17
Yuda Mung" Nho: Qobo We' Qobo Dae
1 Asang ta" ru wa Yuda byu qe we"- naonhaung" qobo wa jo,to' mhaug' thaung" yang tung" to" ava". Aire naonhaung" nhag' lam: khug mae laug sin" aceim: yang yao: co' tung" te' to: mung: naonhaung" phan akhyug mae kyaung" tung" te' to" avako".
2 Ni" byu qe wa phan jham mae re: sag' gae khao: ngo" we' bug gaung au: jham mae so myhi" Ashe nho: qhid' mae" tau: to' to" ra" aso: jham re caung:pa" byid' ako".
3 Yao: bam wa seyo mae" bam jham: dao mae re: caung:pa" byid' ako". Ni" mung"dan: jao: sho' mae nao shad' lhoe" ra" qobo alhab' mathao mae ni" nho: jo,nho" jham re ngo wa ni" gyevo jham re cilo" nhao nae" ngad: ra".
4 Nao wa ngoyang byid' to" ra" mung"dan: re aseim" byid' pye' ca" li" nae". Ngo wa nao pe" maba: ra" mung"dan: mae ni" gye qere caung: da" byid: nhao nae". Pe"mung:ga"re nga" nhag' jam: yo" ru wa myi: we' dakhyo: ngad mung: ai wa apyad ato mae nga" li" nae"- ga: ta" ra".
Dao: Khyo: Aja: Ja:
5 Asang wa ngo mae" phaug' lo" byaug mung:
shid ba: ra" byu: qam: o: mae byu re lam: khug: ra" yaug re ngo dao: phyid' nae".
6 Yao: wa kyaug' gao: ra" myid gaung- pe" daja: re: magai yaug: ra" xo: ngae myid-
din"pyad' yo mae yaug: ra" thao" paung" we' dau: ra". Yao" qhid' mae" khonhae" re: agai maboe" ngad: ra".
7 Ngadqere: ngore lam khug: ra" yaug re wa ngo shaman" byid: nae".
8 Yao: wa qid zo: gyaung: yae mae yaug mung: qid joe" sho' agyi: cin" ra" sag' gae we' dau: ra".
Pe"mung:ga"re ai: nho: avho' jham nyug: jo; ruyang laung yo, joe" lo: re magyaug ngad: ra".
Mug: maqu qere: sang: makho: ngad: ra". Ashi: xo' yang: zaui" ra".
9 Xao su byu: nhag' lam: re khag' qo" gai: ba byid' i?
Ai: qhi" sho' mhug' pyag' ru gatau pe" majo, ngad: ra".
Nodae saung" xo: byaug: ava".
10 Asang ngo wa byu: nho: myid we' nhag' lam: re paui: qho yaug ngad:
ngo wa yaug khao: ngo" re yao: kao so' daui ru we' yao: kad' ra" mau" re cao" yang: kad' byid: nae".
11 Madin: man" ra" khyo" ngaui qo" ra" yaug wa yao: makhyo" ra" ngho' au" jham re ab' ra" ngho' we' dau: ra".
Apyad ale; mae yao" jo,nho" seim" byaug: li" nae".
Lo" thao" mae yao: wa pe" maqo" lo: ago boe" byaug: li" nae".
12 Ngonhaung" nho: Caung:pa" Yham wa aqhid' mae" bam dao mae ye; jo; ra" phungbao bo: ra" tao" khau" we' dakhyo: ngad: ra".
13 Asang we"- nao wa Israel nho: myid: lao" khyo ngad: ra" nao re shapye' ko" ra" mo, wa qho' phau" li" genae".
Pe"mung:ga"re yao: bam wa phalhug bam mae tung" to" ra" mang jham we' dakhyo: bam" byaug: li" genae".
Pe"mung:ga"re yao: bam wa qid thug' qid gyang: ngad: ra" Asang nao re shapye' pye' geyang: ngad: ako".
Bao" Thaug' Ru Qhid' Mae" Yeremia Asang Re Mho' Ru
14 Asang we"- ngore gai byid: la,- aire ngo bin sho' gai: byaug nae". Ngo re khyad' yu la,- aire ngo bin sho' gug: gam qhug' nae". Nao wa ngo caung:khin" byid' ra" yaug ngad: ra".
15 Byu qe wa ngore- Asang: yang ngonhaung" re kyaug' ra" dao: jham wa khai: mae va" i? Yao: wa ana" yao: kad' thug' ke' vashao: wo"- ga: ta" ako".
