6
Gidon
1 Israel amyu" byu qe wa Asang re qobo dam: shad' lhoe" ako". Airumung: yao: wa yao: bam re Midian byu qere nhad' zin eib zo: nhao: ra".
2 Midian byu qe wa Israel byu qe tho' qam: je: bo: ako". Amung: Israel byu qe wa laug aug' jham mae we' bug gaung jham mae" gug' ra" jo, qo jham mae phao: vho' na: ako".
3 Israel byu qe qhomyug: qhoshi: qho: yo kad' khao: ngo" Midian byu qe wa Amaleg byu qe we' din"pyad' yo mae na ko" ra" byumyu" qe we' daga" yao: bam re gye li" khe' zin" ako".
4 Yao: bam wa ai mung" mae jamu li" kad' mung: mug: thao shad' Gaza lhang" gam: joe" sho' qhomyug: qhoshi: yo jham re zai" qheim" pye' byid' ako". Yao: bam wa yao- nung:- loze jham alhab' re yu: pye' mung: Israel byu qe: qhid' mae" zo: nae" pe" re: matang" to: byid: co' ngad: ako".
5 Yao: bam wa yao: bam: gug'nyhug' jham we' daga" li" mung: zaung jham kad' yang: khyag' phaung" jham nho" mo,paug' thau: ako". Yao: bam we' yao: bam: gola:u jham wa matho' nghe' losho' ngad: ako". Yao: bam ai: mung" khyo li" yang: mhan" kad' pye' ako".
6 Israel byu qe wa yao: bam re gye maqo" kad' ngad: ako".
7 Ailao" Israel byu qe wa Midian byu qere gye qo" kad' nae" bao" thaug' yu nae" qhid' mae" Asang re hug' yao: ako".
8 Amung: Asang wa Israel byu qe: Mao"So Asang mae" ce: mungdao: re yao: bam jhao" vin: ye: nae" ra" lapa dayaug re yao: bam jhao" nhao: ke' ra". Aimung dao: wa Egutu mung" mae jeim kad' na: rumae" ngo naonhaung" re jhui" thug' lo va".
9 Ngo naonhaung" re Egutu byu qe: lo, mae" re:- ce: mung" mae naonhaung" re gye kad' ra" mo; lo, mae" re:- ngo naonhaung" re khyad' yu va". Naonhaung" qhid' khyo jhin" ye: gelao"- ngo yao: bam re khe' thug' pye' va". Amung: yao: bam: mug: myid re ngo naonhaung" re byid: va".
10 Ngo wa naonhaung" Asang Mao"So ngad mung:- ana" naonhaung" na: jo; ra" mung" mae na ko" ra" Amori byu qe: so jham re ma caung:pa" ang: ra" khyo re ngo ta" va". Ngadqere: naonhaung" nga" dao: re matae" gyo: ngad: ako" ga" ru ngad: ra".
11 Ailao"- Asang: mug: lagyo: wa Ophra vogaung: khyo joe" li" mung:- Abieze amyu" kaung mae" Yoasha sang: ra" zai gae qao: mae zaung: jo; ra". Yao: zo: Gidon wa Midian byu qe mamyao geshao: ga: sabyi nao: jao: mae sae sae za: jung: gaug nao" na: ra".
12 Asang mug: lagyo: wa amae yao: re yena: qhu" mung:- yao: re qam: bo: ra" sulhe: pho" we"- Asang wa nao we' daga" na: ra"- ga: ta" ra".
13 Gidon wa yao: re- nhag' bo we"- ngo myid: nae"- Asang ngonhaung" we' daga" ngad: re- cegu: alhab' ngonhaung" mae pe"mung: boe" i? Yao: bam re Asang Egutu mung" mae" khoru: jhui" thug' lo: ra" khyo- Asang ngonhaung" re lhaung" kad' ra" khyo re ngonhaung" phug' pho" qe ngonhaung" re ta" kyo: ko" ra" mug' pho: mau" jham alhab' wa pe" boe" va" laug i? Asang wa ngonhaung" re shapye' pye' mung:- Midian byu qe: lo, mae ngonhaung" re to: co' ava"- ga: ta" ra".
