7
Au: Jhaung Qenho: Ngaui" Xeim: Jham
1 Moshe Asang: qhid' kheim: Zaung re bin: tau: zhaug' to' ra" ba na mae yao: wa Zaung re we' ai: nho: zai jham alhab'- phan re we' ai: zai jham alhab' re xau gyad mung: Asang re qhaug' byid' ra".
2 Ai: thao Israel amyu" mae au: jhaung qe ngad gemung:- byu japhin: mae au: jhaung qe ngad ko" ra" amyu" kaung au: jhaung qe wa-
3 Yao: bam: ngaui" xeim: jham re Asang jhao" cili" ako". Aijham wa lhin" khyaug' lam: we' nung: jaung lo: daxe: shid' dau: ngad mung: au: jhaung shid' yaug: qhid' mae" lhin" dalam: lam:- au: jhaung dayaug: qhid' mae" nung: jaung lo: dadau: dau: ngad: ra". Yao: bam aijham re bin: qhaug' byid: gethao re-
4 Asang wa Moshe re-
5 Ai: Zaung kad' pin" rumae ci nae" qhid' mae" ai: jhaung qhu" jham re khae: yu wa,-Aimung: yao: bam zaui: so: ca" ko" mau" zo" re cao" yang: Levi amyu" qere gae byid: wa,- ga: ta" ra".
6 Airumung: Moshe wa Lhin" jham we' nung: jaung lo: jham Levi amyu" qere byid' ra".
7 Yao: wa lhin" shid' lam: we' nung: jaung lo: byid dau: re Gershon kaung qere byid: mung:-
8 Lhin" byid lam: we' nung: jaung lo: she' dau: re Merari kaung qere byid' ra". Yao: bam: mau" zo" alhab' re Arun nho: yauggai zo: Ithama ceim" shid' rure cao" yang: zaui" pin" ako".
9 Ngadqere: Moshe wa Kohad kaung qere wa lhin" jham re: nung: jaung lo: jham rere: mabyid' ngad: ra". Pe"mung:ga"re yao: bam gun caung qu" gam: ra" gyang" lho" ra" zai jham re yao: bam: lo, sin mae vo, ca" geyang: ngad: ra".
10 Au: jhaung qe wa phan qhaug' byid' ra" akhyo: kad' nae" qhid' mae" ngaui" xeim: jham rere: ciye" ako". Yao: bam: jhaung qhu" jham re phan mae qhaug' byid: nae" yao: bam jin" gelao".
11 Asang wa Moshe re- phan qhaug' byid' ru qhid' mae" daxe: shid' ba: gu: mae ba khao: ngo" au: jhaung qemae" daba mae dayaug yaug yao: yao" jhaung qhu" re qhaug' byid: genae" qhid' mae" yao: bam re ta" kyo: wa,- ga: ta" ra".
12-83 Yao: bam wa yao: bam: ngaui" xeim: jham re o mae we' dakhyo: qhaug' byid' ako".
Yao: bam yaug khao: ngo" ciye: ko" ra" xeim: jham wa- tarha" vao: ra" azhao" re cao" yang lag: re- aung:zha' ngo" xe la" ra" ngaui khug' dakhug'- aung:zha' sam xe la" ra" ngaui jarung: dalam:- shid' lam" geim" mae gaug zo ngaui" xeim: qhid' mae" xau we' lhag' to" ra" cin man" phaui: byang" sho' sho' byid aung:zha' la" ra" qhang ban daban mae nae pyo: ja: byang" sho'- nung: jaung lo: nau" dadau:- yao lo: dadau: phad' ngaui" byid' ra" xeim: qhid' mae" dazin byang" ra" yao nau" dadau: we' qobo khyad ngaui" xeim: qhid' mae" cad' be, dadau:- zam" khug: ra" ngaui" xeim: qhid' mae" nung: jaung lo: shid' dau:- yao lo: ngo" dau:- cad' be, ngo" dau:- dazin byang" ra" yao nau" ngo" dau: ngad: ra".
84-88 Phan qhaug' byid' ru qhid' mae" au: jhaung daxe: shid' yaug: yang ciye: ko" ra" ngaui" xeim: jham alhab' wa o mae tung" to" ru we' dakhyo: ngad: ra".
-Shid' lam" geim" alhab' mae Paung: 60 la" ra" ngaui khug' daxe: shid' lam: we' ngaui jarung: daxe: shid' lam:-
-Nae pyo: ja: byang" sho' bo mung:- aung:zha' 40 la" ra" qhang ban daxe: shid' ban-
phad' ngaui" byid' ra" ngaui" xeim: qhid' mae" nung: jaung lo: daxe: shid' dau:- yao lo: daxe: shid' dau:- dazin byang" ra" yao nau" daxe: shid' dau: we' ai we' bongaui" byid' ra" gaug zo ngaui" xeim: jham-
-Qobo khyad' ngaui" xeim: qhid' mae" cad' be, daxe: shid' dau:-
-zam" khug: ra" ngaui" xeim: qhid' mae" nung: jaung lo: shid' xe: byid dau:- yao lo: khyaug' xe dau:- cad' be, khyaug' xe dau:- dazin byang" ra" yao nau" khyaug' xe dau: ngad: ra".
89 Moshe Asang we' jho" jhau nae" qhid' mae" Zaung khug khyo vao ye" ra" au:- Dao: Thang" Ban" apyid' adao kherubin shid' dau" agyo: mae" Asang: yang dao: jhau: ra" thoe re Moshe the' gyo" ra".