50
Babelon Taung" Pye' Qhug' Ru
1 Ceru wa Babelon vogaung: we' yao" vobyu qe: khyo we' sin: yang: Asang: yang ngore byid' ra" mungdao: ngad: ra".
2 Aiwa- byumyu" qe re lau dao: ta" kyo: ge,- aire ta" hau: ge,.
Ve, so: byid: mung: lau dao: re ta" hau: ge,- aire dazug' to: ge,- Babelon wa gyoe: gyo" byaug: ava".
Yao" nho: so Madug wa gyoe; man" byaug: ava".
Babelon nho: so alho maca' majhad' khyao dau alho jham wa be; khyoe' mhan" pye' qhug' ava".
3 Mug: am: shad' mae" byu damyu" wa Babelon re gyekhe' nae" joe" li" mung: aire din"pyad' yo kad' pye' li" nae". Byu we' gug'nyhug' jham wa tao" phao: lo" byaug mung: aimae khag' re: mana genae"- ga" ru ngad: ra".
Israel Dam: Tug' Lo: Ru
4 Asang ta" ra"- ai: ayo, joe" lo lao"- Israel we' Yuda byu qe wa ngug byid wa zho, ga: yao: bam: Mao"So ngore li" qho: li" genae".
5 Ziun khyo ye" ra" khyodang re yao: bam myid' li" genae". Ailao" ai: khyo shad' khyo ye" lo" li" genae". Yao: bam wa apyad ato dao: thang" re ngo we' kad' li" genae". Aire khonhae" re: yao: bam maphyo' pye' nae".
6 Nga" amyu" byu qe wa yao: bam: yao lhaug' yaug: yang bam khaung: mae byaug: lo" nhao: ra" yao jham we' dakhyo: ngad: ako". Yao: bam wa bam dabam mae" dabam khyo du" lae" lo" byaug: ra" yao jham we' dau: ako". Yao: bam: yham khai: mae ngad: rure to" myhid' pye' ako".
7 Yao: bam wa yao: bam re myao: ra" mo, alhab' yang khe' zin" ru qhug' ako". Yao: bam: gyevo qe wa- Asang re yao: bam: qobo shad' lhoe" avako". Amung: ngonhaung" kad' ru wa mashad'- yao: bam: phug' pho" qe wa Asang re khug ngha: ako". Yao: bam yao: wa yao" khug mae jhaug' zaug za: na: jo, ang: ako".
8 Israel byu qe we" Babelon- mung"dan: mae" phao: thug' ge,. Ai: mung"dan: mae" thug' lo" ge,- qhid' to" lo" mo, boe" ge,.
9 Ngo wa mug: am: shad' mae qam: bo: ra" byumyu" daphung: re lhau: zhung" ke' mung: Babelon re khe' zin: nhao nae". Yao: bam: mung"dan: re gye kad' nae" qhid' mae" gye poe mae jin: ye; jo; li" genae". Aire aung: pye' wa,. Yao: bam wa sho: qho kung mo,- thao te re khonhae" re: mashad' losho' myo: ba: bag: ra" sho: kung" mo, ngad: ako".
10 Babelon wa lhad' zo: phyo' zo: qhug' nae"- lhad' zo: phyo' zo: mo, wa yao: bam o: gu: alhab' re yu: lo" li" genae". Asang ngo ta" to: va" ga" ru ngad: ra".
Babelon Gyo" Seim" Lo" Ru
11 Asang wa- Babelon byu qe we"- nga" byumyu" re naonhaung" phyo' zo" pye' avako". Naonhaung" wa pyo: mung: bau" ako". Gaug nao" ra" nung: jaung zang du" lhau: ru we' dakhyo:- myang: qin" ra" myao we' dakhyo: ngad: ako".
12 Ngadqere: naonhaung" yao" qi" qhang: ra" vogaung: wa deim" khyo" pye' ru qhug' mung: nga: yeim: ru qhug' ava". Babelon wa byumyu" alhab' tho' mae ngai: thao" ngad: li" nae". Aiwa kyaug' ho: mung: qid majo; ra" din"pyad' yo boe" li" nae".
13 Nga" nhag' yo" ru mathao mae Babelon mae khag' re: mana nae". Aiwa- byo; qeim: bam jo; li" nae" su" lai: lo" mo, alhab' wa din: mo, mung: mug' hao" byaug genae".
14 Lo, la: ci" mo, we"- Babelon re gyekhe' nae" qhid' mae" jin: ye, ge,- aire lhang" kham" to: ge,. Naonhaung" nho: myo: jham alhab' re Babelon re bag ge,- pe"mung:ga"re yao: wa Asang ngore qobo shad' lhoe" geyang: ngad: ra".
15 Vogaung: avai: ayae mae" mo, gye poe hug' thoe to' ge,- ana" Babelon wa lo, tau: pye' ava". Yao" nho: vang jham thaung" thad' pye' mung: byo; gyo" jo; ava". Babelon byu qere ngo lage, phaug' nae". Aimung: yao: bam re naonhaung" lage, phaug' yu ge,- su gaje qere yao: bam kad' ko" ru we' dakhyo: yao: bam re kad' ge,.
