16
Yeremia Nho: Kaoso' Qhid' Mae" Asang: Myid O: Ru
1 Asang wa ngore dao: jhau: mung:
2 Ceru" ra" jo, qo mae myi: re: dayu- zoshao re: damyhung-
3 Ce: mae khau: ra" zoshao qe we' yao: bam: myhi" pho" qe mae boe" lo nae" ru nao re ngo ta" kyo: nae".
4 Yao: bam wa gyaug pho: no boe" mung: shid: lo" li" genae". Yao: bam: qhid' mae" kaug' nae" byu we' yao: bam re dau" nyhab' nae" byu khag' mana genae". Yao: bam: maogaung jham wa myid gaung dao mae" myid xau bam jham we' dakhyo: bam: jo; li" genae". Yao: bam wa gye poe mae se' pye' ru qhug' la, mangad: lao"- vae: moe' shid: lo" mung: yao: bam: maogaung jham wa ngho' jham we' seyo: gug'nyhug' qe: qhid' mae" zo:ve boe" lo" li" genae".
5 Nao wa kaug' ngug: na: ra" yham khyo magai: vao ye:- khag' qhid' mae" re: dakaug' ngug- ngo wa nga" nho: byumyu" qere yaug yo cae: tae" ru we' mashaman" byid: lo: nae"- yao: bam re jhid'de; myid we' nhag' khyag' myid re: maqhu" byid: lo: nae".
6 Jo,nho" qo" mo, we' myaung mo, wa ce: mug: myid mae shid: lo" li" genae". Ngadqere: yao: bam: qhid' mae" khag' makaug' ngug genae". Yao: bam re dau" nyhab' nae" khag' mana genae". Khag' re: yao: yao" kaug' qhui: rure qhu" ra" khyo" so' mo" re: mashae nae"- au: re: madaung" pye' nae".
7 Jhid' de; ra" byu dayaug shid: lo" re yao: re nhag' tang" byid: nae" qhid' mae" yao: we' daga" pe" mazo: genae"- shaug' re: mashaug' genae". Khag' re: nhag' khyag' shono myid maqhu" byid: genae". Yao: myhi" we' yao: pho" tao shid: byaug: ra" yaug: qhid' mae" lao" re: nhag' khyag' ru maqhu" byid: genae".
8 Poe kad' na: ra" yham khyo davao ye:- yao: bam we' zo: shaug' nae" qhid' mae" daye: bo: zaung-
9 Israel nho: Mao"So qam: bo: thao" ra" Asang ngo- ta" ca" rure tae" gyo: wa,- ngo wa ngaui bau" ru we' ngaui lho" ra" thoe jham re we' lo,xo' poe mae" bau" yhau: ra" thoe jham re cae: jhug tag boe" lo" nhao nae". Cemae na: ra" mo, wa- ceru: boe" rure the' myao co' li" genae".
10 Yao: bam re nao cegu: alhab' ta" kyo" re- yao: bam wa- pe"mung: yang: yao: bam re ngo ai qhi" dae xo sho' qobo dae byid: nae" myid: phyid' laug i? ga: nao re myid' li" genae". Yao: bam wa pe" yug: no qobo shad' geli" va" laug- Asang yao: bam: Mao"So re pe" qobo kad' vako" laug ga: myid' li" genae".
11 Ailao" Asang ceru: ga: ta" ra" ein: yao: bam re ta" kyo: wa,- naonhaung" phug' phyid' qe wa- ngo mae" lhang: phaug' lo" gemung:- gatau: so alho jham re caung:pa" ru we' caung da" byid' lo: avako". Yao: bam wa ngore shapye' to: co' gemung: nga" nho: mho" shid' dao: jham re maphug' cao" ngad: ako".
