51
Babelon Re Je: Xo Sho' Dao: Kho' Ru
1 Asang wa- Babelon we' yao" byu qere gye kad' phyo' qheim" pye' ra" la re jhui" lo: na:-
2 Khovho re la: yang hug' tao" lo" ru we' dakhyo: Babelon re phyo' qheim" pye' nae" taung bug byu qere ngo nhao: ke' nae". Ai: phyo' qheim" ra" ba na joe" lo lao"- yao: bam shad' khao: ngo" khyo" khe' zin: mung: mung"dan: re pyad' lad sade: kad' to: co' avako".
3 Gyezo: qere yao: bam: myo: re bag nae" ayo, we' gyekhin re gaug: ve, nae" ayo, dabyid: ge,- zolau: qere datang" to: ge,- gyetab geim" re se' tam" pye' ge,.
4 Yao: bam wa dae de; mung: yao: bam: vogaung: jham: nho: hau" mo" khyo jham mae shid li" genae".
5 Qam: bo: ra" Mao"So Asang ngo wa- yao: bam: Israel nho: gyang" lho" ra" yaug ngad: ra" ngore gye kad' gesho' ngadqere: Israel we' Yuda re ngo mashapye' nae".
6 Babelon mae" tao" phao ge,- naonhaung" kao so' loe, sho' tao: ge,- Babelon nho: qobo mathao mae se' pye' daqhug' ge. Yao: man: qi" ru we' dakhyo: yao: re qobo dae byid: mung: ana" ngo lage, phaug' byid: va".
7 Babelon wa nga" lo, mae bo: ra" qhang keim we' dau: ra". Mug: myid geim" re shaug' yid nhao: na: ra" keim we' dau: ra". Byumyu" mung"dan: jham wa ai sabyi qang: re shaug' mung: go: lo" byaug: ako".
8 Babelon wa nyag din taung" byo; gyo" lo" mung: phyo' qheim" pye' qhug' ra". Yao" mathao mae kaug' ngug ge,- yao" dae khu qhid' mae" mocid' qho ge,- ai: dae khu gai: re gai: lo" maba-
9 Aimae na: jo; ra" taung bug byu qe wa ngonhaung" Babelon re bao" thaug' byid: nae" phin" na ngadqere:- saung" thao gyo" byaug va". Ana" to: co' mung: yham khyo phao: lo" gelang: se,- Mao"So wa yao" qam: so' alhab' yang: Babelon re qobo dae byid: mung: aire bin sho' phyo' qheim" pye' ava"- ga: ta" ako".
10 Asang ta" ru wa- nga" byumyu" qe ceru: ga: hug' ako". Yao: bam wa ngonhaung" din man" rure Asang qhu" byid' ava". Yerusalem mae na: ra" mo, re ngonhaung" Mao"So Asang kad' va" khyo yeta" kyo: gelang:- ga: ta" ako".
11 Asang wa Media kho:kham qere lhau: zhung" ke' ava". Pe"mung:ga"re yao: wa Babelon re phyo' qheim" pye' nae" yaung: to" ra". Ai: mathao mae yao" Caung:pa" Yham re phyo' qheim" pye' ru qhid' mae" ngo lage, phaug' nae". Asang: gyezug: pho" wa naonhaung" myo: jham re ceim sho' kad' ge,. Naonhaung" nho: go jham re jin" jin" kad' ge,.
12 Babelon vang jham re khe' zin: nae" ve, so: byid: ge,- zaung" mo, re qam: laung: ge,- jin" byu nha: ge,- khug' lham: na nae" byu san: to: ge- ga: amyin" byid' ra". Babelon byu qere yao: kad' nae"- ga: ta" to: va" rure Asang kad' ava".
13 Ai: mung"dan: wa qid gyaung: mo" myo: sho' we' jo,nho" myo: sho' qo" ngadqere: yao" ayo, wa joe" mung: yao" kao so' khyang tham: wa phyid' pye' qhug' ava".
14 Khyag' phaung" jham we' dakhyo: Babelon re khe' zin: nae" byu myo: sho' re yao: jhui" li" nae"- ga: yao" kao so' re lao: yang: qam: bo: ra" Asang jham tang" to" ava". Yao: bam aung doe; thoe we' hug' li" genae".
Mao"So Re Caung:khin" Ra" nghaui" caung:
15 Asang wa yao" qam: so' yang myid gaung re phan" to: mung:
yao" pha,jhi" yang mug: myid re yao: phan" yang: mug:gaung re phyid: yheim" to" ra".
16 Yao" amyin" yang mug:gaung tho' mae" qid jham myang: ako".
Yao: wa myid gaung thao" sho' mae" jham thaui: jham re cilo: ra".
Yao: wa mug: qu mae lhe' cad' cad' nhao mung:- yao" zai to: qe, mae la re nhao: ke' ra".
