52
Yerusalem Gyo" Seim" Lo" Ra" Khyo
(2 Kh 24.18-25.7)
1 Zedekia wa yao: Yuda kho:kham boe" lo: au:- shid xe: dazin ngad: ra". Yao: wa Yerusalem mae daxe: dazin eib: na: ra". Yao: myhi" nho: mang wa Libna vogaung: mae na: ra" Yeremia nho: myiqe: zo: Hamuta ga: yaug ngad: ra".
2 Kho:kham Zedekia wa kho:kham Yehoiakim kad' ru we' dakhyo: Asang re qobo shad' ra".
3 Asang wa Yerusalem we' Yuda byu qere saung" nhag' yo: yang: yao" myo, khung: mae" khe' thug' pye' ra". Zedekia wa Babelon kho:kham Nebugkhaneza re gye kad' tau: lhan: mung:-
4 Nebugkhaneza wa Zedekia eib: ru gug zin ein: zin lho" daxe khye' ein: khye' daxe ba mae yao" gyetab alhab' we' joe" li" mung: Yerusalem re li" khe' zin" ra". Yao: bam wa vogaung: taung gaung shad' mae jamu kad' mung: aire vang khyae bao kad' yang: vang" ci: ako".
5 Zedekia eib: ru daxe: dazin byang" sho'- xo' yang: vang" ci: ako".
6 Aizin lho" byid khye' ein: khye' gug ba ein: ba bao" khug' saung" no, yang: mung" byu qe zo:ve madang lo:ngad: ako".
7 Vogaung: vang jham wa be; thad' pye' qhug' ra". Babelon byu qe vang" ci sho' ngadqere: gyezo: qe alhab' wa myi" re phao: loe; lo" byaug: ako". Yao: bam wa kho:kham nho: khyae khyo" thug' lo" mung: vang khyae bao shid' lam: jho" xo' to" ra" kham: khyo" thug' lo" mung: Yodan lao: khaung: khyo ye" ra" khyo shad' khyo phao lo" ako".
8 Ngadqere: Babelon gyezo: qe wa- kho:kham Zedekia re cao" khe' mung: Yerikho nhae mae" pa: din" mae yao: re taung" yu: ra". Yao" gyezo: qe alhab' wa yao: re phao cug' to: co' ako".
9 Zedekia wa Hamad mug: myid mae" Ribla vogaung: mae na: ra" kho:kham Nebugkhaneza jhao" jhui" lo" qhug' ra". Nebugkhaneza wa ai tau mae yao: re dao: phyid' ra".
10 Yao: wa Ribla mae Zedekia qu" na: au:- Zedekia nho: yauggai zo: qere se' pye' ra". Yuda gyezug: qere re: se' pye' ra".
11 Ai: thao yao: wa Zedekia nho: myo,jid' re thad' pye' byid: mung: jao co: vhe' yang: Babelon khyo jhui" lo" qhug' ra". Zedekia wa yao: shid: ra" ayo, joe" sho' Babelon mung" mae" thaung: khug mae laung" jo: ra".
Caung:pa" Yham Byo; Qeim: Lo" Ru
(2 Kh 25.8-17)
12 Babelon kho:kham eib: ru daxe: gug zin ein: zin lho" ngo" khye' ein: khye' daxe ba ein: ba mae kho:kham pho" nho: pha,jhi" byid: yaug yao" gyezug: pho" Nebuzaradan wa Yerusalem khyo vao ye" ra".
13 Yao: wa- Caung:pa" Yham kho:kham kho" Yerusalem mae" akhyag: ra" byu qe alhab' mo, nho: yham jham re ngha" pye' ra".
14 Amung: yao" gyezo: qe wa- vomo" vang" jham re phyo' khyo" pye' ako".
15 Ai: thao- Nebuzaradan: wa- vogaung: mae na: dang: jo; ra" vobyu qe- dang: jo; ra" lo,mau" jhao mo,- Babelon byu qejhao" phao: de; lo" ra" mo, re Babelon khyo pyaung" jhui" lo" ra".
16 Ngadqere: yao: wa- pe" maqo" ra" myaung: thao" ra" mo, re Yuda mung" mae nha: to: co' mung:- yao: bam re sabyi khyae mae we' yothaung: jham mae mau" zaui: nhao: ra".
17 Babelon byu qe wa- gyid: zang baung: jham we'- Caung:pa" Yham mae" lhin" jham we' daga" gyid: qid lhao: re aje, aman" be; khyoe' pye' ako". Yao: bam wa gyid: alhab' re Babelon khyo tai: lo" ako".
