61
Khyad' Yu: Ra" Khyo Lau Dao: Gai
1 Asang kho:kham wa yao" byo ngo re pyang" byid' ava".
Yao: wa myaung sho: mo, re lau dao: gai vin: ye: byid: nae"- nhag' lam: gyug: mo, re gai byid: nae".
Thaung: byu qere lhoe' ke' byid' ra" khyo ta" hau: nae"
thaung: laung" jo,mo, re lhoe' ke' byid: nae" qhid' mae" ngo re khyin: yu mung: nhao: ke' ava".
2 Asang: yang yao" byu qere khyad' yu mung:
yao: bam: gyevo qere aung: pye' nae" ayo, joe" va" ra" khyo re ta" hau: nae" qhid' mae" yao: ngo re nhao: ke' ra".
Yao: wa kaug' ngug: na: ra" mo, alhab' re nhag' tang" byid: nae".
3 Ziun mae kaug' ngug: na: ra" mo, re kaug' ngug: ru atha" ngaui bau: ngaui lho" ru byid: nae".
Kaug' ru atha" nghaui"caung: khin" nhao nae" qhid' mae" ngo re nhao: ke' ra".
Yao: bam wa Asang yao" yang qho" to" ra" sag' gae jham we' dakhyo: dau: li" genae".
Yao: bam alhab' wa jo: rure kad' li" genae".
Mao"So wa yao: kad' lo: ra" lo, mau" mathao mae caung:khin" byid' ru qhug' li" nae".
4 Yao: bam wa myao" sho' byo; qeim: jo; ra" vogaung: jham re dam: zao: li" genae".
5 Nga" byumyu" we"- taung bug byu qe wa naonhaung" re caung da" byid' li" genae".
Yao: bam wa nga" yao kyaung" re gun caung byid: mung: naonhaung" myid gaung re yo kad'-
naonhaung" nho: sabyi khyae jham re caung byid' li" genae".
6 Amung: naonhaung" wa Asang: nho: khinjaung qekhyo" re:
ngonhaung" Mao"So: daui daui mo, khyo" re: lahau: qi" li" genae".
Naonhaung" wa byumyu" qe: nho: jo,nho" jham qo" yhung: zo: mung:
ai re naonhaung" nho: khyo" langa: kad' li" genae".
7 Naonhaung" nho: qho' ru we' nga: yeim: ru wa thao" byaug: ra".
Naonhaung" yao" mung" mae naonhaung" qo" na: li" genae".
Amung: naonhaung" nho: jo,nho" wa shid' zhao" ngad: li" nae".
Amung: naonhaung" nho: ngaui bau" ru wa apyad ato mae dang: jo; li" nae".
8 Asang wa-
tarha" din: man" rure ngo jhid'de; mung: zag zo" ru we' qobo yug: mau" re ngo nghang" ra".
Nga" byu qere ngo jhaug' zaug za: aphug' jhaung qhu" byid: mung:-
apyad ato we' sin" ra" dao: thang" yao: bam we' kad' to: nae".
9 Yao: bam wa byumyu" qe: phaung mae lahau: qi" li" genae".
Yao: bam re myao: ra" mo, yaug khao: ngo" wa
yao: bam re ngoyang shaman" byid' to" ra" byu qe ngad ko" ra" khyo re yao: bam ba li" genae"- ga: ta" ra".
10 Asang kad' ra" lo, mau" mathao mae Yerusalem ngaui bau" ra".
Yao: wa yao" lo,xo' poe qhid' mae" shaung ve; ci: ra" myhi" sag' we' dau: li" nae".
Mao"So wa yao: re khyad' yu: ru we' aung doe; ru yang shaung: vhe' to" ava".
11 Myug: shi: jham anyaug thug' li" mung: yaug: li" zai ngad: ru wa gaigai: ngad: ru we' dakhyo:-
Asang kho:kham wa yao" byu qere khyad' yu: li" nae".
Amung: byumyu" qe alhab' wa yao: re caung:khin" li" genae".