5
Debora We' Barag Shid' Yaug: nghaui" caung: Thoe
1 Aiba mae Debora we' Abinoam nho: yauggai zo: Barag wa ce: nghaui" caung: yang caung" ako".
2 Asang re caung:khin" ge,-
Israel byu qe wa gye kad' nae" ga: myid: phyid' mung: amyu" byu qe ngaui bau: za: yao: yao" myid khyo" bobo: ako".
3 Kho:kham qe naonhaung" we"- tae" gyo: ge,.
Zug: qe naonhaung" we"- nyang" za: tae" gyo: ge,.
Ngo wa Israel nho: Mao"So Asang re pyo" ra" tang: thoe we' nghaui" caung: nae".
4 Asang we"- Seira bam mae" nao gyo" lo mung:-
Edom mung" mae" nao thug' li" ra" au:-
myid gaung wa laui" nin" mung: mug:gaung mae" mug: qu: gyo" lo: ra".
Ngad va"- jham thaui: mae" mug qid gyo" ra".
5 Israel byu qenho: Asang Mao"So: qhid' kheim:
Sina bam mae" Asang qhid' kheim: mae bam jham lab: ako".
6 Anad nho: yauggai zo: Shamga nho: pyad mae we' Yaela nho: pyad mae phaga: lhin" jham ai: mung" khyo" masu" lai loko" ngad: ra".
Gyaung: su: mo, re: khyo jao" khyo" za: su" ako".
7 Israel byu qenho: vogaung: jham wa cae: jhug tag ngad: jo; ra".
Debora we"- nao joe" li" sho'- aijham wa akeim ngad: jo; ako".
Debora wa Israel byu qe: qhid' mae" yao: myhi" we' dakhyo: joe" li" ra".
8 Israel byu qe so asag' re khyin: yu gelao" ai: mung"dan: mae gyekhe' poe boe" li" ra".
Israel byu byid tug mae" dayaug yaug gye go ci: i? Lhae tad' ci: i?
9 Nga" nhag' lam: wa Israel byu qe: gyezug: qe we' daga" re: ngaui bau: za: yao: yao" myid khyo" cao" ko" ra" mo, we' daga" re: ngad: ra".
Asang re caung:khin" ge,.
10 Loze phyu jham: dao mae jui: mo,- do: jham: dao mae zaung: ra" mo,-
khyid khyo" su: ca" mo, naonhaung" we"- ai: khyo re ta" ge,.
11 Tae" gyo: ge,- qid thaung: jham: lhang" gam: mae hug' yhai: na ko" ra" mo,byu phaung: wa
Asang: aung doe; ru jham re we' Israel byu qenho: aung doe' ru jham: khyo re ta" na: ako".
Ailao"- Asang: byu qe wa yao: bam: vogaung: jham mae" yan" gyo" lo: ako".
12 So: wa, so: wa, Debora we"-
so: wa, so: wa, nghaui" caung: wa,-
Abinoam nho: yauggai zo: Barag we"- to" wa,-
ni" nho: kyam: byu qere jhui" lo" wa,.
13 Ailao"- Jhaug' zaug: ra" yaug wa yao: bam: au: jhaung qejhao" gyo" li" mung:
Asang: byu qe wa gyekhe' nae" jin" jin" yao: jhao" joe" li" ako".
14 Yao: bam wa Ephrim mae" lao:khaung: khyo joe" li" mung:
Benyamin amyu" kaung we' yao" byu qenho: nhaung thao" mae ngad: ako".
Makhira mae" gyezug: jham thug' li" mung:-
Zebulun mae" zug: aya: qo" mo, thug' li" ako".
15 Isakha amyu" kaung: nho: au: jhaung qe wa Debora we' daga" joe" li" ako".
Ngad: ra" Isakha joe" li" mung: Barag re: joe" li" ra".
Amung: yao: bam wa lao: khaung: khyo yao" thao cao" ye" ako".
Ngadqere: Rubin amyu" kaung wa jho" kho' lo" ako".
Yao: bam wa li" nae" maqo" myid: phyid' ngad: ako".
16 Yao: bam nhaung thao" mae yao jham we' pe"mung: thang: na ko" ra" i?
Yao lhaug' mo, yao kyaung" re khai: ra" thoe re tae" gyo: nae" qhid' mae" i?
Ngad: ra"- Rubin amyu" kaung wa jho" kho' lo" ako".
