9
Shid' Lhang Ein: Lhang Kad' Ra" Lai Co' Poe
1 Asang wa Israel byu qe Egutu mung" mae" bin: thug' lo" gethao shid' zin ein: zin lho" sao qhid' khye' re Sina Din" pyad' yo mae Moshe re dao: jhau: ra". Asang wa-
2-3 Ai: poe re ce: lho" khye' daxe: byid ba ein: ba- ba vao yo, mae Israel byu qe wa Lai co' poe re- ai: poe qhid' mae" byid' to" ra" thung" li alhab' re cao" yang: kad' genae" ngad: ra"- ga: ta" ra".
4 Aimung: Moshe wa amyu" byu qere ai:Lai co' poe kad' genae" qhid' mae" ta" mung:-
5 Yao: bam wa lho" sao qhid' khye' daxe: byid ba: ba myi" thao re Sina Din" pyad' yo mae airu: kad' ako". Amyu" byu qe wa Asang: yang Moshe re byid' to" ra" amyin" cao jab re kad' ako".
6 Ngadqere: byu damyo" wa sushid mao re tin: geyang: caung:pa" thung" khyo" masan masin" boe" mo, bo: ako". Aimung: yao: bam wa ai: ba na mae Lai co' poe re maqo" bokad' ngad: ako". Yao: bam wa Moshe we' Arun tao jhao" ye: mung:-
7 Ngonhaung" wa sushid mao re tin: yang: masan masin" boe" mo, ngad: bam va". Ngadqere: ngonhaung" wa dang: ra" Israel byu qe we' daga" Asang re xeim: ngaui" byid' ra" mau" mae" pe"mung: phoe' pye' ru qhug' bam nae" ngad: i? ga: ta" ako".
8 Ailao" Moshe wa ngo Asang mae" pyang dao: qo" khae: yu: ra" yo, joe" sho' lao" ge,- ga: phaug' tau" ra".
9 Asang wa Moshe re-
10 Naonhaung" mae" dayaug- mangad: lao"- naonhaung"' nho: myid:zo: qe wa sushid mao re tin: yang:- mangad: lao"- va: khyo gyaung: su" na mung: masan masin" boe" ngadqere: Lai co' poe re kad' nug gelao"-
11 Naonhaung" wa ai: poe re ai: atha" lho" dakhye' lai thao- lho" shid' khye' ein: khye' daxe: byid ba: ba myi" thao mae kad' nae" akhang" qo" ako". Ai: poe re man" make' mug we' ao: pho' kho: jham we' kad' ge,-
12 Zo: ve pe" ja: rere: thao: ba ne, seim joe" sho' datang" to: ge,- pe" gug'nyhug' shoqug: rere: dakhyug' ge,- ai: Lai co' poe re thung" li alhab' re cao" yang: kad' ge,-
13 Ngadqere: caung:pa" thung" khyo" san sin" yaug ngad ru we'- gyaung: re masu" ra" yaug- Lai co' poe mabo kad' yaug khag' re ngadqere: nga" byumyu" dayaug khyo" myid: jho: yu: ru qhug' nae" mangad:- pe"mung:ga"re yao: wa jaung: to" ra" ayo, mae ngore ngaui" xeim: maqhaug' byid: yang: ngad: ra". Yao: wa yao" qobo aphug' re kham zo: ca" ra".
14 Amung: naonhaung" phaung mae na: ra" taung bug byu dayaug wa ai: Lai co' poe re kad' nug yang: ngad: re- yao: wa thung" li jham alhab' re cao" yang: kad' ca" ra". Yao: yao" amyu" ngad ngad- taung bug byu ngad ngad yaug khao: ngo" tarha" daja: za: ci nae" ngad: ra"- ein: Israel byu qere ta" nae" qhid' mae" ta" ra".
Jham Ne Thaui:
(Pht 40.34-38)
15-16 Asang: qhid' kheim: Zaung re tau: zhaug' ra" ba na mae jham thaui: lo mung: aire longhoe' pye' ra". Myi" re ai: jham thaui: wa myi: ru" ru ngad: ra".
17 Ai: jham thaui: mug: tho' khyo do, lo" lao" jamu jham phyo' mung: ai: jham thaui: gyo" lo: ra" jo, qo mae yao: bam wa thang: na: ra" jamu re dam: kad' ako".
18 Amyu" byu qe wa Asang: yang amyin" byid' ra" jo, qo mae thang: na ra" Zaung re phyo' mung:- Asang: yang amyin" byid' ra" jo, qo mae thang: na ra" jamu re yao: bam dam: kad' ako". Ai: Zaung adao mae jham thaui: thang: jo; ra" myhao" ai: jamu mae za: yao: bam thang: na: ako".
19 Jham thaui: ai: Zaung dao mae ayo, myao" sho' thang: na lao" yao: bam wa Asang: nho dao: re tae" gyo: mung: yao: bam mato" gengad: ako".
20 Dalhang lhang ai: jham thaui: wa Zaung adao mae ba na dajhid' za: thang: jo; ra". Yao: bam wa pe" ru: ngad ngad Asang: amyin" dao: re cao" yang: thang: na: ra" Zaung mae thang: na- mangad: lao" to" lo" ako".
21 Dalhang lhang ai: jham thaui: wa myi" mae" ne, kao joe" sho' za: thang: jo; ra". Yao: bam wa ai: jham thaui: do, lo" we' to" lo" ako". Jham thaui: do, lo" khao: ngo" yao: bam to" ye" lo" ako".
22 Shid' ba ngad ngad- lho" dakhye' ngad ngad- ai: tho' je yang: ngad ngad Zaung dao mae jham thaui: thang: jo; ra" myhao" yao: bam mato" ye: ngad: ako". Ngadqere: airu: do, lo" lao" yao: bam to" ye" lo" ako".
23 Moshe khyo" Asang byid' ra" amyin" jham re phug' cao" yang: yao: bam wa thang: na: ra" jamu re kad' mung:- aire phyo' ako".