8
Myikaug' Jham Re Jo, Qo Jaung: Ra" Khyo
1 Asang wa Moshe re-
2 Arun myikaug' tao" mae myikaug' nhad' lam: te' ra" au: myibao jham: qhid' au: shad' khyo bao nae" qhid' mae" nyhang" to: ca" nae" ein: yao: re ta" wa,- ga: ta" ra".
3 Arun re: mho dao: tae" gyo: mung:- myikaug' jham re myikaug' tao" qhid' au: khyo myo, nho qang yang: jaung: te' ra".
4 Ai: myikaug' tao" re Asang: yang Moshe re qhu" byid' ra" azung alho re cao" yang: aau: mae" akhyid joe" sho' qhang cin: yang kad' to" ako".
Levi Amyu" Qhaug' Byid' Ru We' Kyang" San: Ru
5 Asang wa Moshe re-
6 Levi amyu" qere dang: ra" Israel amyu" qemae" kho' yu mung: o mae ta" ruru: yao: bam re kyang" san: ru kad' byid: wa,-
7 Kyang" san: ru kad' ra" qid: yang yao: bam re pyi" sheim: wa,- amung: yao: bam: gaung geim" re qaug: pyad' pye' nhao wa,- yao: bam: mai bau: alhab' re zab: pye' nhao wa,- airulao"- yao: bam wa caung:pa" thung" khyo" san sin" mo, ngad: li" genae".
8 Ai: thao re yao: bam wa nung: jaung lo: nau" dadau: re we' qo ca" ra" zhanlun xau we' lhag' to" ra" cin man" gaug zo ngaui" xeim: re yu: yu genae" ngad: ra". Amung: nao wa qobo khyad' ngaui" xeim: qhid' mae" nung: jaung lo: gatau dadau: re yu: yu nae" ngad: ra".
9 Ai: thao Israel amyu" mo, phung: geim" re khai: zhang" yu mung:- Levi amyu" qere nga" qhid' kheim: Zaung qhid' au: shad' mae ye; jo, nhao wa,-
10 Israel byu qenho: lo, jham wa Levi amyu" qe: au: dao mae kai: genae" ngad: ako".
11 Amung: yao: bam nga" mau" re qo" zaui: so: genae" qhid' mae" Israel amyu" qenho: gakai: lai jhaung qhu" khyo" Arun wa Levi amyu" qere ngore qhaug' byid: nae" ngad: ra".
12 Ailao" Levi amyu" qe wa ai: nung: jaung lo: shid' dau" au: dao mae yao: bam: lo, re kai: genae" ngad: ra". Levi amyu" qe: qhid' mae" caung:pa" thung" khyo" kyang" san: ru kad' nae" qhid' mae" dadau: re qobo khyad' ngaui" xeim: khyo" ngaui" byid: mung: dadau: re wa phad' ngaui" byid' ra" ngaui' xeim: khyo" ngaui" byid: nae" ngad: ra".
13 Nga" qhid' mae" gakai: lai jhaung qhu" khyo" Levi amyu" qere qhaug' byid: mung: Arun we' yao" yauggai zo: qere yao: bam: au: jhaung qe kad' nhao wa,-
14 Ceru: kad' yang: Levi byu qere dang: ra" Israel byu qemae" kho' yu wa,- airulao"- yao: bam wa ngoyang sang: ra" mo, ngad: li" genae".
15 Nao wa Levi amyu" qere kyang" san: pye' ra" khyo we' qhaug' byid' ra" khyo bin: kad' thao re yao: bam wa Zaung mae mau" zaui: nae" dau ga" mo, ngad: li" genae".
16 Ngo wa Israel byu qe: zoqhid' yauggai zo: alhab' mo; gaung tha" yao: bam re mho' yu va". Amung: yao: bam wa ngo dayaug: yang za: sang: ra" mo, ngad: ako".
17 Egutu mung" mae zoqhid' yauggai zo: alhab' re ngo se' pye' ra" au:- Israel byu qe: dinkhu: khao: ngo" mae" zoqhid' qe we' sao qhid' xao" ra" gug'nyhug' dau: khao: ngo" nga" mae" khyo" ngo khyin: san: yu va".
18 Ana" ngo wa Israel byu qenho: zoqhid' yauggai zo: qe: atha" Levi amyu" qere ngo yu: na: ru ngad: ra".
19 Amung: yao: bam ai: gyang" lho" jo, qo khyo saung" te' li" ko" re- kyi" khyag' ruyang yao: bam re se' tam" pye' nae" rumae" Israel byu qere gug: gam byid: nae" we' Israel byu qe: qhid' mae" Zaung mae mau" zaui: genae" qhid' mae" Israel byu qemae" jhaung qhu" khyo" ngo wa ai: Levi amyu" qere Arun we' yao" yauggai zo: qere mau" vhin: to: va"- ga: ta" ra".
20 Aimung: Asang: yang Moshe re amyin" byid' ru we' dakhyo:- Moshe Arun we' Israel mo, byu qe alhab' wa Levi amyu" qere qhaug' byid' ako".
21 Levi amyu" qe wa yao: bam yao" gaung re kyang" san: ru kad' mung: yao: bam: mai bau: jham re zab: pye' ako". Ai: thao Arun wa Asang re byid' ra" gakai: lai jhaung qhu" khyo" yao: bam re qhaug' byid' ra". Yao: wa yao: bam: qhid' mae" caung:pa" thung" khyo" kyang" san: rure re: kad' ra".
22 Mo,byu qe wa Levi amyu" qe we' sin: yang: Asang: yang Moshe re byid' to" ra" amyin" ja: khao: ngo" re kad' ako". Airumung: Levi amyu" qe wa Arun we' yao" yauggai zo: qe: qao: mae Zaung mae mau" zaui: nae" dau ga" mo, ngad: ako".
23 Asang wa Moshe re-
24-25 Levi amyu" qemae" yaug khao: ngo" wa nga" qhid' kheim: Zaung mae zaui: so" ra" yao" qo re apyad shid' xe: ngo" zin mae" vin vo; qhid mung:- yao: wa apyad ngo" xe zin mae ai: mau" mae" thang nae" ngad: ra".
26 Ai: thao re- yao: wa yao" Levi amyu" cao: qe ai: Zaung mae yao: bam: qo re vin vo; rumae gai: bao" thaug' byid' ra". Ngadqere: yao: yao: khyo" pe" daja: re: magai: kad' ngad: ra". Ceru wa Levi amyu" qenho: vin vo; ra" qo re ayab lhang yang: zaui: nae" qo ngad: ra".