14 Ailao"- Asang wa yao: re ni" qam: zang we' ye: mung: Midian byu qe: lo, mae" Israel byu qere ye khyad' yu wa- ngo yang yao: nao re nhao: ke' ra"- ga: ta" ra".
15 Gidon wa- ngadqere: Asang we"- ngo wa Israel byu qere khoru: kad' yang: qo" khyad' yu nae" i? Nga" amyu" kaung wa Manashe amyu" kaung mae" qam: je: nang" thao" kaung ngad: ra". Ngo wa nga" yham khaung byu qemae" pe" maboe" thao" yaug ngad: ra" ga: tau" ra".
16 Asang wa- nao ai mau" re qo" kad' ra". Pe"mung:ga"re ngo wa nao re bao" thaug' byid: nae" mung: ngad: ra" nao wa yao: bam re byu dayaug reru: laui laui za: Midia byu qere khyoe' qo" kad' pye' li" nae"- ga: ta" ra".
17 Gidon wa tau: mung:- nao ngore o ngaui: ru ngad: re wa- nao dang za: Asang ngad: rure sagse daqhae: qhu" byid: la,-
18 Ngo nao jhao" jhaung qhu" xeim: maci: joe" li" li" wa jeju khyo" daphao: lo" shi: wa,- ga: ta" ra".
Ailao" yao: wa nao dam: tug' joe" lo sho' ngo na: jo, nae"- ga: ta" ra".
19 Airumung: Gidon wa yao" yham khyo phao: lo" mung: cad' be, nau" dadau: se' yhaung" yang: cin man" daxe bye: re man" make' lo: mug kad' ra". Yao: wa sho: re gyan mae ke' shoqang: re wa ug' mae ke' yang: zai gae qao: mae na: ra" Asang: mug: lagyo: jhao" cilo: mung: ai jham re yao: re labyid' ra".
20 Mug: lagyo: wa yao: re ai: sho: we' mug re ce: laug bam dao mae kai" to: mung: ai: dao mae sho:qang: re vhe' sheim: wa,- ga: ta" ra". Gidon wa airu: kad' ra".
21 Ailao"- Asang: mug: lagyo: wa lo, yheim" ke' yang: yao:zaui" ci: ra" vose: thao: yang: ai: sho: we' mug re tin" ra". Myi: wa ai: laug bam mae" thug' li" mung: sho: we' mug re nga" pye' ra". Ai: thao re mug: lagyo: pho" byaug: lo" byaug: ra".
22 Ailao"- Gidon wa yao: Asang nho: mug: lagyo: re myao va" ru beim" li" ra". Yao: wa Myhao: thao" ra" Asang we"- ni" mug: lagyo: re ngo myo, khung: we' myo, khung: jho" myao va" ga: gyaug nin" zo" re" ta" ra".
23 Ngadqere: Asang wa yao: re ngaui pyo: yaug yo vashao:- dagyaug wa,- nao mashid nae"- ga: ta" ra".
24 Gidon wa aimae Asang qhid' mae" phan dalam: kad' mung: aire- Asang wa ngaui pyo: yaug yo yaug ngad: ra" ga: mhang" ra". (Aiwa Abieze amyu" kaung sang: ra" Ophra mae ana" joe" sho' jo; jo; shi")
25 Ai: myi re Asang wa Gidon re ni" pho" nho: nung: jaung lo: we' nhad' zin bo: ra" nung: jaung lo: gatau dadau: re yu mung: ni" pho" nho: Bala phan re phyo' khyo" pye' yang:- akhug mae bo: ra" Ashe so myhi" nho: sulho re khang" khyo" pye' wa,.
26 Ce: myid bam" mae ni" Mao"So qhid' mae" phan dalam: nyang" za: zao: ra" phan dalam: kad' wa,- athao re- nung: jaung lo: shid' dau: ein: dau: yu yang: jhaung qhu" xeim: khyo" nao khang" khyo" pye' ra" Ashe nho: sulho re thao: kad' yang: dau: geim" re phad' ngaui" wa,- ga: ta" ra".
