10
Ngaui Labo" Jham
1 Asang wa Moshe re-
2 Amyu" byu qere khai: zhang" yu: rumae" we' jamu phyo' rumae ci nae" qhid' mae" ngaui labo" shid' lam: kad' wa,-
3 Ai: labo" shid' lam" geim" thoe qhang sho' mad lao"- mo,byu phung: geim" wa nga" qhid' kheim: Zaung kham: dung: ni" lhang" gam: mae li" zang" ham: na genae" ngad: ra".
4 Ngadqere: labo" dalam: za: mad lao" wa- amyu" kaung jham: zug: jhaung qeza: ni" lhang" gam: mae li" zang" na genae" ngad: ra".
5 Amung: thoe lang" lao"- ba thug' shad' mae thang: na ko" ra" amyu" qe to" ye" lo" genae" ngad: ra".
6 Shid' lhang ein: lhang thoe lang" dam: mad lao" wa- mug: thao shad' mae thang: na ko" ra" amyu" qe to" ye" lo" li" genae". Airumung: jamu phyo' nae" qhid' mae" thoe lang" mad nae" ngad: ra".
7 Ngadqere: byu phung: re khai: yu nae" qhid' mae" wa thoe qhang mad nae" ngad: ra".
8 Labo" re khinjaung qe ngad: ra" Arun nho: yauggai zo: qe mad genae" ngad: ra".
O mae" tarha" wa joe" lo nae" ayo, alhab' mae phug' cao" nae" tarha" ngad: ra".
9 Naonhaung" re gye li" khe' ra" gyevo re gye dam: tug' khe' nae" naonhaung" yao" gaung re gug: gam: yu nae"- naonhaung" mung" mae gyekhe' poe ngad lao"- gyekhe' poe qhid' mae" aso: khyo" ai: labo" re mad nae" ngad: ra". Ailao" ni" Mao"So Asang ngo wa- nao re bao" thaug' byid: mung: ni" gyevo qe: lo, mae" nao re ngo khyad' yu nae".
10 Ngaui bau" ra" ayo, ngad: ra" lho" xin: poe- naonhaung" gatau: caung:pa" thung" we' sin" ra" poe jham mae- naonhaung" phad' ngaui" byid' ra" ngaui" xeim: we' zam" khug: ra" ngaui" xeim: jham re qhaug' byid' ra" au: mae ai: labo" re naonhaung" mad genae" ngad: ako". Ailao" ngo wa naonhaung" re bao" thaug' yu nae". Ngo wa naonhaung" Mao"So Asang ngad: ra".
Israel Byu Qe Jamu Re Phyo' Ko" Ra" Khyo
11 Amyu" byu qe Egutu mung" mae" thug' lo" thao shid' zin ein: zin- lho" shid' khye' ein: khye' shid' xe ba ein: ba mae Asang: qhid' kheim: jamu adao mae" jham thaui: wa do, lo" mung:-
12 Israel byu qe wa Sina Din" Pyad' yo mae" yao: bam: gyaung: khyo mae dam: to" ye" lo" ako". Jham thaui: wa Paran Din" Pyad' yo mae lo" thang: ra".
13 Yao: bam wa Moshe khyo" Asang: yang amyin" byid' ra" jo, qo mae" to" ye" lo" ako".
14 Yao: bam to" ye" lo" ra" lhang khao: ngo" amyin" wa daja: za: ngad: ra". Yuda amyu" yang jhui" ra" tab: nho: khyi qao: mae" mo, wa daphung: thao daphung: Amminadab nho: yauggai zo: au: jhaung pho" Nashon we' daga" sao qhid' to" lo" ako".
15 Isakha amyu" qenho: au: jhaung pho" wa Zua nho: yauggai zo: Nethane ngad: ra".
16 Zebulun amyu" qenho: au: jhaung wa Helon nho: yauggai zo: Eliab ngad: ra".
17 Ai: thao re Zaung re yu: khyo" yu mung: aire vo, mo, ngad ko" ra" Gershon amyu" kaung we' Merari amyu" kaung qe to" lo" nae" ngad: ako".
18 Ai: thao Rubin amyu" yang jhui" ra" tab nho: khyi qao: mae" mo, wa daphung: thao daphung: Shedura nho: yauggai zo: au: jhaung pho" Elizu we' to" ye" lo" ako".
