62
1 Ngo wa Yerusalem re qam: byid: nae" dao: jhau: thug' ke' nae".
Yao: khyad' yu: ru maqhug' qhug' wa ngo sae za: mana nae".
Amung: yao" aung doe; ru wa myi" re bao: ra" myidam we' dakhyo: ngad: li" nae".
2 Yerusalem we"- nao aung doe; rure byumyu" qe myao: li" genae".
Ni" phungbao re yao: bam: kho:kham qe the' myao: li" genae".
Nao wa mang asag' mhang" byid' ru qhug' li" nae".
3 Nao wa Asang: qhid' mae" yaung" ra" ba maug: we' dakhyo: ngad: li" nae".
4 Nao re shapye' pye' va" ga: mamhang" lo: genae".
Ni" mug: myid re shapye' to: qhug' ra" yham sang myhi" ga: mamhang" lo: genae".
Ni" nho: mang sag' wa Mao"So yao: re o ngaui: ava"- ga" ru ngad: li" nae".
Ni" mug: myid wa ngaui pyo: taung" lo, xo' to" ra"- ga: mhang" li" genae".
Pe"mung:ga"re Asang wa nao re o ngaui mung: ni" mug: myid re yham sang pho" we' dakhyo: ngad: li" nae".
5 Zolau: pho" wa yao" myhi" sag' khyo" zomyi: gyang" re yu: ru we' dakhyo:
nao re akhyao kad' yaug wa nao re lo,xo' yu: li" nae".
Pho" sag' yang yao" myhi" sag' re ngaui: ru we' dakhyo: ni" Mao"So wa nao re ngaui nae".
6 Yerusalem we"- ni" vang jham: dao mae jin" byu qere ngo to: byid: va".
Yao: bam myi" re: na" re: khonhae" re: sae za: magai: na genae".
Yao: bam wa Asang yao" nho: dao:so: jham re ta" peim: ca" genae" ngad: ra".
Yao: bam re: khonhae" re: yao: re mato" myhid' nhao genae".
7 Yerusalem re yao: madam: nyhang" te: byid: byid: wa yao: bam yao: re myaung: mangho: nhao genae".
Ai: vogaung: re mug: myid geim" yang caung:khin" byid: sho' kad' ako".
8 Asang wa dao:so: kad' to" ava". Ai re yao" qam: so' khyo" yang kad' thug' ke' ra".
Ni" nho: gaug zo wa ni" gyevo qenho: zo:ve maboe" lo nae".
Amung: taung bug byu qe wa ni" sabyi qang: mashaug' lo: genae".
9 Ngadqere: gaug zo re qho" ra" mo, yad: ra" mo, naonhaung" wa
mug re zo: yang: Asang re caung:khin" byid' li" genae".
sabyi shi: re caung mung: phyo' ra" mo, naonhaung" wa nga" Caung:pa" Yham vang" mae sabyi qang: shaug' li" genae".
10 Yerusalem byu qe we"- vogaung: mae" thug' ye: mung:
tug' lo: na ko" ra" naonhaung" amyu" byu qe: qhid' mae" khyodang phung" ge,.
Hau" mo" khyo re nyhang" ge,- aimae" laug baui jham re sho' pye' ge,.
Byumyu" qe qo" ba genae" qhid' mae" ve, so: re tau: zhaug' to: ge,.
11 Asang wa myid gaung alhab' re- nao re khyad' yu nae" qhid' mae" Asang joe" li" na: ra".
Yao" yang khyad' yu: to" ra" byu qere yao: we' daga" jhui" lo: na: ra" ein: Yerusalem byu qere ta" kyo: ge,.
12 Nao wa Mao"So: gyang" lho" byumyu"-
Asang: yang khyad' yu: to" ra" byumyu"- ga: mhang" ru qhug' li" nae".
Yerusalem wa Mao"So: yang jhid'de; ra" vogaung:- Mao"So: yang mashapye' ra" vogaung: ga: mhang" ru qhug' li" nae"- ga: ta" ra".