5
Qobo khyad' Xeim: Kad' Ca" Ra" Shad' Nghung" Mau"
1 Qobo khyad' xeim: kad' ca" ra" shad' nghung" mau" jham wa o mae" we' dakhyo: ngad: ra".
Byu dayaug wa tarha" qe, do, mae sagse: kad' byid: nae" qhid' mae" tarha" vao: ra" khyo" khai: to: qhug' mung:- yao: the' gyo: va" ra" khyo mangad: lao"- yao: the' myao: ra" khyo daja: ja: we' sin: yang: lau dao: mabyid: ngad: re- boe" lo: ra" akyu" qobo re kham zo: ca" ra".
2 Byu dayaug yaug wa gug'nyhug' shid mao ru"ru caung:pa" thung" khyo" masan masin" boe" ra" ja: daja: ja: re thaug makad' lo: the' tin" ngad: re- yao: kad' ru myid: beim: we' yao: wa masan masin" boe" mung:- qobo qo" ra".
3 Byu dayaug yaug wa masan masin" ra" gaung dau mae" pe" ja: re ngad: re ngad thaug makad' lo: the' tin" ngad: re yao: kad' va" rure myid: beim: we' qobo qo" ava".
4 Byu dayaug yaug pe" ja" khyo we' sin: yang: ngad ngad mamyid: qu" lo: thao: ce' to" ngad: re yao: kad' va" rure myid: beim: we' yao: wa qobo qo" ava".
5 Byu dayaug yaug qobo qo" lao" wa yao: wa ai: qobo re ta" lhang: yu ca" ra".
6 Amung: yao" qobo qhid' mae" qobo dae khyo"- yao: wa yao mo" mangad: lao"- cad' be, mo" dadau: re ngaui" xeim: khyo" Asang jhao" cili" ca" ra". Khinjaung pho" wa aiyaug: qobo qhid' mae" xeim: ngaui" byid: nae" ngad: ra".
7 Yao: wa yao- mangad: lao" cad' be, maqo" gai: boe" ngad: re yao: wa yao" qobo qhid' mae" aphug' khyo"- phaung" kyug' shid' dau: mangad: lao"- jid: au shid' dau: re- dadau: re wa qobo khyad' xeim: qhid' mae" gatau dadau: re wa phad' ngaui" byid' ra" ngaui" xeim: qhid' mae" Asang jhao" cili" nae" ngad: ra".
8 Yao: wa aijham re khinjaung pho" jhao" ciye: byid: mung:- khinjaung pho" wa ai: ngho' re qobo khyad' xeim: qhid' mae" sao qhid' ngaui" byid: nae" ngad: ra". Yao: wa ai: ngho' re au: maphyid' lo: lang zang: nai: khyug' pye' nae" ngad: ra".
9 Amung: ai: sa: daqhae: re phan ayae shad' khyo vhag' sheim" ke' nae" ngad: ra". Dang: ra" sa: re wa phan qao: mae zhin: khyo" pye' nae" ngad: ra". Ceru wa qobo re yu: pye' byid nae" qhid' mae" ngaui" xeim: ngad: ra".
10 Ai: thao yao: wa thung" li re cao" yang: ngho' shid' dau: ein: dau: re phad' ngaui" ra" ngaui" xeim: khyo" ngaui" byid: nae" ngad: ra". Khinjaung pho" wa aiyaug: nho: qobo qhid' mae" xeim: re ngaui" byid: mung:- yao: wa qobo khyad' pye' byid' ru qhug' li" nae" ngad: ra".
11 Byu dayaug wa phaung" kyug' shid' dau: mangad: lao"- jid: au shid' dau: re maqo" boe" ngad: re yao: wa cinman" phaui: dakyin: je re qobo ngaui" xeim: khyo" cili" nae" ngad: ra". Yao: wa aimae zhanlun xau- mangad: lao"- nae pyo: ja: re magai: ke' nae" ngad: ra". Pe"mung:ga"re airu wa qobo ngaui" xeim: ngad mung:- aiwa cinman" ngaui" xeim: mangad: ngad: ra".
12 Yao: wa aire khinjaung pho" jhao" ciye: nae" ngad: ra". Amung: khinjaung pho" wa aimae" dazhab' re yu: yu yang:- Asang re alhab' byid: va" ra" aso: khyo"- yao: wa aire phan dao mae zo:ve xeim: khyo" phad' ngaui" byid' li" nae" ngad: ra". Airu wa qobo re yu: pye' byid' ra" ngaui" xeim: ngad: ra".
13 Ceru: khinjaung pho" wa byu aiyaug: nho: qobo qhid' mae" xeim: ngaui" byid: nae" ngad: ra". Ailao" yao: wa qobo khyad' pye' byid' ru qhug' li" nae". Dang: ra" cinman" phaui: wa cinman" ngaui" xeim: re we' dakhyo:- khinjaung pho" qhid' mae" ngad: ra".
Dam: Khyug' Byid' Ra" xeim: Jham
14 Asang wa o mae ta" to" ra" thung" li jham re Moshe re byid' ra".
15 Dayaug yaug thaug makad' lo:- Asang qhid' mae" gyang" lho" ra" ja: re maqhaug' byid: yang: qobo shad' ngad: re yao: wa pe" qo mabo: ra" yao lo: mangad: lao"- cad' be, lo: dadau: dau: re yao" dam: khyug' byid' ra" xeim: khyo"- Asang jhao" cili" nae" ngad: ra". Gau jho re tarha" vao: ra" azhao" we' dakhyo: phyid' ca" ra".
16 Yao: wa maqhaug' byid: lo: to" to" ra" ja: qhid' mae" byid: nae" ru kad' mung:- ngo" zhao" laung: yang: byid: ca" ra". Yao: wa aire khinjaung pho" re byid: mung:- khinjaung pho" wa ai: gug'nyhug' re aiyaug: qobo qhid' mae" ngaui" xeim: khyo"- gug'nyhug' re ngaui" byid: nae" ngad: ra". Ailao" yao: wa qobo khyad' pye' byid' ru qhug' li" nae".
17 Dayaug yaug thaug makad' lo: Asang: amyin" dao: daja: ja: re shad' lhoe" yang: qobo qo" ngad: re- yao: wa qobo aphug' re byid: ca" ra".
18 Yao: wa qo mabo: ra" yao lo: mangad: lao"- cad' be, lo: dadau: re dam: khyug' byid' ra" xeim: khyo"- khinjaung pho" jhao" cili" ca" ra". Tarha" vao azhao" re cao" yang: ai: aphug' gau jho re phyid' ca" ra". Khinjaung pho" wa ai: ngaui" xeim: re byu aiyaug thaug makad' ra": shad' lhoe" qobo qhid' mae" xeim: ngaui" byid: nae" ngad: ra". Ailao" yao: wa qobo khyad' pye' byid' ru qhug' li" nae".
19 Airu wa yao: Asang re shad' lhoe" ra" qobo qhid' mae" dam: khyug' byid' ra" xeim: ngad: ra".