17
Ba vao Shad' Mae" Manashe Amyu" Kaung
1 Yodan gyaung: ba vao shad' mung" dau dadau re Yoseb nho: zoqhid' yauggai zo: Manashe nho: myid:zo: qe daqhae: re jaung byid' ra". Manashe nho: zoqhid' yauggai zo: Gilead nho: yao: pho" Makhira wa gyekhe' sulhe: ngad: ra". Airumung: Yodan ba thug' shad' mae" Gilead we' Bashan mug: re yao: re jaung byid' ra".
2 Yodan ba vao shad' mug:myid re wa dang: ra" Manashe amyu" yham khaung qe ngad ko" ra" Abieze- Heleg- Asrie- Shekhem- Hephera- Shemida kaung qere jaung byid' ra". Cebam wa Yoseb nho: yauggai zo: Manashe nho: myid:zo: yauggai zo: qe ngad: ako". Yao: bam wa yham khaung vin mo, ngad: ako".
3 Manashe- Makhi- Gilead we' Hephera yauggai zo: Zelophehad wa yauggai zo: dayaug re: maqo" ngad: ra". Myiqe: zo: qeza: qo" ra". Yao: bam: mang wa- Mala- Noa- Hogla- Mikha- Tiza bam ngad: ako".
4 Yao: bam wa khinjaung Eleaza we' Nun nho: yauggai zo: Yoshu we' au: jhaung qejhao" ye mung:- ngonhaung" yauggai amyu" qeru: ngonhaung" re mug: myid gae byid: nae" qhid' mae" Asang: yang Moshe re amyin" byid' to" ava"- ga: ta" ako". Aimung: Asang amyin" byid' to" ru we' dakhyo: yao: bam re yao: bam: yauggai amyu" qe we' daga" mug:myid: re byid' ra".
5 Ai: mathao mae Manashe amyu" wa Yodan ba thug' shad' mae" Gilead we' Bashan bolaung: mung: gae bam daxe qo" khae: yu: ako".
6 Pe"mung:ga"re Manashe nho: myiqe: zo: qe wa yauggai myid:zo: qere" ru: mug:myid jaung byid' ru qhug' ako". Gilead mug: wa gatau dang: ra" Manashe nho: myid:zo: qere jaung byid' ako".
7 Manashe amyu" kaung nho: mug:myid wa Ashe mae" Shekhem ba thug' shad' Mikhmethad joe" sho' ngad: ra". Mug: kyo: wa mug: thao shad' Entapua byu qe na ko" ra" mug: khyo joe" lo" ra".
8 Tapua mug: lhang" gam: wa Manashe qe sang: ra" mug:myid ngad: ra". Ngadqere: mug: kyo: dao mae" Tapua vogaung: wa Ephrim nho: myid:zo: qe sang: ako".
9 Ailao" mug: kyo: wa Kana qid gyaung: zo: khyo lai: gyo" lo" ra". Ai: mug:myid wa Manashe qenho: mug:myid khug mae bobo sho' ngadqere: qid gyaung: zo: mug: thao shad' mae" vomo" jham wa Ephrim qe sang: ako". Manashe qenho: mug: kyo: wa qid gyaung: zo: mug: am: shad' cao" yang: lai: lo" mung: Mug:gaung: panglai: mae lo" thao" ra".
10 Ephrim wa mug: thao shad' Manashe wa mug: am: shad' Mug:gaung: panglai: wa yao: shid' yaug: nho: ba vao shad' mug: kyo: khyo" ngad: jo; ra". Ashe wa mug: am: ba vao shad'- amung: Isakha wa mug: am: ba thug' shad' mae ngad: ra".
11 Manashe wa Isakha we' Ashe mug:myid khug mae" Bed Shan we' Ibleam- aishid' vo re lhang" kham" to" ra" vogaung: jham we' daga"- Do (qid yae mae jo; ra") Endo- Tanag- Megido jham: nho: lhang" kham" to" ra" vogaung: jham rere: sang: ako".
12 Ngadqere: Manashe byu qe wa ai: vomo" jham mae na ko" ra" byu qere maqo" khe' thug' pye' ngad: ako". Aimung: Khanan byu qe wa aimae xo' yang: na: jo; ako".
13 Israel byu qe qam: je: bo: li" ko" au: lhao" re: Khanan byu alhab' re yao: bam makhe' thug' pye' ngad: ako". Ngadqere: yao: bam: qhid' mae" aibam re mau" deim" zag: zaui: nhao: ako".
Ephrim We' Manashe Qe Mug: Myid Je: Mho' Ko" Ru
14 Yoseb nho: myid:zo: qe wa Yoshu re- Ngonhaung" nho: mug:myid khyo" ai: mung" mae" dadau za: nao pe"mung: ngonhaung" re byid' i? Asang ngonhaung" re shaman" byid' ruyang ngonhaung" wa gyai myo: va"- ga: ta" ako".
15 Ailao" Yoshu wa- Naonhaung" gyai myo: gemung: Ephrim bam mug: wa naonhaung" qhid' mae" ngai ko" re wa sag' mo" yo khyo vao ye: mung: Perizi we' Rephaim byu qe: mug:myid re naonhaung" qhid' mae" lo" myo" khyad' yu ge,- ga: tau" ra".
16 Yao: bam wa- Bam mug: wa ngonhaung" na nae" maqui" ngad: ra". Ngadqere: pa: din" jham mae na ko" ra" Khanan byu qe wa gyekhe' myao: lhin" qo" ako". Bed Shan we' aire lhang" kham" to" ra" vogaung: jham we' Yezre lao:khaung: mae na mo, alhab' re: qo" ako"- ga: phaug' tau" ako".
17 Yoshu wa Ephrim we' ba vao shad' mae" Manashe kaung qere- gaigai: yao: naonhaung" wa gyai myo" ako". Naonhaung" wa qam: re: bo: ako". Naonhaung" wa gae bam dabam tho' je: qo" nae" ngad: ako".
18 Bam mug: wa naonhaung" mug: ngad: li" nae". Aiwa sag' mo" yo ngadqere: naonhaung" wa aire myo" pye' mung: aqhid shad' mae" athao shad' joe" sho' re sang: yu: li" genae". Khanan byu qere wa yao: bam gyekhe' jo, to' myao: lhin" qo" mung: qam: bo: ra" amyu" qe ngad sho' ngadqere: naonhaung" wa aibam re khe' thug' pye' li" nae"- ga: ta" ra".