11
Tabera Ga: Mhang" Ra" Jo, Qo
1 Amyu" byu qe wa yao: bam: qug:khai" ru khyo we' sin: yang: Asang re nyhung: ako". Yao: bam: nyhung thoe re Asang the' gyo: lao" yao: nhag' yo" li" mung: amyu" byu qe: dao mae myi: nhao: ke' byid' ra". Ai: myi: wa yao: bam: phaung mae nga" mung:- ai: jamu ayae dajo, qo re phyo' qheim" pye' ra".
2 Amyu" byu qe wa bao" thaug' yu nae" qhid' mae" Moshe re mho' yao: ako". Moshe akyu" mho' mung: ai: myi: wa shid: lo" ra".
3 Airumung: ai: jo, qo re Tabera ga: mhang" ako". Pe"mung:ga"re ai: jo, qo mae Asang: myi: wa yao: bam: phaung mae nga" yang: ngad: ra".
Au: Jhaung Nhad' Xe Yaug Re Moshe Khyin: Yu: Ru
4 Israel byu qe we' daga" gyaung: su" rumae taung bug byu qere: bobo: ako". Yao: bam wa shoshab' gyai shab' mo, ngad: ako". Israel byu qe lhao" re:- ngonhaung" sho: dajhid' khalhao" qhug' zo" qa: we"-
5 Ngonhaung" wa Egutu mung" mae pe" aphug' magyo" ca" lo: ngonhaung" zo: nug: ra" ngo: cao jab re lhaung" zo" bam: wo". Ngonhaung" lhaung" zo" ra" lakhu:- lashau:- hau: gyi:- hau: ne- hau: seim:- jham re myid: beim" ra".
6 Ngadqere: ana"- ngonhaung" qam: wa thao" byaug va". Ngonhaung" zo: nae" gatau pe" majo,- ba khao: ngo" ce: manna mae" je yang: gatau zo: nae" pe" majo,- ga: nyhung: ako".
7 (Manna wa myug: shi: jid' ngai ja: we' dau mung:- phyu phyu bo" bo" mung: ra" anyhug bo: ra".
8-9 Airu wa myi" re jamu mae nghin we' daga" gyo" ra". Thao: ba ne, kao amyu" byu qe wa aire cao" gaug: zhang: yu mung: aire pyag' mangad: lao" aphaui: gyag: mhan" yang: aire xaug' mung: mug pye: kad' ako". Ai: mug pye: wa zhanlun xau we' kad' to" ra" mug we' dakhyo: myho' ra".)
10 Moshe wa amyu" byu qe alhab' mo, yao: bam: jamu kham: dung: jham mae phaung: ye; bam mung: nyhung: na ko" ru alhab' re the' gyo" ra". Asang yao: bam re nhag' yo" ruyang Moshe nhag' lam: thao" ra".
11 Yao: wa Asang re- nao ngore pe"mung: gyai magai: ra" khyo" kad' i? Pe"mung: nao ngore mangaui i? Ce: amyu" byu alhab' re jhui: nae" qo ngore pe"mung: nao byid' to" i?
12 Ngo wa yao: bam re maphan" to:- yao: bam re makhau: to:- yao: bam: phug' pho" qere nao dao:so: byid' to" ra" mung" khyo ye" ra" gyaung: khyo geim" mae zojhui: yaug we' dakhyo: kad' mung:- zonau" re we' dakhyo: nga" lo, mae yao: bam re vo, nae" nao ngore pe"mung: ta" ang: i?
13 Ngo wa ce: amyu" byu qe alhab' mo; qhid' mae" sho: laug sho' khai: mae" qo" nae" i? Yao: bam wa nyhung mung: ngore sho: mho' na: ako".
14 Ngoyang za: ce: amyu" byu alhab' re jhui: nae" qo maqo" yu ngad: ra". Aiwa nga" qhid' mae" qo saung" la" ra".
15 Nao ceru: ngore kad' nae" ngad: re wa ngore nhag' khyag' mung:- se' pye' la,- airu: lao" ngo wa ni" nhag' khyag' shono: myid mabo lo: akyaung athin kad' rure zang: kham maca" lo nae" ngad: ra"- ga: ta" ra".
16 Ailao" Asang wa Moshe re- amyu" byu qenho: au: jhaung qekhyo" axam: aso: kad' to: qhug' ko" ra" mo, ngad ko" ra" phug' myao: tho' ra" yauggai nhad' xe yaug re zhang" yu wa,- aimung: yao: bam re nga" qhid' kheim: Zaung khyo ngojhao" jhui" li" mung: aitau mae ni" ayae mae ye; jo, genae" qhid' mae" yao: bam re ta" wa,-
17 Ngo gyo" li" mung: aitau mae nao we' dao: jhau nae"- nao re ngo byid' to" ra" byo daqhae: re yu: yu mung:- yao: bam re byid: nae"- airu: lao" yao: bam wa ce: amyu" byu qere jhui" ra" qo re yao: bam qo" bao" vin: li" genae". Amung: nao wa ai: qo re dayaug za: mavin vo, ca" nae" ngad: ra".
