14
1 Myiqe: qenho: pha,jhi" yang ug' khug' dinkhu: ga: ru boe" li" ra". Ngadqere: nhag' magyang" ra" mau" yang ug' khug' dinkhu: phyo' qheim" pye' ra".
2 Nhag' lam: din: din: za: na wa,- ai re wa Asang re gyaug phug' ru ngad va". Madin: man" khyo" na: re wa Mao"So re magyaug phug' khyo" ang: ra".
3 Nhag' magyang: mung: kopyad' ngad beim" re dao: gyai jhau: ra". Pha,jhi" bo yaug; dao: jham wa yao: bam re gug: gam byid' ra".
4 Yothaung: phaug' nae" qhid' mae" nung: jaung lo: mana re gaug jhi akeim ngad: ra". Aijham na: re gaug jhi byang" li" nae".
5 Lam ga" ra" sagse: wa khonhae" re: dangman" ra" dao: ta" ra". Lam maga" ra" sagse: kam" wa mhug' dao: za: ta" ra".
6 Ngad beim: mo, wa pha,jhi" khonhae" mabo genae". Au: naug: gai mo, kam" wa laui laui za: zhao: ba: yu: ako".
7 Nhag' magyang: kopyad' qemae" va: va: mae na wa,- nao re mho" byid: nae" yao: bam pe" maqo" ngad: ako".
8 Boe" doe, yaug wa pe"mung: pha,jhi" ba: laug i? Yao: wa pe" kad' nae" ga" ru ba yang: ngad: ra". Nhag' magyang" kopyad' wa pe"mung: nhag' gyang" laug i? Yao: ba: rure za: myid: na yang: ngad: ra".
9 Nhag' magyang: kopyad' qe wa qobo kad' nae" pe" maci" ngad: ako". Byugai qe kam" wa qobo khyad' byid: nae" o: ako".
10 Ni" ngaui bau" ru wa nao yao" qhid' mae"- nao kaug' qhui: ru wa nao yao" qhid' mae" ngad: ra". Aijham mae khag' maqo" bobo ngad: ako".
11 Makhyang: mashab yaug: yham re phyo' sin" pye' thao re byugai yaug: yham wa ajo; jo, shinae" ngad: ra".
12 Nao jo: ga: myid: jho: ra" khyo wa shid: ru khyo joe" ba: ra".
13 Qisam: su: ru khug mae kaug' qhui: ru gai: vho' jo, ba: ra". Ngaui bau" ra" khyo gan lao"- kaug' qhui: ru khonhae" re: jo; ra".
14 Magai: ra" mo, wa yao: bam we' man: qi" ru qo" yu genae"- Byugai qe wa yao: bam kad' ra" mau" zo" mathao mae aphug' jhaung qhu" qo" yu: li" genae".
15 Nhag' magyang" ra" kopyad' wa pe" re ngadqere: lam" li" nae". Aqhid' athao ba: myid: ra" mo, wa yao: bam yao" khubyae re qu" lha" ako".
16 Ba: myid: ra" pha,jhi" ba mo, wa qug: khai: mae" va: va: mae na: ako". Nhag' magyang: mo, kam" wa pe" mamyid: qu" lo: hinso: ladan kad' ako".
17 Nhag' lam: lang" mo, wa mangad mangung: mau" jham re kad' ako". Je: pha,jhi" ba mo, kam" wa sae za: tae" to" ako".
18 Maba mabeim: mo, wa yao: bam yao" nhag' magyang" ra" aphug' we' man: qi" ru qo" yu: ako". Boe" doe, mo, kam" wa pha,jhi" laba lajhao jhaung qhu" qo" yu: ako".
19 Makhyang: mashab mo, wa din:man: mo; qhid' kheim: mae goe; gyo" ca" li" genae". Amung: yao: bam: nhag' lam: khyo" yang: mho' yao ca" li" genae".
20 Myaung yaug re wa yao: yao" yham kyo: cao" yang: lhao" mangaui ngad: ra". Jo,nho" qo" yaug kam" wa ba nam gyai qo" ra".
21 Nao ngaui bau: nug: re myaung mo, re nhag' khyag' wa,- Khag' rere: maphug' makhyad' kad' ru wa qobo ngad: ra".
22 Nao gai: ra" mau" zaui" ngad: re wa su gayaug: yang myid: lam: ru we' phug' myao" ru qhug' li" nae". Nao makhyang" ra" mau" kad' re wa nao shad' mau" kad' na: ra".
23 Mau" khao" re zo: shaug' qo" nae". Mageim: na yang: jhau za: jhau: na: re myaung sho: nae".
24 Pha,jhi" bo mo, wa jo,nho" jhaung qhu" byid' ru qhug' nae". Nhag' magyang: kopyad' qere kam" wa yao: bam yao" pyad' khyad' lo, mau" mae ba: qu" ra".
25 Sagse: wa dangman" ru ta" re kao so' qo" khyad' byid' ra". Yao: mhug' ta" lao" wa su re gye tug' kad' ru ngad: ra".
26 Asang re gyaug phug' ra" khyo wa byu dayaug re yao: we' yao" ug' khug' dinkhu: byu nhag' dag: ru we' gug: gam: ru qo" yu nhao: ra".
27 Shid: rure nao jao" pye' nug: i? Asang re gyaug phug' ru wa kao so' qid thug' ngad: ra".
28 Kho:kham dayaug qi" qhang: ra" khyo wa yao" mang: byu khonho" re eib: ga" rumae ngha: ra". Mang: byu maqo" re yao: wa pe" mangad: ngad: ra".
29 Sae za: tae" jo; re nao pha,jhi" bo: ra". Ngadqere: nhag' lam: lang" re wa nao khonho" nhag' magyang: ga" rure za: qhu" byid' ra".
30 Nhag' lam: cae: tae" ru wa gaung dau: re qao" zin" nhao: ra". Nhung: ra" nhag' lam: kam" wa maung we' dakhyo: ngad: ra".
31 Myaung mo, re zag zo" re wa yao: bam re phan" to" ra" Mao"So re roe" ru ngad: ra". Ngadqere: myaung mo, re nhag' khyag' myid qhu" byid' ru wa caung:pa" ra" mau" daja: ngad: ra".
32 Makhyang: mashab: byu qe wa yao: bam yao: kad' ra" makhyang" mau" yang jeim" lo" ako". Ngadqere: byugai qe wa yao: bam yao" gyang" yaung" byuna byuye; yang gug: gam byid: qhug' ako".
33 Pha,jhi" wa au: naug: gai mo, myid: qu" ra" mau" khao: ngo" mae bo: ra". Nhag' magyang: kopyad' qe wa pha,jhi" pe" ngad: ga" rure maba ngad: ako".
34 Din:man" ra" khyo wa mung"dan: re qi" qhang nhao: ra". Qobo wa khomung" dan: qhid' mae" ngadqere: nga: yeim nhao: ra".
35 Kho:kham jham wa boe" doe; ra" mung" zug: qe: dao mae ngaui lho" na: ako". Mau" maaung: ra" mung" zug: qere kam" wa yao: bam qobo dae byid' ako".