17 Ce: myao jao: mathao mae byu qe wa go thoe- kopyad' thoe gyo" ako".
So alho jham re kad' mo, wa qho' phau" ako".
Pe"mung:ga"re yao: bam kad' ra" so jham wa apyag' ngad mung: kao mabo ngad: ako".
18 Yao: bam pe" phug' made, mung: maphug' makhyad' kad' qhug' ang: ako".
Asang yao: bam jhao" joe" li" lao"- yao: bam phyo' pye' qhug' li" genae".
19 Yaku nho: Mao"So wa aibam we' madau- yao: wa ja: khao: ngo" re phan" yaug ngad: ra".
Israel byu qere yao" byu boe" nae" yao: khyin: yu: to" ava".
Yao" mang wa qam: bo: ra" Asang ga" ru ngad: ra".
Asang: Nho: Be, Dau
20 Asang wa Babelon we"- nao wa nga" be, dau- nga" gye poe nho: shae lhae ngad: ra".
Byumyu" qe we' mung"dan: re khyoe' pye' nae".
21 Myao: jham re we' jui: mo, re- myao: lhin" jham we' aijham re keim: mo, re khyoe' mhan" pye' nae".
22 Yauggai- myiqe: qere se' pye' nae"-
apyad qi: mo, we' ngai mo, re je; khyo" nae"- yauggai- myiqe: nau" qere se' pye' nae".
23 Yao lhaug' mo, we' yao: bam: yao kyaung" jham re se' pye' nae".
Yo kad' mo, re we' yao: bam: yophaug' myao: jham re se' pye' nae".
Eib mo, we' aya: myhao: ra" gyezug: qere se' pye' nae" qhid' mae" nao re ngo ci: ra"- ga: ta" ra".
Babelon Nho: Qobo Dae
24 Asang wa Yerusalem re yao: bam kad' lo ko" ra" makhyang" ru alhab' qhid' mae" Babelon we' yao" byu qere ngo aphug' tug' byid' rure naonhaung" myao: li" genae".
25 Babelon we"- nao wa mug: myid geim" re phyo' qheim" pye' ra" bam we' dakhyo: ngad: ra". Ngadqere: Asang ngo wa ni" gyevo ngad:- ngo wa nao re zaui" yu yang: nao re myid gaung khyo tae" pye' nae" nao re myi mhab bam za: tang" to: nae".
26 Ni" nho: byo; qeim: rumae" laug baui dabaui re: yham zhaug' rumae- madam: ci lo nae". Naonhaung" wa apyad ato mae din"pyad' yo we' dakhyo: boe" li" nae". Asang ngo ta" to: va".
27 Gyekhe' nae" ve, so: byid: ge,- byumyu" qe the' gyo: genae" qhid' mae" labo" re mad ge,- Babelon re gye kad' nae" qhid' mae" byumyu" qere nyhang" seim" ge,- Ararad- Minni we' Ashkena mung"dan: kho:kham qere gyekhe' zin: nae" ta" ge,- gyekhe' rure au: jhui" she nae" gyezug: dayaug re khyin: san: to: wa,- khyag' phaung" jham we' dakhyo: myao: jham re she: lo ge,-
28 Babelon re gyekhe' nae" qhid' mae" byumyu" qere nyhang" seim" ge,- Media kho:kham qe- yao: bam: au: jhaung qe- gyezug: qe- yao: bam: yang eib: ra" mung"dan: alhab' mae" gyetab jham re khai nhao: ke' ge,.
29 Asang wa Babelon re byu khag' mana: ra" din"pyad' yo kad' pye' nae" yao" yaung: to" ra" mau" re kad' thug' ke' va" ruyang myid gaung wa ko, ko, laui" nin" ako".
30 Babelon gyezo: jham gyekhe' rure thang: pye' mung: yao: bam: gyetab mae na: jo; ako". Yao: bam: vae" myid baui" byaug mung: myiqe: qe we' dakhyo: boe" lo: ako". Vogaung: kham: jham wa byo; gyo" lo" byaug mung: yham jham wa myi: nga" lo" ako".
31 Yao" vogaung: wa shad' khao: ngo" byo; qeim: vao lo: ra" khyo Babelon kho:kham re yeta" kyo: byid: nae" qhid' mae" lagyo: dayaug: thao dayaug tao" ye" ako".
32 Gyevo qe wa qid gau" ra" gau: khung: re sang: yu: pye' mung: gyetab jham re myi: ngha" pye' ako". Babelon gyezo: qe byodin byo sho: boe" pye' ako".
33 Mamyao" re- gyevo qe wa thau: khyo" pye' yang: yao: bam re gaug nao: jao: mae" gaug re we' dakhyo: zab: nhae" pye' li" genae". Israel nho: Mao"So- qam: bo: ra" Asang ngo ta" to: va"- ga: ta" ra".
