4
Thaug Makad' Ra" Qobo Jham
1-2 Asang wa Moshe re- Dayaug yaug thaug makad' lo: qobo shad' lhoe" ru we' Asang: amyin" dao: daja: ja: re shad' lhoe" pye' ngad: re o mae ta" to" ra" tarha" jham re phug' cao" ca" ra" khyo re Israel byu qere ta" nae" qhid' mae" amyin" byid' ra".
3 Khinjaung Yin" wa qobo shad' mung:- mo, byu qe: dao mae yug: boe" nhao: ngad: re- yao: wa qo pe" mabo: ra" nung: jaung lo: re li" qhaug' byid: yang: aire yao" qobo qhid' mae" Asang re xeim: ngaui" byid: nae" ngad: ra".
4 Yao: wa ai: nung: jaung lo: re Zaung kham: dung: khyo she: li" mung:- ainho: au: dao mae yao" lo, kai: yang: aitau Asang: qhid' kheim: mae se' nae" ngad: ra".
5 Ai: thao Khinjaung agyi pho" wa nung: jaung lo" nho: sa: daqhae: yu: yu mung:- Zaung khug khyo civao ye: nae" ngad: ra".
6 Yao: wa ai: sa: mae yao" lo,nyhug' thug' jam mung:- gyang" lho" ra" akyo pin: lung: qhid' au: mae nhad' lhang vhag' sheim: nae" ngad: ra".
7 Ai: thao yao: wa sa: daqhae: re Zaung khug mae" nae pyo: ja: ngaui" byid' ra" phan akhyug jham mae" zang khyug au: jham mae gyad byid: nae" ngad: ra". Amung: yao: wa dang: ra" gu: re Zaung kham: dung: mae jo, ra" xeim: phad' ngaui" byid' rumae ci: ra" phan zang pan mae vhe' khyo" pye' nae" ngad: ra".
8 Yao: wa ce: nung: jaung lo: mae" xau alhab'- khug lam khug sang: au mae lham" to" ra" xau-
9 Noce' shid' ce' we' aimae lham" to" ra" xau- sang: gai: thao" ra" dau jham re yu: yu nae" ngad: ra".
10 Khinjaung pho" wa zam" khug: ra" ngaui" xeim: qhid' mae" gug'nyhug' re se' mung: aimae" xau re yu yang: kad' ru we' dakhyo:- ce: xau re yu mung:- phad' ngaui" ra" xeim: qhid' mae" phan dao mae phad' ngaui" byid: nae" ngad: ra".
11 Ngadqere: yao: wa ainho: shoqid- sho:- au:- khyid jham- au jham bobo mung: khug lam khug sang: jham re-
12 Myiqe, jham re vhe' khyo" to" ra" jo, qo- caung:pa" thung" khyo" kyang" san: pye' nae" qhid' mae" thang: na: ra" jamu taung gaung shad' khyo vo; ye: mung:- aitau mae" myikhyeim" mae ngha" pye' nae" ngad: ra".
13 Israel mo, byu phung: geim" thaug makad' ra" qobo shad' ru we' Asang: amyin" dao: daja: ja: re shad' lhoe" yang: yug; boe" li" ngad: re-
14 Ai: qobo re ba: li" we' mo, byu phung: wa qobo ngaui" xeim: khyo" nung: jaung lo: nau" dadau: re she: li" genae" ngad: ra". Yao: bam wa aire Asang: qhid' kheim: Zaung khyo she: li" genae" ngad: ra".
15 Mo,byu phung" nho: au: jhaung qe wa ai: nug: jaung lo: nau" dao mae yao: bam: lo, kai: mung:- aimae se' genae" ngad: ra".
16 Khinjaung qi wa nung: jaung lo" nho: sa: daqhae: re Zaung khug khyo civao ye: mung:-
17 Yao" lo,nyhug' re aimae thug' jam: yu yang:- akyo pin: lung: qhid' au: mae nhad' lhang vhag' sheim: nae" ngad: ra".
18 Yao: wa sa: daqhae: re yu mung: Zaung khug mae" nae pyo: ja: phad' ngaui" ra" phan akhyug jham mae" zang khyug au: jham mae gyad byid: yang:- dang: ra" gu: re wa Zaung kham: dung: mae jo; ra" xeim: phad' ngaui" byid' rumae ci: ra" phan apan mae vhe' khyo" pye' nae" ngad: ra".
19 Ai: thao yao: wa xau alhab' re yu mung:- phan dao mae phad' ngaui" nae" ngad: ra".
20 Yao: wa qobo ngaui" xeim: re kad' ru we' dakhyo:- ce: nung: jaung rere: kad' nae" ngad: ra". Yao: wa ceru: mo, byu qenho: qobo qhid' mae" xeim: ngaui" byid: mung:- yao: bam wa qobo khyad' pye' byid' ru qhug' li" genae".