16 Ai: mung"dan: mae qhovo: shi: jham dayaug nhao ge,- qhovo: re: dajham" yu nhao ge,- aimae na: jo; ra" taung bug byu yaug khao: ngo" wa gyekhe' ra" gyezo: qeyang kyaug' tin" re qhug' mung: yham khyo phao: lo" li" genae" ga" ru ngad: ra".
Israel Dam: Tug' Lo: Ru
17 Asang wa- Israel byu qe wa khang khyi jham: yang khe' sin" ke' qhug' ra" yao jham we' dakhyo: ngad: ako". Sao qhid' mae yao: bam wa Asuri kho:sin" yang khe' zin" ru qhug' ako". Amung: Babelon kho:kham Nebugkhaneza wa yao: bam: shoqug: re khai" li" nae".
18 Ce: mathao mae Israel nho: Mao"So qam: bo: ra" Asang ngo wa Asuri kho:sin" re qobo dae byid' ru we' dakhyo: Nebugkhaneza we' yao" mung"dan: re qobo dae byid: nae".
19 Israel byu qere yao: bam: mug: myid re ngo dam: byid: nae". Yao: bam wa Khame bam dao mae we' Bashan mug: mae qho" ra" zo:ve re zo" li" genae". Yao: bam wa Ephrim we' Gilead mug: myid mae qho" to" ra" qhovo: qhoshi: jham re yao: bam o: nho" qhug' zo" li" genae".
20 Ai: ayo, joe" lao"- Israel mae pe" qobo mamyao nae"- Yuda mung" mae makhyang" ru pe" majo, nae". Pe"mung:ga"re ngoyang kao so' lhoe' to: byid' ra" mo, re ngo qobo khyad' byid: nae". Asang ngo ta" to: va"- ga: ta" ra".
Babelon Re Mao"So Dao: Kho' Ru
21 Asang wa- Merathaim we' Pekod byu qere khe' zin: ge,- yao: bam re se' tam" pye' ge,- ngoyang naonhaung" re amyin" byid' to" ru ja: khao: ngo" re kad' ge,- Asang ngo ta" to: va".
22 Mung"dan: mae gyekhe' poe hug' thoe the' gyo"- qi: sho' byo; qeim: ru boe" ra".
23 Babelon mung" wa mug: myid geim" re aje, aman" be; mhan" pye' ra"- ana" ai: be, dau wa be; khyug' pye' qhug' ako". Ai: mung"dan: mae boe" va" ra" mau" mae byumyu" alhab' din: mo; li" genae".
24 Babelon mung" we"- nao ngore gyekhe' ava"- aire nao maba yang: ngoyang nao re khae: to" ra" lha" mae nao myi" ava".
25 Nga" shae lhae jham shaung: to" ra" jo, qo re ngo phung" byid: va". Nga" nhag' yo" rumae yao: bam re ngo jhui" thug' yu va". Pe"mung:ga"re qam: bo: ra" kho:kham Asang ngo wa Babelon mung" mae zaui: nae" mau" qo" ra".
26 Aire shad' khao: ngo" khyo" khe' zin: ge, yao" gaug zo: jhi jo; ra" jo, qo jham re thaung" thad' ye: ge,- gaug bam we' dakhyo: lanyab jham re bam: to: ge,- mung"dan: re phyo' qheim" pye' ge,- dajhid' re: datang" to: ge,.
27 Yao: bam: gyezo: qe alhab' re se' pye' ge,. Ai bam re je; pye' ge,- Babelon byu qe wa jeim" avako". Yao: bam re qobo dae byid: nae" ayo, joe" lo: ava".
28 (Phao: khug mo, wa Babelon mae" phao: loe; lo mung: Yerusalem khyo joe" lo: ako". Ngonhaung" Mao"So Asang wa Babelon byu qeyang yao" Caung:pa" Yham kad' lo: ra" qhid' mae" khoru: lage, phaug' byid' ra" khyo re yao: bam ta" ako".)
29 Babelon re khe' zin: nae" qhid' mae" lo,la: bag mo, re ta" wa,- lo,la: we' myo: re khoru: ci nae" ba: ra" mo, yaug khao: ngo" nhao: ke' ge,- vogaung: re vang" to: mung: dayaug rere: da phao: loe, nhao ge,. Yao: kad' ru qhid' mae" aphug' tug' byid: ge,- su gaje qere yao: kad' ru we' dakhyo: yao: re kad' ge,. Pe"mung:ga"re yao: wa Israel nho: gyang" lho" yaug ngore gye kad' yang: ngad beim" ra" lo,mau" kad' ra".
30 Airumung: yao" zolau: qe wa vogaung: hau" mo" khyodang mae se' pye' qhug' li" genae". Ai: ba na mae yao" gyezo: qe alhab' wa se' tam" pye' ru qhug' li" genae". Asang ngo ta" to: va".
31 Babelon we"- nao wa ngad beim: myid byang" jo; ra". Airumung: qam: bo: ra" kho:kham Asang ngo wa nao re gye kad' va". Nao re qobo dae byid' ra" ayo, joe" lo: ava".