18 Ana" amyu" byu qere ceru: ta" wa,- ne, mo" ba: qhid' mae" yao: yao" gaung re kyang" san: ra" khyo kad' ge,- naonhaung" sho: qhug' zo" li" genae". Asang wa- naonhaung" zo" qu" ra" sho: re naonhaung" zo: nug: ga: re:- Egutu mung" mae" je yang: qo" zo" ga: re: lau yang: ta" ra" thoe re the' gyo" ava". Ana" Asang wa naonhaung" re sho: byid' li" nae". Aimung: naonhaung" ai: sho: re zo: ca" li" genae".
19 Naonhaung" wa ai: sho: re daba- shid' ba ngo" ba- daxe ba- shid' xe ba za: zo: nae" mangad:-
20 Naonhaung" sho: sheim nae sho' naonhaung" aire nghang: sho' lho" khye' geim" zo: ca" genae" ngad: ra". Cemae naonhaung" phaung mae na: ra" Asang re naonhaung" ha: pye' ko" ru we' Egutu mung" mae" khonhae" re: thug' lo" nae" ma ang: ru ngad: ga: Asang re nyhung ko" ruyang ceru: boe" li" nae" ngad: ra"- ga: ta" ra".
21 Ailao" Moshe wa Asang re- cemae ngo jhui" lhau: ra" amyu" byu qe wa 600,000 yaug ngad: ako". Nao wa yao: bam re lho" dakhye' zo: nae" sho: laug sho' byid: nae" ein: ta" i?
22 Yao: bam re nhag' dag nhao nae" qhid' mae" nung: we' yao jham se' yang: qo" laug nae" i? Pang:lai:: mae" ngo: alhab' wa yao: bam: qhid' mae" laug nae" i? ga: ta" ra".
23 Asang wa- nga" qam: so' mae akyo jo; ra" i? Nao wa mamyao" re- ngo ta" va" dao: boe" li" nae" la,- maboe" li" nae" la, nao myao: li" nae" lhe"- ga: tau" ra".
24 Airumung: Moshe wa thug' lo" mung:- Asang ta" ra" dao: amyu" byu qere yeta" kyo" ra". Yao: wa au: jhaung qe nhad' xe yaug re zhang" yu mung:- yao: bam re Zaung lhang" gam: mae nha: to" ra".
25 Ai: thao Asang wa jham thaui: mae" gyo" li" mung: Moshe re dao: jhau: ra". Asang wa Moshe re byid' to" ra" byo daqhae: re yu: yu mung:- au: jhaung nhad' xe yaug re byid' ra". Yao: bam: dao mae byo joe" li" lao"- yao: bam wa lapa qe we' dakhyo: hug' ako". Ngadqere: myao" sho' mahug' ko" ngad: ra".
26 Au: jhaung nhad' xe yaug mae" ngad ko" ra" Eldad we' Medad shid' yaug wa Zaung mae thang: na: jo, mung: ai: jamu khyo maye: ko" ngad: ra". Ai: jamu mae byo wa yao: shid' yaug: dao mae joe" li" mung: yao: shid' yaug re: lapa qe we' dakhyo: hug' ako".
27 Amung: zolau: dayaug wa Moshe jhao" ye: mung:- Eldad we' Medad shid' yaug boe" na: ra" khyo re yeta" kyo" ra".
28 Ai: thao yao: wa zolau: pyad mae" Moshe re bao" thaug' yaug ngad: lo: ra" Nun nho: yauggai zo: Yoshu wa dao: jhau mung:- Moshe re- nhag' bo we"- yao: bam re tam" pye' wa,- ga: ta" ra".
29 Ailao" Moshe wa- nga" qhid' mae" nao myid: ci" byid' i? Asang wa yao" byumyu" alhab' mo, re lapa qe we' dakhyo:- hug' nhao nae" rure ngo o ngaui kao bau: ra" ga: phaug' tau" ra".
30 Ai: thao Moshe we' Israel byumyu" qenho: au: jhaung nhad' xe yaug wa- jamu khyo phao: lo" ako".
Asang Ngho' Tau" Jham Re Nhao: Ke' Ra" Khyo
31 Asang wa nyag din taung" panglai: mae" ngho' tau" bohug' cidao" lo: ra" la re nhao: ke' ra". Aijham wa myid gaung mae" shid' daung" myao: rumae dao" lo: ako". Aijham wa jamu mae logyo" no: ko" ru we' shad' khao: ngo" khyo khyoman: myo: sho' logyo" ako".
32 Airumung: ai: ba ba geim" we' ai: myi myi: geim" amyu" byu qe wa ngho' nau" taung" yu: ra" mau" kad' ako". Khag' re: daxe bye: vao: ra" dao: ngo" xe dao: mae" manang: lo: taung" zhang: yu: ako". Yao: bam wa ai: jamu lhang" gam: yang: ai: ngho' tau" jham re lhe' kyaug' ako".
33 Yao: bam: qhid' mae" zo: nae" sho: gyai magan: mago" jo, shi" au:- Asang wa amyu" byu qere nhag' yo: mung: yao: bam: phaung mae qam" no gyo" nhao: ra".
34 Ai: jo, qo re Kibrod Hatava ga: mhang" ako". (Ai: lajheim: wa sho: shab' ra" mo; nho: lab jham ga" ru ngad: ra") Pe"mung:ga"re ai: jo, qo mae sho: shab' ra" mo, re yao: bam nyhab' geyang: ngad: ako".
35 Amyu" byu qe wa ai: jo, qo mae" Hazerod khyo qui" ye: mung: ai: mae yao: bam jamu kad' ako".