3
Zam" Khug: Ra" Xeim: Jham
1 Byu dayaug yaug wa yao" nung: dadau: re zam" khug: ra" ngaui" xeim: khyo" ngaui" byid: nae" ngad lao"- aiwa pe" qo mabo: ra" nung: jaung lo: mangad: lao"- nung: jaung zang ngad qo: ra".
2 Aiyaug wa yao" lo, re ai: gug'nyhug' nho: au: dao mae kai: mung:- aire Asang: qhid' kheim: Zaung kham: dung: mae se' nae" ngad: ra". Arun kaung mae" khinjaung qe wa sa: re phan byid shad' geim" khyo vhag' sin: genae" ngad: ra".
3 Amung: o mae ta" to" ra" gaung dau jham re wa zo:ve ngaui" xeim: khyo" Asang re qhaug' byid: genae" ngad: ra". Aijham wa khug lam khug sang: mae lham" to" ra" xau alhab'-
4 Noce' shid' ce' we' aimae lham" to" ra" xau- sang: gai: thao" ra" dau jham ngad: ra".
5 Khinjaung qe wa cegu: alhab' re phad' ngaui" byid' ra" xeim: jham we' daga" phan dao mae phad' ngaui" pye' nae" ngad: ra". Ce: zo:ve ngaui" xeim: meim sheim wa Asang re ngaui nhao: ra".
6 Yao- mangad: lao"- cad' be, re zam" khug: ra" ngaui" xeim: khyo" ci: ngad: re- airu wa pe" qo mabo: ra" alo: mangad: lao"- amyhi" ngad qo: ra".
7-8 Byu dayaug yaug yao re qhaug' byid' ngad: re- yao: wa ai: yao dao mae yao" lo, re kai: mung:- Zaung qhid' au: mae aire se' nae" ngad: ra". Khinjaung qe wa sa: re phan byid shad' geim" khyo vhag' sheim" ke' genae" ngad: ra".
9 Amung: o mae ta" to" ra" gug'nyhug' nho: gaung dau jham re Asang re byid' ra" zo:ve ngaui" xeim: khyo" qhaug: byid: genae" ngad: ra". Aijham wa xau- jang: thaung: nhae mae" phyid' yu: ra" shomyi: xau thaung:- sang: au jham mae lham" to" ra" xau alhab'-
10 Noce' shid' ce' we' aimae lham" to" ra" xau jham- sang: gai: thao" ra" dau jham ngad: ra".
11 Tarha" vao: ra" khinjaung pho" wa cegu: alhab' re Asang re ngaui" byid' ra" zo:ve ngaui" xeim: khyo" phan dao mae phad' ngaui" byid: nae" ngad: ra".
12-13 Byu dayaug yaug wa cad' be, re qhaug' byid' ngad: re- yao: wa cad' be, dao mae yao" lo, re kai" to: mung:- Zaung qhid' au: mae aire se' nae" ngad: ra". Khinjaung pho" wa sa: re phan byid shad' geim" khyo vhag' sheim" ke" nae" ngad: ra".
14 Amung: o mae ta" to" ra" gaung dau jham re Asang re ngaui" byid' ra" zo:ve xeim: khyo" Asang re qhaug' byid: nae" ngad: ra". Aijham wa khug lam khug sang: mae lham" to" ra" xau alhab'-
15 Noce' shid' ce' we' aimae lham" to" ra" xau- sang: je: gai: ra" dau jham ngad: ra".
16 Khinjaung pho" wa cegu: alhab' re Asang re ngaui nhao: ra" zo:ve ngaui" xeim: khyo" phan dao mae phad' ngaui" byid: nae" ngad: ra".
17 Israel byu khag' re: xau mangad: lao"- sa: re magai: zo: ngad: ra". Ceru wa yao: bam khai: mae na gengadqere: Israel byu alhab' yang apyad ato phug' cao: nae" thung" li ngad: ra".