21 Ai: thao yao: wa ai: nung: jaung lo: re thang: na ra" jamu taung gaung shad' khyo she: ye: mung:- yao: yao" qobo qhid' mae" phad' ngaui" byid' ra" nung: jaung lo: re we' dakhyo:- phad' ngaui" byid: nae" ngad: ra". Airu wa mo, byu qenho: shad' loe" ra" qobo re yu pye' nae" qhid' mae" ngaui" byid' ra" ngaui" xeim: ngad: ra".
22 Zug: dayaug wa thaug makad' ra"- qobo shad' mung: Asang: amyin" dao: mae" daja: ja: re shad' lhoe" ra" yug: bo: li" ngad: re-
23 Yao: shad' rure ba: li" we' yao: wa yao" qhid' mae" ngaui" xeim: khyo"- pe" qo mabo: ra" cad' lo: dadau: re she: li" nae" ngad: ra".
24 Yao: wa ai: cad' lo: dao mae yao" lo, re kai: mung:- phad' ngaui" byid' ra" gug'nyhug' xeim: jham re se' ra" jo, qo ngad: ra" phan: nho: mug: am: shad' mae ai: cad' be, re se' nae" ngad: ra". Ceru wa qobo re vin: pye' byid: nae" qhid' mae" ngaui" byid' ra" xeim: ngad: ra".
25 Khinjaung pho" wa ai: sa: mae yao" lo, nyhug' thug' jam: yu mung: phan: nho: akhyug jham mae" zang khyug au: jham mae gyad yang:- dang: ra" gu: re wa phan qao: mae vhe' khyo" nae" ngad: ra".
26 Ai: thao re yao: wa zam" khug: ra" ngaui" xeim: qhid' mae" se' ra" gug'nyhug' xau re phad' ngaui" ru we' dakhyo:- ainho: xau alhab' re phan dao mae phad' ngaui" byid: nae" ngad: ra". Khinjaung pho" wa ceru: zug: pho" nho: qobo qhid' mae" xeim: ngaui" byid: mung:- yao: wa qobo khyad' pye' byid' ru qhug' li" nae".
27 Yu" Yu" byu dayaug wa thaug makad' ra":- qobo shad' mung:- Asang: amyin" dao: jham mae" daja: ja: re shad' lhoe" yang: yug: bo: li" ngad: re-
28 Yao: qobo shad' rure ba: li" we' yao: wa ngaui" xeim: khyo"- pe" qo mabo: ra" cad' mo" dadau: re she: li" nae" ngad: ra".
29 Yao: wa ainho: au: dao mae yao" lo, re kai: mung:- phad' ngaui" byid' ra" xeim: gug'nyhug' jham re se' ra" jo, qo phan: nho: mug: am: shad' mae aire se' nae" ngad: ra".
30 Khinjaung pho" wa ai: gug'nyhug' nho: sa: mae yao" lo,nyhug' thug' jam: yu mung:- phan: nho: akhyug jham mae" zang khyug au: jham mae gyad mung: yang:- dang: ra" gu: re wa zang qao: mae vhe' khyo" pye' nae" ngad: ra".
31 Ai: thao yao: wa zam" khug: ra" ngaui" xeim: qhid' mae" se' ra" gug'nyhug' jham mae" xau re yu: pye' ru we' dakhyo:- ainho: xau alhab' re yu: pye' nae" ngad: ra". Amung: meim sheim wa Asang re ngaui nhao nae" qhid' mae" yao: wa aire phan dao mae phad' ngaui" byid: nae" ngad: ra". Ceru: khinjaung pho" wa aiyaug: qhid' mae" ngaui" xeim: re ngaui" byid: mung:- yao: wa qobo khyad' pye' byid' ru qhug' li" nae".
32 Byu dayaug wa qobo ngaui" xeim: khyo" yao dadau: she: li" ngad: re aiwa pe" qo mabo: ra" amyhi" ngad qo: ra".
33 Yao: wa yao" lo, re ai: gug'nyhug' au: dao mae kai: mung:- phad' ngaui" byid' ra" ngaui" xeim: gug'nyhug' jham re se' ra" jo, qo ngad: ra" phan: nho: mug: am: shad' mae se' nae" ngad: ra".
34 Khinjaung pho" wa yao" lo,nyhug' re ai: gug'nyhug' sa: mae thug' jam: yu mung:- phan: nho: akhyug jham mae" zang khyug au: jham mae gyad yang:- dang: ra: gu: re wa phan qao: mae vhe' khyo" pye' nae" ngad: ra".
35 Ai: thao yao: wa zam" khug: ra" ngaui" xeim: jham qhid' mae" se' ra" yao dadau: mae" xau re yu: pye' ru we' dakhyo:- ai: gug'nyhug' mae" xau re yu: pye' nae" ngad: ra". Amung: yao: wa aire Asang re byid' ra" zo:ve ngaui" xeim: we' daga" phan dao mae phad' ngaui" nae" ngad: ra". Ceru: khin jaung pho" wa byu aiyaug: qhid' mae" xeim: ngaui" byid: mung:- yao: wa qobo khyad' pye' byid' ru qhug' li" nae".