32 Ni" nho: ngad beim" ra" byumyu" wa khyid au: thaung: yang: gyang: lang" lo" ava". Nao re tau: to' yu nae" khag' mana- ni" vogaung: jham re ngo myi" yang ngha" pye' nae". Lhang" gam: mae" ja: khao: ngo" wa phyo' qheim" pye' qhug' genae".
33 Qam: bo: ra" Asang wa- Israel byu qe we' Yuda byu qe wa zag zo: qhug' ako". Yao: bam re taung" yu mo, alhab' wa yao: bam re te' te' zaung" mung: manhao: ke' ngad: ako".
34 Ngadqere: yao: bam re khyad' yu nae" yaug wa qam: bo yaug- yao" mang wa qam: bo: ra" Asang ngad: ra". Yao: yao: wa yao: bam: mau" re qo yu byid: mung: myid gaung khyo ngaui pyo: yaug yo: ru cili" byid: nae". Ngadqere: Babelon byu qere wa qug: khai: qhug' li" genae"- ga: ta" ra".
35 Asang wa Babelon qhid' mae" shid: ru- yao" byu qe yao" zug: qe- yao" pha,jhi" ba mo; qhid' mae" shid: ru ngad: ra".
36 Lang" jo; ra" lapa qe: qhid' mae" shid: ru- yao: bam khoqhi" go: ako" i?
Yao" nho: gyezo: qe: qhid' mae" shid: ru- yao: bam khoqhi" gyaug din pho: ngad: ra" i?
37 Yao" nho: myao: jham we' myao: lhin" jham re phyo' qheim" pye' ge,.
Yao" nho: lhaung: to" ra" gyezo: qe: qhid' mae" shid: ru- yao: bam khoqhi" sho' qam: nang" ako" i?
Yao: nho: jo,nho" jham re lhad' zo: phyo' zo" yu ge,.
38 Yao" nho: mung"dan: dao mae kyaug' khyi ru boe" nhao mung: yao" qid gyaung: jham kin" lo" byaug: ako".
Babelon wa byu qere ago boe" nhao: pye' ra" so alho jham: yang kyaug' tin" ra" mung"dan: ngad: ra".
39 Aimung: Babelon wa min: yui jham- masan: ra" byo jham- makhyang" ra" ngho' jham: yang kyaug' ru qhug' li" nae". Joe" lo nae" ayo, khonhae" re: aimae byu madam: na genae".
40 Sodom we' Gomora avai: ayae mae" vogaung: jham re ngo phyo' qheim" pye' au: boe" ru we' dakhyo: Babelon dao mae airu yao: boe" li" nae". Ai mae khag' khonhae" re: madam: na lo: genae". Asang ngo ta" to: va".
41 Mug: am: shad' mae jo; ra" mung" mae" byu qe li" na mung: va" ra" mung" mae" qam: bo: ra" byumyu" joe" li" na: ra".
Kho:kham myo: sho' mo, gye poe qhid' mae" seim" na: ako".
42 Yao: bam: lo, la: we' shae pyang: jham re yu: ci: avako".
Yao: bam wa lhe: mung: nhag' khyag' myid mabo ngad: ako".
Yao: bam: myao: jham: dao mae yao: bam jui" au: panglai: qid myang thoe we' dakhyo:- myang: ako".
Babelon re gye kad' ra" gye poe qhid' mae" yao: bam jin" jin" kad' to" ako".
43 Lau dao: re Babelon kho:kham the' gyo: mung: yao" lo, qeim lao" jo; ra".
Yao: wa myid myo: myid laug: ruyang re: zo:khau no no: ra" myiqe: dayaug ru: no: ruyang re: aung: pye' qhug' ra".
44 Yodan gyaung: cao" yang: nyhug lao: qam" ra" mhin: gyo, jao: joe" sho' mae yaug ra" sag' mo" yo mae" khang khyi dadau: thug' li" ru we' dakhyo: Asang ngo thug' li" mung: Babelon byuqere yao: bam: vogaung: mae" nyag din taung" tao" phao: lo" nhao nae". Ailao"- ngoyang khyin: yu: ra" au: jhaung wa byumyu" re eib: li" nae". Ngo we' khoyaug dau qo" tau" ko" i? Ngo re khag' jho" qhao: nae" vae" lhaung: i? Pe" ru" ra" eib yaug ngore gye qo" kad' nae" i?
45 Airumung: Babelon vogaung: re we' ai: vogaung: byu qere ngo gye kad' yang: yaung: to" ra" khyo re tae" gyo: wa,- yao: bam: zoshao qere lhao" re: she: khyad' pye' ru qhug' li" genae". Yaug khao: ngo" wa gyaug: din qhug' li" genae".
46 Babelon gyo" lo" byaug lao"- thoe qi: thug' li" mung:- myid gaung geim" laui" nin" li" nae". Peim: byid' ra" hug' thoe wa gatau: byumyu" qeyang the' gyo" li" genae"- ga: ta" ra".