhau: ke' re- laba lajhao re gyo" ngaui sho' ba: ta" ako". Nhag' magyang: mo, ta" ra" dao: wa pe" lajheim: mathug' ngad: ra".
3 Asang wa khai: mae pe"mung: ru alhab' re myao: ra". Ngonhaung" agai kad' kad' aqeim kad' kad' yao: lhaug' qu" na: ra".
4 Nhag' khyag' taung" ta" ra" dao: jham wa kao so' byid' ra". Anghang: athin zang ta" ra" dao: jham wa nhag' lam: re khyoe' pye' byid' ra".
5 Ni" pho" mho" byid' ra" khyo re to" pye' ru wa nhag' magyang" ra" mau" ngad: ra". Yao: mho" shid' rure khae: yu: re wa pha,jhi" bo: ru ngad: ra".
6 Din:man: mo, wa yao: bam yao" jo,nho" re zam" ci: ako". Nhag' magyang: mo, kam" wa qug: khai: yo, re yao: bam: yao" jo,nho" re seim" pye' ako".
7 Laba lajhao re nhag' magyang" ra" mo; yang pyo: ke' ru mangad:. Pha,jhi" bo mo; yang pyo: ke' ru ngad: ra".
8 Byugai qe akyu" mho' re Asang gyo" ngaui: ra"- makhyang: mashab mo, cili" ra" ngaui" xeim: re kam" wa nghang" ra".
9 Asang wa makhyang: mashab mo; khyo re nghang" ra". Jo: ru kad' mo; khyo re kam" wa yao: jhid'de; ra".
10 Nao shad' ru ngad: re wa xo sho' qobo dae byid' ru qhug' li" nae". Naoyao" gaung re malai: nhao re wa shid: li" nae".
11 Movo: mug: lhao" re: yao" khug mae bo: ra" ja: re Asang maba lo: maqo" nyham" to: re xao su byu wa yao: myid: ra" khyo re Mao"So maba losho' khoru: qo" nyham: nae" i?
12 Ngad beim: mo, wa yao: bam re mho" shid' peim" rure manug: gyo: ngad: ako". Yao: bam wa pha,jhi" je: ba mo, re khonhae" re: pha,jhi" mamho' ngad: ako".
13 Xao su byu qe ngaui bau" re qisam: su mung: ako". Nhag' kaug' re kam" wa myo, nho sham: ako".
14 Au: naug: gai mo, wa mho" zhao: yu nug: ako". Nhag' magyang: mo, kam" wa pe" maba: rumae nhag' dag: na: ako".
15 Myaung yaug: apyad wa khonhae" re: phin" khao" na ca" ra". Ngaui bau: mo, kam" wa khonhae" re: pyo: pyo: za: ba: na: ako".
16 Asang re gyaug phug' na yang: myaung: ru wa- jo,nho' qo" mung: qug: khai: qhug' ra" tho' je: gai: ra".
17 Yao: yao: jhid'de; ra" mo, we' daga" ao: pho' zoxeim: qhan: zo" ra" ru wa jho" nghang" ra" jo, qo mae myho' thao" sho: zoxeim: gai zo: nae" rutho' je: gai: ra".
18 Nhag' lam: lang" re myan" myo: thug' ra". Nhag' lam: qhang: re kam" wa ngaui pyo: yaug yo: ru boe" nhao: ra".
19 Nao noe" re khai: joe" joe" qug: khai: qhug' nae". Nao nhag' lam: zaung" re kam" wa qhug: khai: maqhug' nae".
20 Pha,jhi" bo: ra" yauggai zo: wa yao: pho" re ngaui bau: nhao: ra". Nhag' magyang: yaug za:- yao: myhi" re maphug' makhyad' kad' ra".
21 Nhag' magyang" byu qe wa yao: bam yao" pe" maba: ra" khyo mae ngaui bau" na: ako". Pha,jhi" bo mo, kam" wa jo: ra" khyo cao" li" genae".
22 Nao gai: qo" ra" pha,jhi" byid: dao: alhab' re khae: yu wa,- aire nao aung doe; li" nae". Airu re makhae: yu re nao jeim: nae".
23 Ayo, akhyin: we' dau: ra" dao: re ba: jhau: ru wa khoqhi" ngaui bau: gai: ra" i?
24 Pha,jhi" bo: ra" mo, wa kao so' qo" ra" khyodang mae su" do, lo" ako". Shid: ra" khyodang mae masu" gyo" lo" ngad: ako".
25 Asang wa ngad beim: mo; yham re phyo' sin" pye' byid' li" nae". Cug' mo" myhi" qo" ra" jo,nho" re kam" wa yao: gug: gam byid' li" nae".
26 Asang wa makhyang: mashab: khyo" myid: rure nghang" ra". Jhid' de, nhag' khyag' ra" dao: re yao: gyo" ngaui: ra".
27 Majo maang: ra" khyo" myad khyo qho: re- ni" yham byu qere qug: khai: jhui" qhug' li" nae". Khug vag: dayu zo:- aire nao kao qhang nae".
28 Byugai qe wa maphaug' tau: shire myid: qu" ako". Makhyang: mashab mo; akyu" mho' dao: wa phyad ga: phaug' tau: mung: qug: khai: zai" thug' ako".
29 Byugai qe akyu" mho' re Asang tae" gyo: byid' ra". Makhyang: mashab mo; akyu" mho' dao: re kam" wa yao: magyo: byid: ngad: ra".
30 Qisam: su myo, nho jham wa nao re ngaui bau: nhao: ra". Lau dao: gai wa nao re gyo" ngaui nhao: ra".
31 Nao re mho" shid' ra" au: khae: yu: re nao pha,jhi" bo: ra". Zhao: yu nae" ha: pye' re wa- naoyao" gaung re nao yao: no nhao: ru ngad: ra".
32 Mho" shid' ra" dao: re khae: yu: re nao je: pha,jhi" bo: lo nae".
33 Asang re gyaug phug' ru wa pha,jhi" daja: ngad: ra". Nga: yhe' ru maqo" khae: yu shire sao qhid' nao nhag'lam: nyham: khyo" ca" ra".