11
1 Asang wa maman" ra" jao ci mo, re nghang" ra". Yao: wa man" ra" jao laug: re o ngaui: ra".
2 Ngad beim: mo, wa khomyhao" mangad: re myo, nho sham mung: phoe: li" genae". Xam: mag za: na: ru wa pha,jhi" je: bo: ru ngad: ra".
3 Nao gai: ngad: re wa dangman" ruyang nao re jhui" ru qhug' nae". Magai: lam: ra" byu qe wa yao: bam yao" madangman" ra" khyo: yang byo; qeim: lo" genae".
4 Nao shid: ra" ba re jo,nho" jham wa pe" akyu" mabyid' li" nae". Dangman" ra" khyo kam" wa ni" kao so' re khyad' yu: li" nae".
5 Din:man" ra" khyo wa byugai re je: na myan nhao: ra". Makhyang: mashab yaug kam" wa yao: yao" gyoe; gyo" khyo kad' yu: li" nae".
6 Dangman" ra" khyo wa dangman: yaug re khyad' yu: ra"- Magai: lam: ra" yaug kam" wa yao: yao: so' kho' khyo: yang laung" byaug: li" nae".
7 Makhyang: mashab yaug shid: lo" re yao" myid: lao" khyo boshid: lo" ra". Jo,nho" dao mae to" ra" lam khug: myid wa pe" maboe" lo:ngad: ra".
8 Din:man: mo, re qug: khai: mae" gug: gam byid' ako". Ai: qug: khai: wa makhyang: mashab yaug jhao" yaug: joe" ra".
9 Mao"So re malam mo; nho: dao: thoe: yang nao qo" byo; qeim: lo" ra". Din:man: yaug: nho: pha,jhi" yang nao qo" khyad' yu: ra".
10 Dangman: mo, zhau: vha: gai: re vogaung: ngaui bau" ra". Makhyang: mashab mo, shid: lo" re ngaui bau: taung" zag: hug' ako".
11 Din:man: mo, shaman" byid' re vogaung: qi" qhang: lo: ra". Ngadqere: makhyang: mashab mo; nho: dao: thoe: yang vogaung: byo; qeim: lo" ba: ra".
12 Su gaje qere jung" ru wa nhag' magyang" ra" mau" ngad: ra". Nao nhag' bo: re wa sae za: na: li" nae".
13 Su: gaui mho yaug khag' rere: zug' to" ra" dao: qhid' mae" magai: myid: lam- Lam ga" yaug re kam" wa nao gai: lam: ra".
14 Mung"dan: dalam: wa khyo shid' au: she: ru majo, re byo; qeim: lo" li" nae". Pha,jhi" byid: mo, myo: sho' na: re gug: gam mung: yaug yo: ra".
15 Byubang" dayaug: nho: jhin re xe' byid: nae" qhid' mae" dao:so: to" re wa ai: mathao mae naenhaung myid bo: li" nae". Airu" mae mabo:bo re je: gai nae".
16 Xam: mag mung: ra" myiqe: wa su: yang ceim" phug' myao" ru qhug' ra". Ave, made; ra" myiqe: kam" wa myo, nho seim" li" nae". Byunoe" wa khonhae" re: ngaui qo" nae" mangad:- Lhe" ra" yaug kam" wa jo,nho" qo" li" nae".
17 Nao nhag' ba: khyag' re naoyao" nga: re naoyao: tau: to' ra" mang gai qo" nae". Abe, akhyad' kad' re naoyao: za: ano nae".
18 Makhyang: mashab mo, wa pe" re: qo" yu nae" mangad:- Dangman" ra" khyo: kad' re kam" wa nao gaigai: yao: aphug' jhaung qhu" qo" yu nae".
19 Dangman" ru cao" nae" myid: phyid' yaug wa kao so' daui: na: li" nae". Shad' ra" mau" re jhin" kad' ra" yaug kam" wa shid: li" nae".
20 Makhyang" ra" nhag' lam: bo mo, re Asang nghang" ra". Dangman" ra" khyo cao" mo, re kam" wa jhid'de; ra".
21 Makhyang: mashab mo, wa qobo dae byid' ru dang dang qhug' li" genae"rure nao ba: to: wa,. Din:man: mo, kam" wa loe; beim genae".
22 Gai: ra" ba: kho' ba: kin myid mabo: ra" myiqe: dayaug mae yaung" ra" lamyhung wa vo, zang: nho mae lhao" to" ra" qhang lo, pin: we' dau: ra".
23 Byugai qe o: ra" khyo alhab' wa agai za: aboe" thug' lo: ra". Makhyang: mashab mo, o: ru the' yu: re yaug khao: ngo" nhag' qu" yo" ako".
24 Byu damyo" wa ngaui re nug: khyo" yhung: ngadqere: je: je: za: qo" li" ako". Gaje wa gyai lha" mung: yhung: qere: je: je: za: amyaung: lo" ako".
25 Nhag' lam: qi: qi: gae zho: gae jhaug' wa,- aire nao aung doe, qi" qhang nae". Su gaje re bao" thaug' wa,- nao re: bao" yu: ru qhug' li" nae".
26 Gaug zo re qaung" to: mung: gau do, nae" lao" na yaug re su ceim" nhang" ako". Aire phoe' aung: yaug re kam" wa caung:khin" byid' ako".
27 Nao myid: yaung: to" ru gai: re- su: yang ceim" phug' myao: nae". Ngadqere: qug: khai: qho: re wa qug: khai: qhug' li" nae".
28 Yao: yao" jo,nho" re myid: ngha: na mo, wa byao gin yo, mae" sag' vho' jham re" ru: shu: gyo" lo: li" genae". Din:man: yaug kam" wa zin vao kheim: mae" sag' vho' re" ru:- tad' qhang: lo: li" nae".
29 Yao: yao" ug' khug' dinkhu: re aqug: akhai: byid: yaug wa lo" thao" mae pe" maqo" nae". Nhag' magyang: mo, wa khonhae" re: pha,jhi" bo mo; okaung za: aboe" genae".
30 Din:man" ra" khyo wa kao so' byid' ra". Ngadqere: aqan alan kad' ruyang gai: baui" byaug: ra".
31 Gai mo, wa ce: myid gaung: dao mae aphug' jhaung qhu" qo" yu: li" genae". Amung: makhyang: mashab: ra" qobo byu qe wa qobo dae byid' ru dang za: qhug' li" genae".