7
Midian Byu Qere Gidon Yang Aung: Pye' Ru
1 Daba re- Gidon we' yao" byu qe wa ne, seim no' to" mung: Harod qid thug' nhae mae jamu kad' na: ako". Midian byu qe: jamu wa yao: bam mae" mug: am: shad' More bug gaung nhae mae" lao: khaung: mae ngad: ra".
2 Asang wa Gidon re- Midian byu qere yao: bam re aung: yu nhao nae" nao qo" ra" byu qe wa nga" qhid' mae" saung" laug: ako". Yao: bam yao" qam" yang aung: pye' ru ngad: ga: yao: bam myid: jho: yu genae"- airulao" ngore pe" masun: genae".
3 Amyu" byu qere- gyaug yaug khag' ngadqere: yham khyo phao: lo" ge,- ngonhaung" wa ce: Gilead bam mae na: jo; nae"- ein: rure ta" pyo: ke' wa,- ga: ta" ra". Airumung: shid' tug: shid' taung phao: lo" ako". Ngadqere: datug wa na: jo; ako".
4 Ailao"- Asang wa Gidon re- ni" byu saung" myo" ashi"- yao: bam re qid khyo jhui" gyo" lo" mung:- ngo wa aimae yao: bam re ni" qhid' mae" kho' byid: nae". Nao we' daga" ye: ang: ein: ngo ta" ra" yaug wa ye" li" nae". Nao we' daga" maye: ang nae" ein: ngo ta" yaug wa maye: nae" ga: ta" ra".
5 Gidon wa ai: byu qere qid khyo jhui" gyo" lo" ra". Ailao" Asang wa yao: re- qid re lo, yang gag: yu mung: lakha: we' dakhyo: yao" sho: yang yo, shaug' ra" mo, yaug khao: ngo" re- gam" mung: shaug' ra" mo, mae" kho' yu wa,- ga: ta" ra".
6 Qid re yao: bam: lo, mae gag: yu yang: lha" yo; shaug' ra" mo, sam yo zo: ngad: ako". Gatau alhab' mo, wa gam" yang: shaug' ako".
7 Asang wa Gidon re- ngo wa naonhaung" re khyad' yu mung:- ai: qid lha" yo, shaug' ko" byu sam yo zo: we' daga" Midian byu qere aung: pye' nae" akhang" ngo nao re byid: nae". Gatau yaug khao: ngo" re yham khyo phao: lo" genae" qhid' mae" ta" wa,- ga: ta" ra".
8 Airumung: zo:kho we' labo" jham vin mo, ngad ko" ra" ai byu sam yo mae" jeyang: Israel byu alhab' mo, re yham phao nhao: ke' ra". Midian byu qenho: jamu wa yao: bam: o mae" lao: khaung: mae ngad: ra".
9 Ai: myi re Asang wa Gidon re- to" mung: ai: jamu re gye yezin: wa,- ngo wa aire nao re aung: pye' nhao nae".
10 Ngadqere: nao aire gye yezin: nae" gyaug: re wa ai: jamu khyo ni" daui daui yaug Pura we' gyo" ye: wa,.
11 Yao: bam pe" ta" na ko" rure nao yethe' gyo" li" nae". Ailao" aire gye yezin: nae" vae" ra" myid nao qo" yu: li" nae"- ga: ta" ra". Airumung: Gidon wa yao" daui daui yaug Pura we' gyevo qenho: jamu ayae khyo gyo" ye" ra".
12 Midian byu qe- Amaleg byu qe we' din"pyad' yo mae na ko" ra" byumyu" qe wa lao: khaung: mae khyag' phaung" jham we' dakhyo: byang" jo; ako". Yao: bam wa panglai: qid yae mae" ma coe nho" gola:u jham qo" ako".
13 Gidon joe" ye" re- byu dayaug wa yao" byin cao: pho" re yab mo, dalam" khyo re ta" kyo" na: rure yethe' gyo" ra". Aiyaug wa bale cin man" mug dakhai" ngonhaung" zaung khyo lang" gyo" lo mung: ngonhaung" zaung re lazao" ra". Ailao" zaung wa gyang: lo" mung: myid gaung mae pye: ngad: byaug: rure ngo yab mo, myao:- ga: ta" ra".