12 Ngadqere:- naonhaung" wa naonhaung" phug' phyid' qe tho' lhao" je: dae xo: ra" khyo" kad' avako". Naonhaung" alhab' mo, wa nhag' lam: qao sang: dang: ru we' makhyang: gemung:- ngore maphug' cao" ngad: ako".
13 Aimung: ngo wa naonhaung" re ce mug: mae" naonhaung" re: maba- naonhaung" phug' pho" qere: maba: lo: ra" mug: myid khyo khe' thug' ke' nae". Aimung:- naonhaung" wa ai mug: mae gatau: so alho jham re myi" re: na" re:- caung da" byid' li" genae". Aimung: ngo wa naonhaung" re pe" re: nhag' khyag' myid maqhu" byid: nae"- ga: ta" ra".
Pyaung" Nha: To" Ru Mae" Dam: Phao: Lo: Ru
14 Asang wa mung" byu qe wa- Israel byumyu" qere Egutu mung" mae" jhui" thug' lo: ra" kao so' daui: ra" Mao"So: mang khyo" nga" mang re lao: yang: jham matang: genae" ra" ba na joe" lo: li" nae".
15 Ai: atha" yao: bam re ngoyang khe' sin" pye' to" ra" mug: am: shad' mae" mang: we' gamung" dan: jham mae" Israel byumyu" qere jhui" thug' yu: ra" Mao"So: mang yang jham tang" li" genae". Ngo wa yao: bam re- yao: bam yao" mung"dan: khyo- yao: bam: phug' phyid' qere ngo byid' to" ra" mug: myid khyo dam: jhui" tug' lo nae". Ngo Asang ta" to" va"- ga: ta" ra".
Joe" Li" Nae" Qobo Dae Byid' Ru
16 Asang wa ngo wa ce: byumyu" re taung" yu nhao nae" qhid' mae" ngo: kung" mo, myo: sho' re nhao: ke' nae". Aimung: yao: bam re bam khao: ngo" we' bug gaung khao: ngo" laug byo, khaung: mae" laug aug' laug khyaung khao:ngo: mae cao" khe' qho nae" sho: kung" mo,- myo: sho' re nhao: ke' nae".
17 Yao: bam kad' ru ja: khao: ngo" re ngo the' myao:- ngo mae" nyham" to" ru pe" majo, yao: bam: qobo jham wa nga" nho: myo,khung: mae" maloe,-
18 Ngo wa yao: bam re- yao: bam: qobo jham we' nhag' lam: kaui: ra" mau" pyag' qhid' mae" shid' zhao" xe' nhao nae". Pe"mung:ga"re yao: bam wa sushid mao gaung we' dakhyo:- kao so' mabo: ra" sulho jham khyo" yang nga" nho: mug: myid re magyang" mashao maca' majhad' kad' pye' mung: yao: bam: so apyag' jham khyo" yang ai: mug: myid re byang" jo, nhao ako".
Asang Re Lam: Mung: Yeremia Akyu" Mho' Ru
19 Asang we"- nao wa ngore gug: gam byid: yang: qam: o: byid: yaug ngad: ra". Nao wa ngore qug: khai: qhug' ra" ayo, gu: mae bao" thaug' byid' ra". Byumyu" qe wa mug: thao" myid thao" mae" nao jhao" li" mung: ceru: ga: ta" li" genae". Ngonhaung" nho: phug' pho" qe wa- so apyag' jham mae" je yang: pe" re maqo"- akyu" mabo: ra" so alho jham mae" je yang: pe" maqo" ngad ako".
20 Byu qe wa yao: bam yao" so jham re qo" kad' yu: i? Maqo" kad' yu- yao: qe qo" kad' yu: ngad: re aijham wa so agyang" jham mangad: genae".
21 Asang wa airu: ngad: re- byumyu" qe wa nga" nho: kheim: so' we' qam: so' re dalhang: za: ba: ci gesho' ngo kad' ke' nae". Ngo wa Asang ngad: rure yao: bam ba: li" genae"- ga: ta" ra".