34 Babelon kho:kham wa Yerusalem re je, yang: zo" pye' ra".
Yao: wa vogaung: re yae: keim we' dakhyo: akeim kad' pye' mung:- yui we' dakhyo: aire myug: pye' ra".
Yao: o: ra" gu: re yu: yu mung: dang: ra" gu: re shapye' pye' ra".
35 Ngonhaung" re aqan alan kad' ru qhid' mae" Babelon wa qo yu vashao: ein: Ziun mae" byu qere ta" nhao ge,-
ngonhaung" dayin dayo: aqug: akhai: kham zo" ru qhid' mae" Babelon wa qo yu vashao: ein: Yerusalem byu qere ta" nhao ge,- ga: ta" ra".
Israel Re Asang Bao" Thaug' Nae"
36 Airumung: Asang wa Yerusalem byu qere ngo wa ni" khyo re jhui: mung: nao re kad' byid: nhao nae" ni" gyevo qere aphug' byid: nhao nae". Ngo wa Babelon mung" mae" qid thug' re kin" lo" nhao mung: qid gyaung: jham re kin" ho: lo" nhao nae".
37 Ai: mung"dan: wa seyo: gug'nyhug' lhe: jham na: ra" byo; qeim: bam: jo; ra" jo, qo boe" nae". Aiwa qu" gyaug qu" din sho' ra" myao jao: ngad: li" nae". Aimae khag' re mana nae". The' myao: ra" mo, wa gyaug: din: li" genae".
38 Babelon byu qe alhab' wa khang khyi jham we' dakhyo: kyid' mung: khang khyi nau" jham ru: myang: li" genae".
39 Yao: bam myo, no, so' kho' ako" i? yao: bam re ngo zo: shaug' poe kad' byid: mung: shaug' yid nhao yang: pyo: nhao nae". Yao: bam yab: lo" mung: khonhae" re: madam: so" li" lo: genae".
40 Ngo wa yao: bam re yao nau" jham- cad' be, jham- yao lo: jham re we' dakhyo: se' pye' nae" qhid' mae" she: ye: nae" Asang ngo ta" to: va"- ga: ta" ra".
Babelon Nho: Au: Pa
41 Babelon we' sin: yang: Asang ta" ra". Mug: myid geim" yang ceim" khin" ko" ra" vogaung: wa sang: yu: pye' ru qhug' ava". Byumyu" qe qhid' mae" Babelon wa gyaug din pho" ra" myao jao: boe" lo: ava".
42 Pang:lai:: wa Babelon dao mae dang" nhai" lo" mung: myang: ra" bang: lhung" jham: yang aire nhai" pye' ako".
43 Vogaung: jham wa gyaug din pho: myao jao: boe" li" mung: khag' re: mana- khag' re gyaung: masu" lai: ra" jo, qo qid majo; ra" din"pyad' yo we' dakhyo: boe" lo: ra".
44 Ngo wa Babelon so Bela re qobo dae byid: mung: yao" khug' to" ra" zai jham re to" pye' nhao yang: byumyu" qe re yao: re macaung:pa" nhao lo nae". Babelon nho: vang jham wa byo; gyo" byaug ako".
45 Israel byu qe we"- aimae" tao" phao ge,- thin: ra" nga" nhag' jam: yo" rumae" naonhaung" kao loe, sho' tao: ge,-
46 Naonhaung" the' gyo" ra" madang: ra" lau dao: mathao mae sang: danin" ge,- dagyaug ge,- zin khao: ngo" majho" zhaung" ra" lau dao: ngad: ra" mung"dan: mae" aqan alan lau dao: kho:kham dayaug we' dayaug gye jho" khe' ra" lau dao: hau" pyo: ako".
47 Ngo wa- Babelon mung"dan: nho: so alho re dao: phyid' nae" ayo, joe" lo: na: ra". Mung"dan: geim" wa qho' phau: nae"- ainho: byu qe alhab' wa se' pye' qhug' li" genae".
48 Yao: re phyo' qheim" pye' nae" mug: am: shad' mae" joe" li" mo; lo, khyo Babelon gyo" vao lo" lao"- myid gaung dao mae jo; gu: alhab' we' mug:gaung mae jo; gu: alhab' bau: yang: hug' li" genae".
49 Babelon wa mug: myid alhab' mae" byu qere shid nhao mung:- Israel byu qe gyai myo: sho' re shid nhao: pye' va" ruyang- Babelon wa gyoe; gyo" lo" li" nae"- ga: ta" ra". Ngo Asang ta" to: va".