Yao: bam wa li" nae" maqo" myid: phyid' ngad: ako".
17 Gad amyu" kaung wa Yodan gyaung: ba thug' shad' mae thang: na: ako".
Dan amyu" kaung wa qid sang pho jham: nhae mae na: jo; ako".
Ashe amyu" kaung wa panglai: qid yae nhae mae thang: na: ako".
Yao: bam wa gyagao: cao" yang: na: jo; ako".
18 Ngadqere: Zebulun amyu" kaung we' Nabhtali amyu" kaung wa gyekhe' poe mae yao: bam: kao so' shidgyan nogyan qhug' ako".
19 Megido qid zo: gyaung: yae Tanag jo, qo mae kho:kham qe li" yang gyekhe' ako".
Khanan kho:kham jham gyekhe' ko" ra".
Ngadqere: yao: bam ngaui maqo" yu: lo" ko" ngad: ra".
20 Kyi jham wa mug:gaung mae qhui" lhau: ra" khyo" yao: bam mug:gaung mae" gyekhe' ako".
Yao: bam wa Sisera re gye kad' ako".
21 Qid bug thin: ra" Kishon gyaung: qid gyui: yang yao: bam re khyad' she: myung: lo" byaug: ra".
Ngo wa qam: we' qhid' khyo khe' ye: nae".
22 Ailao"- myao: jham wa thug' byae yang: joe" li" mung: myid gaung wa yao: bam: khusin: zab thoe za: ngad: ra".
23 Asang mug: lagyo: wa Mero re nhang: kheim: ke' ge,- aimae na mo, wa nhang: kheim: zao" ako"- ga: ta" ra".
Yao: bam wa Asang re mali" bao" yu ko" ngad: ra".
Yao" qhid' mae" gyekhe' nae" gyezo: khyo" mali" ko" ngad: ra"- ga: ta" ra".
24 Zhau: vha: bo: thao" yaug wa Keni byu Hebera nho: yham sang myhi" Yaela ngad: ra".
Yao: wa zaung jham: khug mae na: ra" myiqe: qe tho' zhau: vha: bo: thao" yaug ngad: ra".
25 Sisera wa qid mho' ra". Ngadqere: yao: wa nung: nug' byid: jhaug' ra".
Yao: wa khug' yaung" khug' gai mae nung: nug' pe' yao: re celo byid' ra".
26 Yao: wa lo, dashad' mae zaung daung" zang ci mung:- dashad' mae dau ci: ra".
Yao: wa Sisera re be, mung: yao" au: gao: qug: re be; khyoe' ra".
Yao: wa aiyaug: au: re be; kyao" pye' ra".
27 Yao: wa yao" pad' laug khyo nhe' gyo" lo" ru we' lang" lo" mung:
Yaela nho: khyid qao: mae malab lo: lang" jo; ra".
Yaela khyid qao: mae yao: wa yao" pad' laug khyo nhe' gyo" lo" mung: lang" lo" ra".
Yao: wa myid gaung khyo shid: lang" lo" ra".
28 Sisera nho: yao: myhi" wa bao: zo: kham: khyo" qu" ke' ra".
Qe,kyo pin: lung: nhaung thao" mae" zhaug' qu" na: ra".
Yao: nho: gyekhe' myao: lhin" pe"mung: ce qhi" thao gyo" na: i? ga: yao: myid' ra".
Yao" myao: jham wa dam: tug' lo phyao: ai qhi" yam" na ko" i?
29 Yao" nho: pha,jhi" bo: thao" myiqe: qe wa yao: re dao: tau: mung:
yao: yao: re paug' yang: yang: ta" ko" ru wa-
30 Yao: bam wa lanyab jham re cao" taung" yu mung: jho" gae: yu genae" re:-
Gyezo: dayaug re zomyi: nau" dayaug mangad: lao"- shid' yaug
Sisera qhid' mae" pin: gai-
kho:kham myhi" lang zang: mae ve, nae"- nag: thug' shaung: ra" ja: jham re cao" qho: na ko" ru za: ngad genae"- ga: ta" ra".
31 Asang we"- ni" gyevo qe alhab' wa ai we' dakhyo: shid vageshao: wo"-
Ngadqere: ni" ba nam qe wa ba we' dakhyo: zho: vageshao: wo"- ga: nghaui" caung" ako".
Aimung: mung"dan: mae zin lam: byid xe ngaui pyo: yaug yo: jo; ra".