63
Byumyu" Jham: Dao Mae Asang: Nho: Aung Doe; Khyo
1 Edom mung" mae jo; ra" Bozra vogaung: mae" li" na yaug ce yaug khag' ngad: i? Gyai khid sho' ne ne mung: shaung ve; ci mung: yao" qam: so' we' qam: we' li" na yaug ceyaug khag' ngad: i?
Khyad' yu nae" qam: bo: ru we' yao" aung doe; rure ta" hau: nae" li" na yaug wa Asang ngad: ra".
2 Sabyi qang: kad' nae" sabyi shi: re nao" ra" yaug we' dakhyo: yao" mai bau: pe" mung: ai qhi" ne: ra" i?
3 Asang wa- ngo wa byumyu" qere sabyi shi: re we' dakhyo: nao: mung: khag' re: ngo re mali" bao" ngad: ako". Ngo wa yao: bam re nga" nhag' jam: yo" ru mae nao" pye' mung: yao: bam: sa: wa nga" mai bau: mae lhag' byaug: ra".
4 Nga" byu qere khyad' yu nae" ngo myid: phyid' to" ra" ayo, joe" lo: ava". Ai wa yao: bam: gyevo qere qobo dae byid' ra" ayo, ngad: ra".
5 Ngo qu" ke' re ngo re bao" thaug' byid: nae" khag' mana: rure myao lao"- ngo mug' byaug: ra". Ngadqere: nga" nhag' yo" ru wa ngo re qam: bo: nhao mung: ngoyao: aung doe; ru qo" yu va".
6 Nga" nhag' yo" ru mae byumyu" qe alhab' re nao" pye' mung: yao: bam re zab: phyi: pye' ra". Yao: bam: kao so' sa: re myid gaung khyo sheim" khyo" pye' va"- ga: tau" ra".
Israel Re Asang Gai Kad' Byid' Ru
7 Ngo wa Asang: nho: mabaui mabyo; ra" jhid'de; myid khyo re ta" kyo: nae". Yao: ngonhaung" re kad' va" ra" lo, mau" alhab' mathao mae yao: re caung:khin" nae". Yao" nhag' khyag' gang" tang: ra" jhid'de; myid mathao mae yao: wa Israel byu qere myo: sho' shaman" byid' to" ra".
8 Asang wa- yao: bam wa nga" byumyu" qe ngad: yao: bam ngo re mamhug' pyag' genae"- ga: ta" ra". Aimung: yao: wa yao: bam: dayin dayo: qug: khai: kham zo" ru mae" yao: bam re khyad' yu: ava".
9 Ai wa mug: lagyo: dayaug mangad:- ngadqere: yao: bam re khyad' yu yaug wa Asang yao: yao: ngad: ra". Yao: wa lai: lo: ra" ayo, mae khonhae" re: yao: bam re gun caung byid' lo: ra".
10 Ngadqere: yao: bam yao: re gye kad' tau: lhan: mung: yao" gyang" lho" byo re nhag' kaug' nhao: ako". Airumung: Asang wa yao: bam: gyevo boe" li" mung: yao: bam re gye kad' ra".
11 Ailao"- Asang: nho: daui daui yaug Moshe nho: pyad lai: lo" ra" ayo, re yao: bam dam: myid: beim: mung: yao" byumyu" nho: au: jhaung qere panglai: mae" khyad' yu: ra" yaug Asang wa ana" khai: mae ngad: i? Moshe re yao" byo byid: yaug ngad: ra" Asang wa khai: mae ngad: i?
12-13 Yao" qhid' mae" apyad ato mae lahau: qi" ru qo" yu nae" qhid' mae" panglai: qid re kho' pye' mung: yao" amyu" byu qere qid no, khyo" jhui" lo yang: yao" qam so' re ci yang: Moshe khyo" yang qi" qhang: ra" mau" jham re kad' yaug Asang wa khai: mae ngad: i? ga: myid' ako". Asang: yang jhui: yang: yao: bam wa seyo: myao: lae" jham: khyid khu ru: tang mung: khonhae" re: matha" lang: ngad: ako".
14 Nung: jham wa myid xau gai: ra" lao: khaung: khyo jhui" ye" lo" qhug' ko" ru we' dakhyo: Asang wa yao" byu qere dugno: byid' ra". Yao" byu qere yao: jhui" au: she mung: yao" mang a re ngha: yhe' byid' ra".
Nhag' Khyag' We' Bao" Thaug' Ru Qhid' Mae" Akyu" Mho' Dao:
15 Asang we"- ni" gyang" lho" ru we' phungbao mae nao na: jo; ra" jo, qo mug: khaung dao mae" ngonhaung" re qu" byid: la,- ngonhaung" qhid' mae" ni" nho: qi" qhang: ra" shono byid' ra" myid wa khai: mae ngad: i? Ni" qam: so' wa khai: mae ngad: i? Ni" nho: jhid'de; myid we' nhag' khyag' myid wa khai: mae ngad: i? Ngonhaung" re pe" shui manho dakad' la,.
16 Nao wa ngonhaung" nho: yao: pho" ngad: ra". Ngonhaung" nho: phug' pho" Abraham we' Yaku wa ngonhaung" re maba ngad: ako". Ngadqere: Asang nao wa ngonhaung" re khonhae" re: khyad' yu yaug ngonhaung" nho: yao: pho" ngad: ra".
17 Ni" khyo mae" ngonhaung" re pe" mung: nghung" lo" nhao: i? Ngonhaung" nao mae" phaug' lo" sho' pe" mung: ngonhaung" re gyai nhag' lam: qao nhao: i? Nao re caung da" byid: ko" ra" mo, mathao mae re: khonhae" re: ni" byu qe ngad: lo ko" ra" mo; mathao mae re: tug' lo ri:-
18 Ni" nho: gyang" lho" byu qe ngad ko" ra" ngonhaung" wa ngonhaung" nho: gyevo qeyang dazab zo: khe' thug' pye' ru qhug' lo: bam va". Yao: bam wa ni" nho: gyang" lho" jo, qo re zab: nhe" pye' ako".
19 Nao wa ngonhaung" nho: zug: khonhae" re: mangad' qu" yaug ru: ngonhaung" wa ni" byu qe khonhae" re: maboe" qu" mo, reru: ngonhaung" re kad' ra".