27 Airumung: Gidon wa yao" daui daui okaung daxe zo: re jhui mung: Asang yao: re ta" ruru: kad' ra". Yao: wa yao" yham byu qere we' vobyu qere na" gaung re airu kad' nae" gyai gyaug: ra". Airumung: yao: wa myi" re kad' ra".
28 Vogaung: byu qe thao: ba ne,seim no' to" li" ko" re- Bala phan we' Ashe nho: sulho wa khang" khyo" pye' mung:- aitau mae kad' ra" phan dao mae ai: nung: jaung lo: shid' dau: ein: dau: re phad' ngaui" byid' pye' va" rure ba: ako".
29 Ce khag' kad' i? ga: yao: cao: jho" myid' ako". Yao: bam myid' ca: qu" mung: ai kad' yaug Yoasha nho: yauggai zo: Gidon ngad: rure ba: ako".
30 Ailao"- Yoasha re- ngonhaung" yao: re qo" se' pye' nae" qhid' mae" ni" yauggai zo: re cekhyo jhui" thug' li" wa,- yao: wa Bala phan re we' ai nhae mae Ashe nho: sulho re khang" khyo" to" ra"- ga: ta" ako".
31 Ngadqere: Yoasha wa yao: re li" lhe: mo, re- naonhaung" Bala bo: de, na ko" i?Naonhaung" wa yao: re gug: gam byid' na ko" i? Bala bo: bode; ra" yaug khag' ngadqere: mug: mabo" re se' pye' qhug' vashao:- Bala wa so ngad: re wa yao: yao" gaung re yao: yao: gug: gam: yu vashao:- yao" phan wa be; khyoe; pye' ru qhug' ava"- ga: ta" ra".
32 Bala wa yao: yao" gaung re gug: gam: yu vashao:- ga: Yoasha ta" ruyang Gidon wa ai ba mae" Yerubba ga: mang qo" byaug: ra".
33 Ailao"- Midian byu qe alhab'- Amaleg byu din" pyad yo mae na ko" ra" byu qe alhab' mo, zang" phaung mung: Yodan gyaung: re gau" de, mung: Yezre lao: khaung: mae jamu kad' na: ako".
34 Asang: byo wa Gidon re vao: jaung" mung: Abieze nho: kaung qe yao" thao cao" genae" qhid' mae" khai: ra" labo" mad: ke' ra".
35 Yao: wa Manashe mug: myid shid' dau geim" mae na ko" ra" mo, re yao" thao cao" genae" qhid' mae" khai: yu nae" lagyo: jham re jao: sho' khyo nhao: ke' ra". Yao: wa Ashe- Zebulun we' Nabhtali amyu" kaung jham khyo lagyo: jham re khai nhao: ke' mung:- aibam re: yao: we' li" boqhan" ako".
36 Ailao" Gidon wa Mao"So re- nao wa Israel byu qere khyad' yu nae" qhid' mae" ngore ci nae" nao myid: phyid' to: va"- ga: ta" ra".
37 Gai va"- ngonhaung" jung: gaug nao: jao: mae ngo sug' gug dajhid' to" to: nae". Ne seim ngad lao"- nghin wa myid gaung mae magyo" lo:- sug' gug dao mae za: gyo" de, yang: ngad: re- Israel byu qere khyad' yu nae" qhid' mae" nao ngore ci nae" ngad: rure ngo ba nae"- ga: ta" ra".
38 Gaigai: yao: re: aru" boe" ra". Gidon wa thao: ba ne, seim no' to" li" mung: ai: sug' gug re yao: nai: jhab' ke' re:- aimae" khug' byang" sho' nghin yug gyo" li' ra".
39 Ailao"- Gidon wa Mao"So re- ngore nhag' dayo: la,. Dalhang dao: dam: jhau nhao shila, jeju khyo" sug' gug: yang dalhang dam: lag: yu: qu" nhao shila- celhang mae sug'gug wa ho: jo, mung: myid gaung jhug' nhao: wa,- ga: ta" ra".
40 Ai: myi re Mao"So wa airu: yao: kad' ra". Thao: ba ne,seim sug' gug wa ho: jo, mung: myid gaung wa nghin jhug' jo; ra".