18
Ug' Kad' Yaug: Yham Mae Yeremia Yena: Ru
1 Asang wa ngore-
2 Ug' kad' yaug: yham khyo gyo" ye: wa,- aimae nga" mungdao: ngo nao re byid: nae"- ga: ta" ra".
3 Airumung: ngo wa aikhyo gyo" ye: mung: ug' kad' yaug wa yao" ug' kad' zaung mae ug' kad' na: rure ngo yemyao:-
4 Zhogang" myid dakhai" ug' kad' re maboe" byaug khao: ngo"- yao: wa zhogang" re yu: yu yang: gatau dam: kad' ra".
5 Ailao" Asang wa ngore-
6 Ug' kad' yaug zhogang" khai" re kad' ruru: ngo wa naonhaung" Israel byu qere kad' nae" akho: akhang" qo" ra" mangad: i? Zhogang" khai" wa ug' kad' yaug: lo, khug mae bo: ru we' dakhyo: naonhaung" wa nga" lo, khug mae bo: ako".
7 Ngo wa dayo, yo, mae byumyu" mung"dan: dalam: re phan" pye'- phyo' pye'- se' tam" pye' nae" ein: ta" ngadqere:-
8 Byumyu" mung"dan: wa makhyang" ra" lo,mau" mae" dam: tug' lo gelao" wa ngo kad' nae" ein: ta" to" ru ngo makad' nae".
9 Dakhyo" ein: ta" re- byumyu" mung"dan: dalam: lam: re nha: to: mung: tau: to' nae" ein: ta" to: ngadqere:-
10 Ai: byumyu" wa ngore mho dao: magyo: lo: makhyang" ra" mau" kad' ko" re wa ngo kad' nae" ein: ta" to" rure ngo makad' nae".
11 Aimung: ana"- ngo wa yao: bam re gye kad' nae" yaung: to: mung: yao: bam re qobo dae byid: nae" jin" jin" ngad va" ra" khyo Yuda byu qe we' Yerusalem byu qere ta" kyo: byid: wa,- qobo kad' ra" kao so' daui khyo re thang: pye' nae"- yao: bam: khyo jham re tha" pye' nae". Yao: bam kad' ra" lo, mau" re thang pye' genae" qhid' mae" ta" wa,-
12 Yao: bam wa mathang nae"- pe"mung: ngonhaung" thang ang nae" i? Ngonhaung" nug: ra" nho" nhag' lam: qao: mung: makhyang" ra" mo, ngonhaung" boe" nae" ga: tau" li" genae"- ga: ta" ra".
Mang Byu Qe Asang Re Ngag Pye' Ko" Ra" Khyo
13 Asang wa airu" ru qhid' phyao: boe" qu" va" ngad: re-
Byumyu" khao: ngo" myid: ge,- Israel byumyu" qe wa qu" gyaug qu" lhaung sho' ra" mau" kad' avako".
14 Lebanon mung" nho: laug byo, bam myhao mae gyu: majo, lo: boe" ra" i?
Ngin" ra" bam jham: dao mae" qid gyaung: jham makin" byaug: qu" ra" i?
15 Ngadqere: nga" byumyu" wa ngore to" myhid' pye' avako".
Yao: bam wa so alho jham re sheim nae pyo: ja: phad' ngaui" avako".
Yao: bam ye: ang: ra" khyodang mae yao: bam tha" lang" avako".
Ganhae" mae" khyo re yao: bam macao" lo: ko" ngad: ra".
Yao: bam wa maphung" to" ra" khyodang mae su" ako".
16 Yao: bam wa ce: mug: myid re gyaug din ja: kad' pye' mung: apyad ato mae shapye' to: nae" kad' ako".
Su" lai: lo" mo, alhab' wa yao: bam the' myao: ra" ja: re din: mo, byaug genae".
Mug' yang: yao: bam: au: re au: lhang lhang li" genae".
17 Nga" byu qere yao: bam: gyevo qe: qhid' kheim: mae ba thug' shad' mae" la: yang hug' tao" lo" byaug: ra" phalhug, ru: yao: bam re abyi asin: kad' pye' nae".
Ngo wa yao: bam re nhaung thao" phaug' pye' nae".
Kyi" khyag' qug: khai: joe" lo: au: ngo yao: bam re mabao" thaug' nae"- ga: ta" ra".
Yeremia Re Gye Khug' Kad' Ra" Khyo
18 Ailao"- mo, byu qe wa Yeremia we' sin: yang: ngonhaung" daja: kad' gelang: ngonhaung" re mho" shid' byid: nae" lapa qe ngonhaung" re pha,jhi" byid' ra" pha,jhi" bo mo,- Mao"So: mungdao: re ta" hau" ra" lapa qe khonhae" re: na: jo; li" genae". Yao: re qobo vhin mung: yao: ta" ra" dao: re tae" gyo" ru thang: pye' gelang:- ga: ta" ako".
19 Airumung: ngo wa- Asang we"- ngo ta" na: rure we' nga" khyo we' sin: yang: nga" gyevo qe ta" na: ra" khyo re gyo: byid: la,-
20 Gai: ru qhid' mae" makhyang" ru aphug' gai: byid' i? Ngadqere: yao: bam wa ngo byid: gyo" vao lo" nae" dung:khung: dau" ako". Nao wa yao: bam re nhag' yo" ra" khyo" makad' nae" qhid' mae" nao jhao" ngo khoru: joe" li" ru- yao: bam: gaung tha" ngo khoru: dao: jhau: rure myid: beim: byid: la,-
21 Ngadqere: ana"- Asang we" yao: bam: zoshao qere vae: moe' kyaug' shid nhao wa,- gye poe mae yao: bam re se' pye' qhug' nhao wa,- myiqe: qere cug' mo" jham we' yao: zo: qe shid dam: mo, boe" nhao wa- zoshao qere ci phyaug' pye' nhao wa,- yauggai qere no boe" yang: shid nhao wa,- zolau: qere gyekhe' poe mae se' pye' qhug' nhao wa,-
22 Pe" mata" peim: lo: yao: bam: yham jham re mo,byu qere lhad' zo: nhao: pye' wa,- yao: bam re gyaug: din yang: zag: hug' nhao wa,- yao: bam wa ngo byid: gyo" vao lo" nae" dung:khung: dau" avako". Ngo myi" nae" lha" khae: avako".
23 Ngadqere: Asang we"- ngore se' pye' nae" yao: bam: gye khug' kad' ru alhab' re nao ba: ra". Yao: bam: makhyang" ra" lo, mau" we' yao: bam: qobo jham re qobo dakhyad' byid: yao: bam re seim" gyoe; gyo" ra" jo, qo mae shapye' zaui: to: mung: nao nhag' yo" ra" ayo, gyo: gu: mae yao: bam re zam" khug wa,- ein: akyu" mho' ra".