Babelon Mae" Israel Byu Qe: Qhid' Mae" Mao"So: Mungdao:
50 Asang wa Babelon mae na ko" ra" yao" byu qere- shid: rumae" naonhaung" phao: loe; avako". Ana" lo" gese,- dalao" ge,- naonhaung" wa va" ra" mung"dan: mae na gesho' ngadqere: naonhaung" Asang ngore myid: beim: gela,- Yerusalem re myid: beim: ge,.
51 Yao: bam ta" ru wa- ngonhaung" qho' phyo' qhug' mung: nga: yeim va"- taung bug byu qe wa Caung:pa" Yham mae" gyang" lho" jo, qo jham khyo jhui" lo" qhug' geyang: ngonhaung" bin sho' maqo" lab sho' boe" byaug va"- ga" ru ngad: ra".
52 Airumung: ngo ta" ru wa Babelon nho: so alho jham re ngo dao: phyid nae" ayo, joe" li" na: ava". Aimung: dae de; mo, wa mung"dan: jao: sho' mae nokyang: kyang" li" genae".
53 Babelon wa mug:gaung khyo qo" do, lo" mung: aimae tang: ra" gyetab qo" zhaug' sho' ngadqere: aire phyo' pye' nae" byu qere ngo nhao: ke' shinae". Asang ngo ta" to: va"- ga: ta" ako"- ga: ta" ra".
Babelon Je Yang: Byo; Qeim Ru
54 Asang ta" ru wa- Babelon mae gyi: ngug: na: ra" thoe re tae"gyo: mung: mung"dan mae phyo' qheim" pye' ru qhid' mae" kaug' ngug ge,.
55 Ngo wa Babelon re phyo' pye' na: mung: cae: jhug tag boe" nhao: na:-
Gyezo: qe wa bang: lhung" myang: ru we' dakhyo: tao: mung: gyekhe' yang: zag: hug' ako".
56 Babelon re phyo' qheim" pye' nae" yao: bam joe" li" ako".
Yao" nho: gyezo: qe wa taung" yu: pye' qhug' mung: yao: bam: lo, la: jham gyug' byaug: ava".
Ngo wa makhyang" rure qobo dae byid' ra" yaug Mao"So ngad:-
Yao: man: qi" ru we' dakhyo: Babelon re ngo kad' nae".
57 Ngo wa- yao: bam: eib mo, re- pha,jhi" ba mo, re au: jhaung qere- gyezo: qere- yid nhao nae".
Yao: bam yab lo" mung: khonhae" re: maso" li" lo: genae".
Asang kho:kham ngo ta" to: va". Ngo wa qam: bo: ra" Asang kho:kham ngad:-
58 Qam bo: ra" Babelon vang jham wa myid gaung khyo pye' khyo" pye' qhug' li" nae".
Ainho: gyebyu Zaung kham: jham re ngha" khyo" pye' nae".
Byumyu" qenho: mau" zo" wa pe" mangad: ngad: ra".
Yao: bam: qam: ke' ru wa myishae mae do, lo" byaug ra".
Asang ngo ta" to: va"- ga: ta" ra".
Yeremia Nho: Mungdao: Babelon Khyo Vhin: Ke' Ru
59 Kho:kham Zedekia nho: gaung cao zug: pho" wa Maseia nho: yao: myid:- Neria nho: yauggai zo: Seraia ngad: ra". Zedekia Yuda kho:kham kad' ru byid zin ein: zin mae Seraia wa yao: we' daga" Babelon khyo ye" lo" gemung:- ngo wa yao: re mho" shid' dao: daqhae: re byid' ke' ra".
60 Babelon we' sin: yang: ce: gatau alhab' we' dakhyo: phyo' qheim" ru alhab' wa Babelon dao mae joe" li" nae" ngad: ra" khyo mugsug' dapaug' mae ngo tung" va".
61 Ngo wa Seraia re ceru: ta" va". Nao Babelon khyo joe" ye: lao"- cemae tung" to" ru ja: khao: ngo" re mo,byu qere thoe qi: we' nghe' kyo: ca" rure beim: wa,-
62 Ai: thao ceru: akyu" mho' mung: Asang we"- byu re:- gug: nyhug' re: aimae khag' re: mana lo: apyad ato mae din"pyad' yo we'- dakhyo: boe" nae" qhid' mae" ce: jo, qo re phyo' qheim" pye' zai ngad: ga: nao ta" to" ava".
63 Seraia we"- mo,byu qere ce: mugsug' paug' re nao bin: nghe' kyo: lao"- aire laug baui mae taui" te' mung: aire Uphrad gyaung: khyo pye' zaui: pye' wa,.
64 Aimung: ta" wa, ceru wa, Babelon re boe" li" nae" ru ngad:- Asang: yang ai: dao mae phyo' qheim" ru boe" nhao nae" ngad: ruyang ai wa nab: vao lo" mung: khonhae" re: madam: to" li" lo nae". Yeremia nho: mungdao: wa cemae thao" va".