16 Ngadqere: Asang we"- yao: bam: dao mae qug: khai: kyi" khyag' ru boe" nhao nae" ngo nao re khonhae" re: majhan:- yao: bam qug: khai: qhug' nae" ayo, re ngo kao mabau lo: Asang we"- nao ceru re ba: ra". Ngo ta" to" rure nao ba: ra".
17 Ngo re dagyaug: din nhao la,- qug: khai: joe" ra" ayo, mae nao wa nga" gug: gam jo, qo ngad: ra".
18 Ngo re yhin" ra" mo, re nga: yeim nhao wa,- ngadqere: ngore tang" la,- yao: bam re gyaug din myid byang" sho' ke' byid: wa,- ngadqere: ngore dakyaug' tin" la,. Yao: bam re qug: khai: kyi" khyag' ru boe" nhao mung: yao: bam re aje, aman" khyug' mhan" pye' wa,.
Dugno: Ba Re Phug' Cao" Ra" Khyo
19 Asang wa ngore- Yeremia we"- Yuda kho:kham qe vogaung: re vao thug' kad' ra" amyu" byu qenho: kham mo" mae nga" mungdao: re yeta" hau: mung: Yerusalem nho: kham: gatau jham khyo ye wa,-
20 Kho:kham qe Yuda byu alhab'- Yerusalem mae na mung: ce: kham: jham khyo" vao lo: ra" mo, yaug khao: ngo" ngore ta" ra" dao: re li" tae" gyo: nae".
21 Yao: bam: kao so' re yao: bam jhid'de; ko" re wa yao: bam wa Dugno: Ba mae qo pe" ja: re: magai: vin- Yerusalem nho: kham: jham khyo" pe" rere: magai: vin nae".
22 Mangad: lao"- Dugno: Ba mae yao: bam: yham mae" pe" re: magai: cithug' Dugno: Ba mae mau" magai zaui: yao: bam: phug' pho" qere ngoyang amyin" byid' to" ru we' dakhyo: ai: ba na re gyang" lho" ba na khyo" yao: bam phug' cao" ca" ra" khyo yao: bam re ta" kyo: wa,-
23 Yao: bam: phug' pho" qe wa nga" nho: dao: matae" gyo:- ngore pe" re: matae" gyo: ngad: ako". Ai: atha" yao: bam nhag' lam: qao: li" ako". Yao: bam nga" nho: dao: magyo:- ngo mae" re: mazhao: yu ngad: ako".
24 Nga" amyin" dao: jham alhab' re yao: bam phug' cao" ca" ko" ra" khyo re ce: byu qere ta" wa,- yao: bam wa Dugno: Ba mae ce: vogaung: mae" kham: jham khyo" qo pe" ja: re: magai: vin: lai. Yao: bam wa Dugno: Ba re gyang" lho" ba na khyo" phug' cao" mung: mau" daja: re: yao: bam magai: zaui: ein: ra" khyo ta" wa,-
25 Ailao"- yao: bam: kho:kham qe we' kho:kham nau" qe wa Yerusalem nho: kham: jham mae vao ye: gemung: Davi qo" qu" ra" kho:kham kheim: so' ru" ru yao: qo" yu: ako". Yao: bam wa myao: lhin" jham: dao mae we' myao: jham: dao mae zaung: li" genae". Aimung: Yerusalem wa khonhae" re: mang: byu byang" jo; li" nae".
26 Byu qe wa Yuda mung" vogaung: jham mae" we' Yerusalem lhang" gam: vogaung: jham mae" joe" lo: li" genae". Yao: bam wa Benyamin mug: myid mae"- bug gaung khyid mae"- bam jham mae"- Yuda mung" mug: thao shad' mae" joe" lo: li" genae". Yao: bam wa nga" Caung:pa" Yham khyo phad' ngaui" xeim:- ngaui" xeim:- cin man" ngaui" xeim:- sheim nae pyo: ja:- jeju so: ngaui" xeim: jham re cili" li" genae".
27 Ngadqere: yao: bam ngore mho dao: gyo: mung: Dugno: Ba re gyang" lho" ba na khyo" phug' cao" ca" ako". Yao: bam ai: ba na mae Yerusalem kham: jham khyo" qo pe" daja: rere: magai: vin: lai- yao: bam airu: vin: lai geyang: ngad: re Yerusalem vogaung: kham: jham re ngo myi: ngha" pye' nae" myi: wa Yerusalem kho:kham kho" jham re nga" khyoe' khyo" pye' mung: khag' re: aire maqo" se' pye' genae"- ga: ta" ra".