18 Yao: bam wa- phan re sham" pye' rumae ci: ra" qe, gag khao: jham- myimhab ke' ra" khug'- myikaug' jham re so" ra" zai jham- ngaui" xeim: jham mae" sa: re khae: ra" khug' jham- sheim nae pyo: ja: phad' ngaui" ra" khug' jham- Caung:pa" Yham mae caung da" rumae ci: ra" zai gatau jham alhab' rere: yu: pye' ako".
19 Yao: bam wa qhang we' ngaui: yang kad' to" ra" khug' nau" jham we' myi:gyoe: gyang" re ci: ra" ug' the"- ngaui" xeim: jham mae" sa: re khae: yu: ra" khug' jham- myiqe, khug' jham- myikaug' tao" jham- sheim nae pyo: ja: ci: ra" khug' jham- sabyi qang: ngaui" xeim: vhe' sheim" ra" khug' jham re yu: lo" ako".
20 Caung:pa" Yham qhid' mae" kho:kham Sholamon yang kad' to" ra" gyid: zai jham ngad: ra" zang baung: shid' zang- lhin" jham we' qid lhao: qi: jham wa matho' lag ngad: ra".
21-22 Zang baung: shid' zang wa- dakhyo: daqi" za: ngad: ako". Zang khao: ngo" daxe: she' daung" daung" myhao mung: qi: phyao: daxe: shid' daung" bo: ra". Aiwa akhug bung" mung:- gyid: wa byid shi: shi: thau: ra". Zang baung: au: khao: ngo" mae myhao phyao: ngo" daung" daung" myhao: ra" gyid: daung" zang de, mung: gyid: yang kad' to" ra" khaung: shi: bin: myho mung: te' to" ako". Aijham alhab' rere: gyid: yang kad' to" ako".
23 Zang baung: khao: ngo" mae khaung: shi: dayo yo shaung: te' to: mung:- gug xe: khyaug' ce' wa myid gaung mae" the' myao: ra".
Yuda Byu Qe Babelon Khyo Jhui" Lo" Qhug' Ru
(2 Kh 25.18-21, 27-30)
24 Aitho' mago" gyezug: mo" Nebuzaradan wa- Khinjaung Yin" Seraia we' yao" o mae" Zephani- Caung:pa" Yham mae" akhyag: ra" au: jhaung gatau sam yaug re kyam: byu qekhyo" pyaung" jhui" lo" ra".
25 Yao: wa- gyetab jham re eib: lo: ra" gye zug: pho"- vomo" mae na: jo, shiko" ra" kho:kham pho" nho: pha,jhi" byid: mo, nhad' yaug- gye mau" we' sin: yang: tung" xam: au: jhaung ngad: ra" gyezug: mo" o mae" gyezug: pho"- akhyag: ra" byu khyaug' xe rere: jhui" lo" ra".
26 Nebuzaradan wa- ai bam re Hamad mug: mae" Ribla vogaung: mae na: ra" Babelon kho:kham pho" jhao" jhui" lo byid: ra".
27 Kho:kham pho" wa- aimae yao: bam re be, mung: se' pye' ra".
Airumung: Yuda byuqe wa yao: bam: mung" mae" pyaung" jhui" nha: pye' ru qhug' ako".
28 Ceru wa Nebugkhaneza yang kyam: byu qekhyo" jhui" lo" byaug: ra" byu qenho: japhin: ngad: ra". Yao" nho: kho:kham kad' ra" zin na nhad' zin ein: zin mae yao" yang jhui" yu: pye' ra" byu 3,023 yaug-
29 Daxe: she' zin ein: zin mae Yerusalem mae" 832 yaug-
30 Shid' xe: sam zin ein: zin mae Nebuzaradan yang jhui" lo" ru 745 yaug- ngad mung: alhab' 4600 yaug re jhui" lo" byaug: ra".
31 Evil-merodag Babelon kho:kham boe" lo: ra" zin mae yao: thaung: mae" lhoe' ke' byid' ra" khyo" yang kho:kham Yehoiakhin re yao: nhag' khyag' myid qhu" byid' ra". Ceru wa Yehoiakhin re kyam: byu khyo" taung" jhui" lo" thao sam xe: nhad' zin ein: zin- lho" daxe: shid' khye'- shid' xe: ngo" ba: ba mae boe" ru ngad: ra".
32 Evil-merodag wa yao: re nyang" za: kad' mung: Babelon mae yao: we' daga" pyaung" jhui" nha: to: qhug' ko" ra" kho:kham gaje qere tho' je: nga: yhe' byid' ra" jo, qo yao: re byid' ra".
33 Airumung: Yehoiakhin wa thaung: ve,mai ve,bau: re tha" pye' mung: yao" dang: ra" apyad gu: mae kho:kham zozo: jaung: mae zo: nae" akhang" byid' ru qhug' ra".
34 Yao: daui: na: ra" myhao"- ba khao: ngo" mae agu- mangung: lo: yao: qo ca" ra" bao" thaug' rure qo" yu ra".