13
1 Pha,jhi" bo: ra" yauggai zo: wa yao: pho" mho" shid' peim" au: re nyang" za: gyo" yu: ra". Ngad beim: yaug kam"wa yao: shad' rure khonhae" re: makhae: yu ngad: ra".
2 Byugai qe wa yao: bam ta" ra" dao: kheim: mae cao" yang: aphug' jhaung qhu" qo" yu: li" genae". Mhug' pyag' mo, kam" wa abe, akhyad' ruza: qho: na: ako".
3 Nao pe" ta" rure nyang" za: lha" na mung: ni" kao so' re gug: gam za: zam" ci wa,- Mamyid: qu" lo: mageim: jhau yaug wa yao: yao" gaung re phyo' qheim" pye' ra".
4 Byunoe" wa daja: ja: re yao: khonho" o ngadqere: yao: o: ru khonhae" re: qo" yu nae" mangad:- Mau" phin" zaui: yaug wa yao: o: ru alhab' qo" yu: li" nae".
5 Din:man" ra" mo, wa mhug' dao: re nghang" ako". Makhyang: mashab mo, ta" ra" dao: kam" wa aqho' aqhid we' myo, nho nga: gyoe, khyo ngad: ra".
6 Din:man" ra" khyo wa qobo maqo" yaug re gug: gam byid' ra". Makhyang: mashab: khyo wa qobo byu qenho: byid: gyo" jeim" lo" khyo ngad: ra".
7 Byu damyo" wa jo,nho" qo" geim kad' mhug' qere: pe" maqo" ngad: ako". Gaje damyo" wa myaung geim kad' qere: gyai qo" ako".
8 Jo,nho" qo" yaug wa yao: yao" kao so' re khyad' yu nae" qhid' mae" yao: qo" ra" ngaui re ci ca" ra". Ngadqere: myaung yaug re khag' mali" kyaug' zo: ngad: ako".
9 Din:man" ra" mo, wa bao: na: ra" bo" bao ngad: ako". Makhyang: mashab mo, kam" wa de; shid: lo" na: ra" myikaug' we' dau: ako".
10 Ngad beim" ra" nhag' lam: wa qug: khai: za: thug' nhao: ra". Pha,jhi" mho" ru wa pha,jhi" je: bo: ru ngad: ra".
11 Jo,nho" re laui laui je: qo" yu: re je:- airu: yao: phyad phyad byaug: lo" ra". Aire je: qug' ra" khyo" qho: yu: re nao jo,nho" je: gai: qo" yu nae".
12 Myid: lao" khyo re phyo' qheim" pye' lao"- nhag' lam: byo; qeim: lo" nae". Myid: kao bau: ru boe" lo: re kam" wa nao mae ngaui bau: ngaui lho" ru byang" lo nae".
13 Gai: ra" pha,jhi" byid: dao: re nao ha: pye' re wa qug: khai: mho' na: ru ngad: ra". Aire cao" re gug: gug: za: qo" na: ra".
14 Pha,jhi" bo mo, mho" shid' ra" dao: jham wa kao so' qid ngad: ra". Aijham wa ni" kao so' ci" ca" au: re bao" thaug' byid' li" genae".
15 Au: naug: gai: ru wa su: yang phug' myao" ru qhug' nae". Pe" magai: lam: ra" mo, kam" wa byo; qeim: lo" ra" hau" mo" khyo mae ye" lo" na: ako".
16 Aqhid' athao ba: myid mo, wa makad' shire khonhae" re: myid: qu" ako". Nhag' magyang: mo, kam" wa yao: bam pe" maba: rure hau" kyo" ako".
17 Lam maga" ra" lagyo: qe wa qug: khai: boe" nhao: ako". Lam ga" ra" mo, kam" wa ngaui pyo: yaug yo: ru boe" lo nhao: ako".
18 Mazhao: yu: ra" yaug wa myaung sho" ru we' myo, nho sham: ru qhug' li" nae". Mho" shid'rure tae" gyo" ra" yaug khag' ngadqere: phug' myao" ru qhug' li" nae".
19 Nao o: ru qo" yu: re khoqhi" za: gai: ra" i? Nhag' magyang" byu qe wa makhyang: mashab: khyo mae" lhang: lo nae" maqad ngad: ako".
20 Pha,jhi" bo mo, we' zam" re nao pha,jhi" bo: li" nae". Nhag' magyang: mo, we' zam" re nao byo; qeim: lo" li" nae".
21 Qobo byu qe khai: lo" lo" qug: khai: cao" lhau: ra". Din:man: mo, kam" wa aphug' jhaung qhu" gai jham byid' ru qhug' li" genae".
22 Byugai wa yao" myid:zo: qere byid' to: co' nae" jo,nho" qo" ra". Qobo byu qo" ra" jo,nho" kam" wa din:man: mo, qo" yu: pye' li" genae".
23 Qhovo: maqho" ra" myid gaung wa myaung mo, qhid' mae" zo: shaug' myo: sho' gai: qho" thug' byid' ra". Madangman" ra" yaug wa ai: myid gaung re qhovo: maqo" qho: naekhyo: kad' jhid' ra".
24 Ni" zo: qere qobo dae mabyid: re wa yao: bam re nao majhid'de; ru ngad: ra". Yao: bam re nao jhid'de; re wa mho" shid' byid' li" nae".
25 Din:man: yaug wa zo: shaug' gyai qo" ra". Makhyang: mashab mo, kam" wa khonhae" re: moe, shab' ru qhug' ako".