18
Mung"dan: Nho: Dang: Ra" Mug: Myid
1 Yao: bam ai: mung"dan: re aung: yu thao- Israel byu phung: geim" Shilo jo, qo mae ham: phaung mung: Asang: qhid' kheim: Zaung re zhaug' to" ako".
2 Yao: bam nho: mug:myid gae bam majaung byid: shi" ra" Israel byu amyu" nhad' kaung na: ashiko".
3 Aimung: Yoshu wa Israel byu qere- Naonhaung" phug' pho" qenho: Mao"So Asang: yang naonhaung" re byid' to" ra" mung" re yesang: yu nae" rure khomyhao" joe" sho' lao" na shinae" ein ko" i?
4 Dakaung mae" byu sam yaug yaug ngore khyin byid: gela,- ngo wa aibam re yao: bam: jo,nho" khyo" yao: bam o: ra" mug:myid re yekho' yu genae" qhid' mae" mung" geim" khyo yao: bam re ngo nhao: ke' nae". Aimung: yao: bam ngojhao" dam: tug' lo: li" genae".
5 Aimung" re yao: bam: gyo: mae nhad' dau kho' nae" ngad: ra". Yuda wa ainho: mug: thao shad' mug:myid mae- Yoseb wa ainho: mug: am: shad' mug:myid mae thang: na: li" genae".
6 Aimung" dau nhad' dau re khyang" tung" mung: ngojhao" cili" geri:- ailao" ngo wa naonhaung" qhid' mae" ngonhaung" Mao"So re pha" ce' khyo" yang: qham byid: nae".
7 Ngadqere: Levi amyu" qe wa naonhaung" mae" dang: ra" mo, we' daga" mung"dan: gae bam re khae: yu genae" mangad:- pe"mung:ga"re yao: bam: gae bam wa Asang: khinjaung qekhyo" caung da" byid: nae" ru ngad: ra". Gad- Rubin we' ba thug' shad' mae" Manashe amyu" qe wa yao: bam: mug:myid re Yodan ba thug' shad' mae qo" yu: to: gau ngad: ra". Aiwa Asang: daui daui yaug Moshe yang yao: bam re byid' to" ra"- ga: ta" ra".
8 Ai: byu qe wa Yoshu yang- mung"dan: geim" khyo jao: sho' ye: ge,- mug: kyo: yekho' mung: ngojhao" dam: lo geri:- ailao" ce: Shilo jo, qo mae pha" ce' khyo" yang: naonhaung" qhid' mae" Asang re ngo qham byid: nae" ga: bin: pyang thao mung"dan: mug:myid alho re yetung" nae" qhid' mae" to" lo" ako".
9 Airumung: ai: byu qe wa mung" geim" khyo ye: yang: vogaung: mang japhin: jham re tung" mung: yao: bam: mug:myid re nhad' dau khoru: kho' ra" khyo re khyang" tung" ako". Ai: thao yao: bam wa Shilo mae" jamu khyo Yoshu jhao" dam: tug' lo: ako".
10 Yoshu wa aibam: qhid' mae" pha" ce' khyo" yang: Asang re qham byid: mung: Israel byu qemae" dang: jo; ra" amyu" khao: ngo" re mung"dan: mae" mug:myid dadau dau re jaung byid' ra".
Benyamin Amyu" Re Jaung Byid' Ra" Mug: Myid
11 Benyamin amyu" kaung yham khaung qe sang: yu nae" mug:myid re sao qhid' jaung byid' ra". Yao: bam: mug:myid wa Yuda we' Yoseb amyu" kaung gyo: mae jo; ra".
12 Mug: am: shad' mae yao: bam: mug: kyo: wa Yodan gyaung: mae" qhid mung:- Yerikho mug: am: shad' khyo myhao: do, lo" ra". Amung: ba vao shad' Bedaven din"pyad' yo joe" sho' bam mug: re lai: phyid' lo" ra".
13 Mug: kyo: wa Luza (Bethela ga: re: mhang" ra") mug: thao shad' khyo lo" mung: aimae"- Bed Horon o: tam" mug: thao shad' bam dao mae" Atarod Adda khyo gyo" lo" ra".
14 Aimae" gatau khyo dam: lo" ra". Cebam ba vao shad' mae" mug: thao shad' khyo lhang: lo" mung: Yuda amyu" qe sang: ra" Kiriad Bala (Kiriad Yearim) khyo lo" ra". Ce wa ba vao shad' mae" mug: kyo: ngad: ra".
15 Mug: thao shad' mae" mug: kyo: wa Kiriad Yearim gyeim: mae" qhid mung: Nebhtoa qid thug' khyo joe" lo" ra".
16 Aiwa Rephaim lao:khaung: mug: am: shad' akhyug mae jo, mung: Hinom lao:khaung: re the' myao: ra" bam mae" bam khyid khyo gyo" lo" ra". Aiwa mug: thao shad' Yebusi byu qe: bug dam: mug: thai: shad' mae" Hinom lao:khaung: khyo" lai: phyid' lo" mung: Enroge khyo joe" lo" ra".
17 Ailao" ai: mug: kyo: wa mug: am: Ensheme shad' khyo lhang: lo" mung: Adummim bam gyo: tau" te' ngad: ra" Gelilod khyo lo" ra". Aimae" Bohan (Bohan wa Rubin nho: yauggai zo: ngad: ra") laugbaui khyo gyo" lo" ra".
18 Amung: Yodan lao:khaung: re the' myao: ra" mug: am: shad' bam phyo: khyo" lai: lo" ra". Aimae" lao:khaung: khyo gyo" lo" mung:
19 Bed Hogla bam phyo: mug: am: shad' khyo" lai: lo" ra". Amung: Yodan gyaung: yug: vao: ra" Tham: Shid mug: am: shad' qid ko' mae lo" thao" ra".
20 Ba thug' shad' mae" mug: kyo: wa Yodan gyaung: ngad: ra". Ceru wa Benyamin amyu" yham khaung qe yao: bam: jo,nho" khyo" qo" yu: ra" mug:myid nho: mug: kyo: jham ngad: ra".
21 Benyamin amyu" yham khaung qe sang: ra" vomo" jham wa Yerikho- Bed Hogla- Emeg Kezi
22 Bed Araba- Zemaraim- Bethela-
23 Avim- Para- Ophra
24 Khepharammoni- Ophni- Geba- vomo" daxe: shid' vo we' aijham re lhang" kham" to" ra" vogaung: jham ngad: ako".
25 Amung: Gibeon - Rama - Berod -
26 Mizpa - Khephira - Moza -
27 Rekem - Irpe- Tarala-
28 Zela- Haeleb- Yebusi (vogaung:)- (Yerusalem) Gibea- Kiriad Yearim vomo" daxe: byid vo we' ai bam re lhang" kham" to" ra" vogaung: jham ngad: ako". Ceru wa Benyamin amyu" yham khaung qe yao: bam: jo,nho" khyo" qo" khae: yu ko" ra" mug:myid ngad: ra".