12
1 Pha,jhi" laba lajhao re jhid'de; yaug khag' ngadqere: yao: shad' ru ta" peim: nae" o: ra". Mho" shid' peim" rure nghang" ra" yaug wa nhag' magyang: ngad: ra".
2 Asang wa byugai qere qu" ngaui: ra". Mangad mangung" ru kad' nae" yaung: ra" mo, re kam" wa dao: phyid' ra".
3 Makhyang: mashab: ra" mau" wa maqo" gug: gam byid:- Din:man" ra" byu qe kam" wa tang za: qo" ye; jo; ako".
4 Gai: ra" yham sang myhi" wa yham sang pho" nga: yu khyo we' ngaui bau: khyo ngad: ra". Ngadqere: yao: yao" yham sang pho" re qho' phau: nhao: ra" yham sang myhi" wa shoqug: mae boe" ra" maung we' dau: ra".
5 Nhag' lam: zaung" ra" byu qe wa myo,nho makhyin lo: ba: zam" khug: ako". Makhyang: yaug wa nao re mhug' zo: nae" ga: myid: ra".
6 Makhyang: mo, ta" ra" dao: jham wa byu se' khyo ngad: ra". Ngadqere: din:man: mo; dao: wa kyaug' tin" qhug' ra" mo, re khyad' yu: ra".
7 Makhyang: mo, wa yao: bam yao" byid: gyo" khyo qhug' mung: yao: zo: yao: dau madang ngad: ako". Din:man: mo; yham byu qe kam" wa xo' na: ye" lo" ako".
8 Nao au: naug: gai: re caung: byid' ru qhug' nae". Nao nhag' magyang: re kam" wa su: yang ceim" qu" ngai: li" genae".
9 Yu" yu" byu khyo" na mung: yao: yao" vae: dug: khau yaug wa byuqi: kad' mung: vae: moe; qhug' nae" tho' je: gai: ra".
10 Byugai wa yao" gug'nyhug' jham re nyang" za: gun caung: ra". Makhyang: mo, kam" wa yao: yao" gug'nyhug' re abe, akhyad' kad' ako".
11 Mau" phin" khao" ra" yo kad' zo: yaug wa zo: shaug' magan: mago" qo" ra". Nhag' magyang: yaug kam" wa pe" akyu" mabo: ra" mau" mae ayo, kan" pye' ra".
12 Makhyang: mashab mo, wa magai: ra" mau" kad' nae" za: qho: na: ako". Din:man: mo, kam" wa na: tang: jo; ako".
13 Makhyang: yaug wa yao: yao" dao: thoe mae myi" ra". Nhag' lam: zaung" yaug kam" wa qug: khai: mae" qo" loe; phao: thug' lo" ra".
14 Nao ta" ra" dao: we' nao kad' ra" mau" mae cao" yang: aphug' jhaung qhu" qo" yu: li" nae". Nao qo" nae" man: qi" ra" rure nao qo" yu: li" nae".
15 Nhag' magyang" ra" byu qe wa yao: bam jo: ga: khonhae" re: myid: yu: ako". Pha,jhi" bo mo, wa pha,jhi" byid' ra" dao: re tae" gyo" yu: ako".
16 Kopyad' nhag' yo" li" re ai jao" su re ba nhao: pye' ra". Aqhid' athao ba: myid: qu" mo, wa su: yang roe" rure maba geim kad' pye' ako".
17 Dangman" ra" dao: re nao ta" re tarha" ra" khyo: kad' ru ngad: ra". Mhug' ta" ra" dao: kam" wa matarha" ra" mau" re boe" nhao: ra".
18 Mamyid: qu" lo: ta" ke' ra" dao: wa shae lhae daja: ja: re" ru: dae zang qo" te' byid' ra". Pha,jhi" bo bo za: ta" thug' ke' ra" pha,jhi" dao: wa dae qo" gai byid' ra".
19 Mhug' ta" ra" dao: wa myao" sho' makham- dangman" ra" dao: kam" wa khonhae" re: dang: jo; ra".
20 Makhyang: mashab: ra" mau" re kad' nae" yaung mo, wa nyag din taung" qug: khai: qhug' li" genae". Gai: ra" mo, kam" wa ngaui bau: ngaui lho" qhug' genae".
21 Din:man" ra" byu qe wa magai: ru pe" maqhug'. Makhyang: mashab mo, kam" wa qug: khai: za: thaung" qhug' ako".
22 Asang wa mhug' hab' qere nghang" ra". Dao: thang" dang mo, re kam" wa qu" ngaui: ra".
23 Aqhid athao" ba: myid mo, wa yao: bam ba: to" rure maphug ngad: ako". Nhag' magyang" mo, kam" wa yao: bam pe" maba: rure hau" ako".
24 Mau" phin" zaui" re kheim: so' qo" yu nae". Noe" ru wa nao re jeim doe, nhao: li" nae".
25 Myid myo" re ngaui bau: ngaui lho" ru byaug: byaug nae". Nhag' tang" ra" dao: kam" wa nao re bau: nhao: li" nae".
26 Din:man: yaug wa yao" ba nam qenho: khyoshid' ngad: ra". Makhyang: mashab mo; khyo kam" wa yao: bam: ba nam qere khyo jhui" nghung" ra".
27 Nao noe" shoe: re nao cao" qho: ra" ja: re khonhae: re: maqhug' yu nae". Ngadqere: qam: ke' mau" khao" re wa dalhang: dae jo,nho" qo" li" nae".
28 Dangman" ra" khyo wa kao so' byid' ra" khyodang ngad: ra". Makhyang: mashab: ru wa shid: rure byid' ra" khyodang ngad: ra".