16
1 Ngonhaung" myid: yaung: to: qere: lo" thao" dao: phyid' yaug wa Mao"So ngad: ra".
2 Nao kad' rure nao jo va" ein: myid qere: Asang wa ni" nhag' lam: khug mae myid: rure phyid' kho' byid' ra".
3 Nao yaung: to" ra" mau" zo" mae shaman" byid: nae" qhid' mae" Asang re mho'wa,- aire nao kad' rumae aung doe; li" nae".
4 Asang kad' ra" mau" ja: khao: ngo" mae khyothao" jo; ra". Makhyang: mashab mo; nho: thao re wa byo; qeim: lo" ru ngad: ra".
5 Asang wa ngad beim: mo, re nghang" ra". Yao: bam re qobo dae byid' rumae" khonhae" re: maloe, nhao nae".
6 Vintang: jhaug' zaug za: na wa,- aire Mao"So wa ni" qobo re khyad' pye' byid: nae". Asang: mho dao: gyo: yang: na wa,- aire makhyang" ru nao pe" maphau: nae".
7 Asang nao re ngaui nhao: re- ni" gyevo qere ba nam qo" kad' yu nae".
8 Mangad maang: ra" khyo" vao ngaui myo: sho' qo" yu nae" tho'- din:man" ra" khyo" dajhid' za: qo" yu: ru wa je: gai: ra".
9 Ni mau" zo" jham re nao kyae: to: qere: Mao"So wa ni" lo, mau" re khyo shid' byid' ra".
10 Kho:kham wa Mao"So byid' ra" kheim: so' yang jhau: ra". Yao: myid: phyid' ke' ru wa khonhae" re: jo: ra".
11 Asang wa din:man" ra" jao laug: jham we' jo, lag jham re o: ra". Aimung: aung: zo: aung: shaug' mau" alhab' mae tarha" din: nyang: ra" khyo re o: ra".
12 Kho:kham qe wa makhyang: mashab: rure maqo" zang: ngad: ako". Pe"mung:ga"re tarha" nyang: ra" khyo wa Asuya re qam: boe" nhao: ra".
13 Kho:kham wa dangman" ra" dao: re gyo: nug: ra". Aimung: dangman" ra" dao: ta" mo, re myo, nho byid' li" nae".
14 Pha,jhi" bo yaug wa Kho:kham myid pyo: sho' qam: ke' li" nae". Kho:kham nhag' jam: yo" li" re dayaug yaug shid ca" li" nae".
15 Kho:kham: yang myo, nho byid' ru wa zin vao kheim: mae" mug: qu byid' ra" jham thaui: we' dau: ra". Aimae kao so' bo: ra".
16 Qhang we' ngaui qo" yu nae" tho' mae pha,jhi" we' laba lajhao qo" yu: ru wa je: gai: ra"-. Je yang: myo: sho' gai: ra".
17 Gai: ra" byu qe wa makhyang: mashab: ra" khyo re jao" pye' yang: su" ako". Aimung: nao khai: ye" lo" rure nyang" qu" wa,- aire ni" kao so' qo" khyad' yu: li" nae".
18 Ngad beim" myid wa byo; qeim: ra" khyo joe" ra". Nhag' lam: khonho nho mung: kad' re byid: gyo" ra".
19 Ngad beim: mung: nhag' lam: khonho nho kad' mo, mae" dayaug boe" mung:- yao: bam: lhad' yu: ra" lanyab bogae zo: nae" tho' mae nhag' lam: khyo" yang: myaung sho" na: ru wa je: gai: ra".
20 Nao re mho" shid' ra" khyo re nyang" za: gyo" yu wa,- aire nao aung doe; li" nae". Asang re lam khug: na wa, aire nao ngaui bau: nae".
21 Pha,jhi" bo mung: zoqao" ngad yaug wa yao" ba: gyo" ruyang mang qi: nhao: ra". Yao: dao: je: pyo" re je: su re qo" ngaug: yu: ra".
22 Pha,jhi" wa pha,jhi" bo yaug: qhid' mae" kao so' qid thug' ngad: ra". Ngadqere: nhag' magyang" byu qere phin" mho" byid' ra" yaug wa ayo, zai" kan" ru ngad: ra".
23 Au: naug: gai mo, wa majhau: thug' ke' shire myid: qu" ako". Airu: myid: qu" mung: jhau: re je: qo" ngaug: yu: ra".
24 Nhag' khyag' ra" dao: jham wa byoyhid re" ru: cug mung: ni" gaung dau: qao" zin" khyo qhid' mae" akyu" bo: ra".
25 Nao jo: ga: myid: jho: ra" khyo wa shid: ru khyo maba la, gai: joe" ba: ra".
26 Mau" khao" zaui: zo: yaug: nhad' myho' ru wa- yao: re mau" je: khao" nhao: ra". Pe"mung:ga"re yao: wa vae: moe' rure nhag' dag nhao ca" yang: ngad: ra".
27 Makhyang: mashab mo, wa su re no nhao nae" khyo za: qho: na: ako". Yao: bam ta" ra" dao: jham lhao" re:- nga" laung: na: ra" myi: we' dau: ra".
28 Makhyang: mashab mo; yang gaui mho: rure ta" pyo: ke' ako". Yao: bam wa qug: khai: re lhau: thug' mung: ba nam qere byo; gao" lo" nhao: ra".
29 Abe, akhyad' kad' mo, wa yao: bam: ba nam qere mhug' zo: mung: yao: bam re qeim: ru khyo joe" nhao: ako".
30 Nao re nhad'cag' mung: myo, nyag nyag: qhu" mo, re lha" wa,- Yao: bam wa makhyang" ru daja: ja: myid: ci: ako".
31 Kao so' qhang: ru: wa din:man" ra" yaug: qhid' mae" aphug' jhaung qhu" ngad: ra". Au: phyu: ru wa nga: qo" ra" ba maug: ngad: ra".
32 Qam: so' qi: nae" tho' mae" nhag' lam: qhang: ru wa je: gai: ra". Vomo" jham re qo" khe' aung: yu nae" tho' mae" nao yao" gaung re qo" khang" ru je: gai: ra".
33 Xao su byu qe wa Mao"So myid o: ra" khyo ba nae" qhid' mae" pha" be; ako". Ngadqere: dao: phyid re myid: phyid' ru wa Mao"So yao: yao: ngad: ra".