14 Yao" byin cao: pho" wa- airu wa Yoasha yauggai zo: Israel byu nho: shae ngad: ra". Gatau: lajheim: magai: boe" ngad: ra". Mao"So wa Midian byu qere we' ngonhaung" gyetab, geim" re yao: re aung: pye' nhao: ava"- ga: phaug' tau" ra".
15 Gidon wa byu aiyaug nho: yab mo, we' lajheim: re the' gyo: lao"- yao" pad' laug khyo goe; gyo" mung: Asang re caung:pa" ra". Ai: thao yao: wa Israel jamu khyo dam: phao: lo mung:- to" ge,- Asang wa Midian gyetab re naonhaung" re aung: pye' nhao: ra"ava" lhe"- ga: ta" ra".
16 Yao: wa yao" byu sam yo zo: re sam phung: kho' mung: yaug khao: ngo" re labo" daphau: we' akhug mae myidam ke' yang: yae: dalam: lam: byid' ra".
17 Yao: wa yao: bam re- lhaug' qu" ge, ngo ai: jamu athao mae joe" ye: lao"- ngo kad' ruru: kad' ge,.
18 Nga" nho: phung: we' ngo wa ngonhaung" nho: labo" jham re mad: ke' lao"- naonhaung" labo" jham re jamu lhang" gam: mad mung:-Asang we' Gidon qhid' mae" wo" ein: zag: hug' ge,- ga: ta" ra".
19 Gidon we' yao" byu dayo zo: wa gae gaung: joe" qid zaung" yaug jho" tha" thao re yao:- jamu thao khyo joe" ye" ako". Ailao"- yao: bam wa labo" jham re mad mung: yao: bam ci: ra" yae jham re be; kho' ako".
20 Gatau shid' phung: re: ai we' dakhyo: kad' ako". Yao: bam wa yao: bam: lo, kaung: shad' mae myidam: ci- lo, yo shad' mae labo" ci mung:- Asang we' Gidon nho: shae wo" ga: zag: hug' ako".
21 Yaug khao: ngo" wa jamu lhang" gam: yao: yao" jo, qo mae ye; jo; ako". Gyevo gyetab geim" hug' yang: tao" phao: lo" ako".
22 Gidon nho: byu qe yao: bam: labo" mad: na ko" au:- Asang wa gyevo gyetab re yao: bam: shae: yang yao: cao: gye jho" zin: nhao: ra". Yao: bam wa Zarethan shad' khyo- Bed Shita we' Tabad nhae mae" Abel Mehola vogaung: joe" sho' tao" phao: lo" ako".
23 Ai: thao Nabhtali- Ashe- amyu" kaung we' Manashe mug: shid' dau geim" mae" mo, re khai: yu mung: yao: bam wa Midian byu qere cao" khe' ako".
24 Gidon wa Ephrim bam mug: alhab' khyo jao: sho' lagyo: jham re nhao: ke' ke' mung:- gyo" lo mung: Midian byu qere gye zin: ge,- Yodan gyaung: we' Bethbara gyaung: zo: joe" sho' Midian byu qere dagau: nhao ge, ga: ta" nhao: ke' ra". Ephrim amyu" kaung mae" mo, wa zang" li" nae" khai: yu qhug' mung: yao: bam wa Yodan gyaung: we' Bethbara gyaung: zo: joe" sho' zaung" pye' ako".
25 Yao: bam wa Midian zug: ngad ko" ra" Oreb we' Zeeb re taung" yu mung: Oreb re Oreb laug byo, mae se' pye' mung: Zeeb re wa Zeeb nho: sabyi nao: jao: mae se' pye' ako". Yao: bam wa Midian byu qere xo' yang: cao" khe' mung: Oreb we' Zeeb nho: au: lam: re ana" Yodan gyaung: ba thug' shad' mae na: jo; ra" Gidon jhao" cilo: byid' ako".