19 Simon amyu" qenho: au: jhaung pho" wa Zurishadai nho: yauggai zo: Shelumie ngad: ra".
20 Gad amyu" qenho: au: jhaung pho" wa Due nho: yauggai zo: Eliasab ngad: ra".
21 Ai: thao re Kohad amyu" kaung mae" Levi byu qe wa gyang" lho" ra" zai jham re vo, yang to" ye" lo" ako". Qhid' au: mae" Zaung khyo yao: bam joe" ye" ra" ayo, mae Zaung re dam: zhaug' to' ako".
22 Ai: thao Ephrim amyu" yang jhui" ra" tab: nho: khyi qao: mae" mo, wa daphung: thao daphung: Amihu nho: yauggai zo: au: jhaung pho" Elishama we' daga" to" ye" lo" ako".
23 Manashe amyu" qenho: au: jhaung pho" wa Pedazu nho: yauggai zo: Gamale ngad: ra".
24 Benyamin amyu" qenho: au: jhaung pho" wa Gidoni nho: yauggai zo: Abidan ngad: ra".
25 Lo" thao" mae tab alhab' mo; nho: nhaung thao" mae gug: gam byid: mo, khyo" mau" vin ko" ra" Dan amyu" yang jhui" ra" tab: nho: khyi qao: mae" mo, wa daphung: thao daphung: Amishadai nho: yauggai zo: au: jhaung pho" Ahieze we' daga" to" ye" lo" ako".
26 Ashe amyu" qenho: au: jhaung pho" wa Okhran nho: yauggai zo: Pagie ngad: ra".
27 Nabhtali amyu" qenho: au: jhaung pho" wa Enan nho: yauggai zo: Ahira ngad: ra".
28 Airumung: ceru wa Israel byu qe jamu re phyo' yang: to" lo" khao: ngo" to" su" ye" lo" nae" amyin" ngad: ra".
29 Moshe wa Midian byu Yethro nho: yauggai zo: yao: khau: Hoba re- ngonhaung" wa Asang: yang ngonhaung" re byid: nae" ta" to" ra" jo, qo khyo ye" lo" nae" ngad va"- yao: wa Israel byu qere na: dai nhao nae" ga: dao:so: byid' to" ra". Airumung: ngonhaung" we' cao: li" la,- ngonhaung" nho: jo,nho" jham re nao re gae byid: nae"- ga: ta" ra".
30 Hoba wa- ngo macao nae"- nga" co' phyid' mug: khyo dam: tug' lo" nae"- ga: phaug' tau" ra".
31 Moshe wa- jeju we' ngonhaung" re dato: co' la,- nao wa din"pyad' yo mae ngonhaung" jamu khai: mae gai: kad' nae" rure nao ba: ra". Nao wa ngonhaung" nho: khyo shid' yaug qo" gai: ngad: ra".
32 Nao ngonhaung" we' bocao: li" ngad: re wa Asang: yang ngonhaung" re byid' ra" shaman" jeju alhab' nao re gae bam byid: nae"- ga: ta" ra".
Amyu" Byu Qe To" Lo" Ko" Ra" Khyo
33 Amyu" byu qe wa gyang" lho" ra" Sina bam mae" to" lo" mung:- yao: bam wa sam ba su" ye" lo" ako". Yao: bam qhid' mae" jamu qho nae" qhid' mae" Asang: Dao: Thang" Ban" wa khonhae" re: yao: bam: qhid' au: mae ye" lo" ra".
34 Jamu khao: ngo" mae" yao: bam to" ye" lo" au:- na" re Asang: nho: jham thaui: wa yao: bam re sham: nghoe' byid' ra".
35 Dao: Thang" Ban" vo, yang: to" qhid: lo" khao: ngo" Moshe wa- Asang we" to" wa,- ni gyevo qere khe' sin" ke' mung:- nao re nghang" ra" mo, re dao" lo" nhao wa,- ga: ta" nae" ngad: ra".
36 Dao: Thang" Ban" thang khao: ngo" yao: wa Asang we"- Israel byu ataung atug myo: sho' qenho: ug' khug' dinkhu: khyo dam: tug' lo wa,- ein: ta" nae" ngad: ra".